ބޯޑަރު ހުޅުވާލިފަހުން 22000 ފަތުރުވެރިން ރާއްޖެ އަތުވެއްޖެ

ރާއްޖޭގެ ބޯޑަރު ހުޅުވާލިފަހުން މިހާތަނަށް 22000 ފަތުރުވެރިން ރާއްޖެ އައިސްފިއެވެ. 

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ރާއްޖޭގެ ބޯޑަރު ހުޅުވާލިދުވަސްކަމަށްވާ 15 ޖުލައި އިން މިމަހުގެ 5 ވަނަ ދުވަހާއި ހަމައަށް މުޅި ޖުމްލަ 22،007 ފަތުރުވެރިން ވަނީ ރާއްޖެ އައިސްފައެވެ. މީގެތެރޭގައި ހިމެނެނީ ޖުލައިމަހު ރާއްޖެއައި 1752 ފަތުރުވެރިންނާއި، އޮގަސްޓް މަހު ރާއްޖެއައި 7628 ފަތުރުވެރިންނާއި، ސެޕްޓެމްބަރ މަހު އައި 9538 ފަތުރުވެރިންގެ އިތުރުން މިމަހުގެ 1 އިން 5 އަށް ރާއްޖެ އައިސްފައިވާ 3140 ފަތުރުވެރިންނެވެ.

advertisement

ބޯޑަރު ހުޅުވާލިފަހުން ރާއްޖެއަށް އެންމެ ގިނައިން ފަތުރުވެރިން އައިސްފައިވާ 3 މާކެޓްގެ ތެރޭގައި ހިމެނެނީ ރަޝިއާ، ޔޫއޭއީ އަދި އެމެރިކާއެވެ. ރަޝިއާއިން 3598 ފަތުރުވެރިން އައިސްފައިވާއިރު، ޔޫއޭއީއިން 2967 ފަތުރުވެރިން އަދި އެމެރިކާއިން 2032 ފަތުރުވެރިން ވަނީ ރާއްޖެ އައިސްފައެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް މުޅި ޖުމްލަ 404،854 ފަތުރުވެރިން ވަނީ ރާއްޖެ އައިސްފައެވެ. މިއީ ޖަނަވަރީ މަހުން އޮކްޓޯބަރ މަހުގެ 5 ވަނަ ދުވަހުގެ ނިޔަލަށް ރާއްޖެ އައިސްފައިވާ ފަތުރުވެރިންގެ ތަފާސްހިސާބެވެ.