ހުޅުމާލެ ފޭސް ދޭއްގެ ބަސް ރޫޓް ކަނޑައެޅުމާ ބެހޭ ގޮތުން މަޝްވަރާކޮށްފި

ހުޅުމާލެ ފޭސް ދޭއްގެ ބަސް ރޫޓްތައް ކަނޑައެޅުމާ ބެހޭ ގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ބަހުގެ ހިދުމަތް ދޭ އެމްޓީސީސީއާ ދެމެދު މަޝްވަރާކޮށްފިއެވެ.

މި މަޝްވަރާ ބައްދަލުވުމުގައި ފޭސް ދޭއްގެ ބަސް ރޫޓުގެ އިތުރުން ފޭސް އެކެއް އަދި އެއާޕޯޓަށް ކުރާ ދަތުރުތައް އިތުރަށް ހަރުދަނާ ކުރެވޭނެ ގޮތްތަކާ ބެހޭ ގޮތުން މަޝްވަރާކޮށްފައި ވެއެވެ. އަދި މިހާރު ދިމާވާ މައްސަލަތަކާ ބެހޭ ގޮތުން ވެސް ދެ ކުންފުނީގެ އޮފިޝަލުން މިއަދު ވަނީ މަޝްވަރާކޮށްފައެވެ.

advertisement

ހުޅުމާލޭގެ ބަސް ދަތުރުތައް ރަނގަޅުކުރުމަށް އެޗްޑީސީ އާއި އެމްޓީސީސީ ގުޅިގެން ގިނަ މަސައްކަތްތަކެއް ކުރަމުން އަންނަ އިރު ހުޅުމާލެ ދެ ވަނަ ފިޔަވަހީގެ ދަތުރުފަތުރުގެ ކަންކަން ފެށުމަށް ވެސް ދެ ކުންފުނިން އަންނަނީ ތައްޔާރުވަމުންނެވެ. ހުޅުމާލެ ދެ ވަނަ ފިޔަވަހީގެ އެއްބައި މިހާރު އާންމުންނަށް ވަނީ ހުޅުވާލާފައެވެ. އެ ގޮތުން އިރުމަތީ ފަރާތު ބީޗް ސަރަހައްދުން އަމިއްލަ ފަރާތްތަކަށް ދޫކޮށްފައިވާ ބައެއް ބިންތަކުގައި ގެދޮރު އަޅައި މީހުން މިހާރު ދިރިއުޅެން ފަށާފައިވާ އިރު ހުޅުމާލޭގައި ހިންގާ ހައުސިންގްގެ އެންމެ ބޮޑު މަޝްރޫއު ކަމަށްވާ ހިޔާ ފްލެޓްތަކުގެ މަސައްކަތް ވެސް ހަލުވިކަމާ އެކު ކުރިއަށް އެބަ ދެއެވެ. މި އަންނަ އަހަރުގެ މެދުތެރޭގައި އެތަންތަނަށް ވެސް މީހުން ބަދަލުވާނެ ކަމަށް ލަފާކޮށްފައިވާ އިރު ފެނާއި ނަރުދަމާ އާއި ވިޔަފާރިތަކާއި ހޮޓާ ރެސްޓޯރެންޓްތަކުގެ އިތުރުން ދަތުރު ފަތުރުގެ ކަންކަން ވެސް އެ ސަރަހައްދުގައި ފެށިގެންދާނެއެވެ.