މަހާޖައްރާފުގެ މުޅި ކްރޫ ދިވެހިންނަށް ބަދަލުކޮށްފި

އެމްޓީސީސީގެ ކޮންނަ ބޯޓު މަހާޖައްރާފުގެ ވަޒީފާތަކަށް ދިވެހިން ހަމަޖައްސައިފިއެވެ.

މަހާޖައްރާފު ރާއްޖެ ގެނައި ފަހުން މިހާތަނަށް މި އުޅަނދުގައި މަސައްކަތް ކުރަމުން ދިޔައީ ހުސް ބިދޭސީންނެވެ. ނަމަވެސް މިހާރު މި ބޯޓުގެ މުޅި ކްރޫ ވަނީ ދިވެހިންނަށް ބަދަލުކޮށްފައެވެ. އެގޮތުން 17 ދިވެހިން މި ބޯޓުގައި ހަރަކާތްތެރިވާނެ އެވެ. މީގެތެރޭގައި ކެޕްޓަނުން އިން ފެށިގެން އިންޖިނޭރުންނާއި ކައްކާއިންނަށްވެސް ހަރަކާތްތެރިވާނީ ދިވެހިންނެވެ.

advertisement

މިކަމާއި ގުޅިގެން އެމްޓީސީސީގެ މެނޭޖިން ޑިރެކްޓަރު އާދަމް އާޒިމް ވިދާޅުވީ، މި ބަދަލުގެ ސަބަބުން ރާއްޖޭން ބޭރުވެގެންދާ އެތައް މިލިއަން ޑޮލަރެއް ސަލާމަތް ކުރެވި، ދިވެހިންގެ އެތަށް ބަޔަކަށް ވަޒީފާ ލިބިގެންދާނެ ކަމަށެވެ.

މަހާޖައްރާފަކީ 50 މީޓަރުގެ އަޑިން ވެލި ނެގުމުގެ ގާބިލްކަން ލިބިފައިވާ އަދި އެއްފަހަރާ 3700 ކިއުބިކް މީޓަރުގެ ވެލި ބަރު ކުރެވޭ އުޅަނދެކެވެ. މަހާޖައްރާފު ބަނުމަށް އެމްޓީސީސީން 36 މިލިއަން ޑޮލަރު (555 މިލިއަން ރުފިޔާ) ހޭދަ ކުރި އެވެ. މި އުޅަނދު ބަނުމުގެ މަސައްކަތް ކުރީ ނެދަލެންޑްސްގެ އައިއެޗްސީއާ ހަވާލުކޮށްގެން ޗައިނާގެ ނަންޓޮން ރެއިންބޯ މެރިން ޓެކްނޮލޮޖީ ބޯޓު ޔާޑުގަ އެވެ. އެމްޓީސީސީއިން ވަނީ މިހާތަނަށް މަހާޖައްރާފުން 13 މަޝްރޫއެއްގެ މަސައްކަތް ކޮށްފަ އެވެ.