ގިނަ ބަޔަކު ކަރަންޓީނަށްދާނަމަ ޓެސްޓްހަދަންޖެހޭ ގޮތައް ބަދަލުގެންނަނީ

މާލެ ސަރަހައްދުން 10 މީހުންނަށްވުރެ ގިނައިން އެއްތަނެއްގައި ކަރަންޓީންވާނަމަ ފުރުމުގެ ކުރިން ޕީސީއާރު ޓެސްޓް ހަދަންޖެހޭގޮތަށް ބަދަލުކުރުމަށް ވިސްނަމުންދާކަމަށް ހެލްތް އިމަޖެންސީ އޮޕަރޭޝަން ސެންޓަރުން ވިދާޅުވެއްޖެއެވެ.

އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕްގެ ޑޮކްޓަރ، ޑރ. އަޙްމަދު ޝަހީދު ވިދާޅުވީ، ބައެއް މީހުން ކަރަންޓީނަށްގޮސް އުސޫލާއި ހިލާފުވަމުންދާކަމަށާއި، ރަށްރަށުގައި ކޯވިޑް-19 ނުފެތުރޭނެ ގޮތަށް ކަންކަން އިންތިޒާމުކުރަމުންގެންދާކަމަށެވެ.

ޑރ. އަޙްމަދު ޝަހީދު ވިދާޅުވީ އެކި އޮފީސްތަކާއި ބިދޭސީންގެ އިތުރުން އާންމު މީހުންގެ ތެރެއިންވެސް އެއްތަނެއްގައި ގިނަ ބަޔަކު ފުރަބަންދު ކަރަންޓީންވާނަމަ އަމަލުކުރަންޖެހޭނީ ވަކި އުސޫލަކުންކަމަށެވެ. ޝަހީދު ވިދާޅުވީ 10 މީހުންނަށްވުރެ ގިނައިން އެކުގައި ކަރަންޓީންވާން ޖެހޭ ހާލަތުގައި ޕީސީއާރު ޓެސްޓް ހަދަން މަޖުބޫރުކުރަން ވިސްނަމުންދާ ކަމަށާއި އެކަން މަޖުބޫރު ކުރަނީ ވަކިވަކިން ކަރަންޓީންގެ އިންތިޒާމް ހަމަނުޖެހޭ މީހުންނަށް ކަމަށް ވެސް ވިދާޅުވި އެވެ.


ޕީސީއާރު ޓެސްޓް ހެދިނަމަވެސް ވައިރަސްގެ އަސަރު ހުރި މީހެއްނަމަ ފުރަބަންދު ކަރަންޓީނުގެ ދުވަސްތަކުގައި އެމީހާ ޕޮޒިޓިވްވުމުގެ ފުރުސަތު އޮތުމާއެކު ރައްކާތެރިވުމުގެ ގޮތުން އަޅަންޖެހޭ ރައްކާތެރިކަމުގެ ފިޔަވަޅުތައް ކަރަންޓީނަށްދާ ހުރިހާ އެންމެންވެސް އެޅުން މުހިއްމުކަމަށަށް އެޗްޕީއޭއިން ވަނީ ވިދާޅުވެފައެވެ.

advertisement