މާލެ ސަރަހައްދުގެ ސުކޫލްތަކުގައި ގްރޭޑް 7 އަދި 8 އަށް މިމަހު ކިޔަވައިދޭން ފަށަނީ

މާލެ ސަރަހައްދުތަކުގެ ސްކޫލުތަކުގެ ގުރޭޑް 7 އަދި 8 ގެ ދަރިވަރުންނަށް މިމަހު ކިޔަވައިދޭން ފެށުމަށް އެޑިޔުކޭޝަން މިނިސްޓްރީން ނިންމަވައިފިއެވެ.

އެޑިޔުކޭޝަން މިނިސްޓްރީން ވިދާޅުވެފައިވާ ގޮތުގައި، މާލެ ސިޓީގެ ސްކޫލުތަކުގެ ގްރޭޑް 8 ދަރިވަރުންގެ ކިޔެވުން މިމަހުގެ 19 ވާ ހޯމަ ދުވަހު ފެށުމަށް ހަމަޖެހިފައިވާކަމަށެވެ. އަދި ގުރޭޑް 7 ގެ ދަރިވަރުންނަށް ސްކޫލުތަކުގައި ކިޔަވައިދޭން ނިންމާފައިވަނީ މިމަހުގެ 25ވާ އާދީއްތަ ދުވަހުން ފެށިގެންކަމަށްވެސް އެޑިޔުކޭޝަން މިނިސްޓްރީން ވަނީ ނިންމަވާފައެވެ.

އެޑިޔުކޭޝަން މިނިސްޓްރީން މިގޮތަށް ނިންމަވާފައި ވަނީ، ކޯވިޑް-19ގެ ޙާލަތަށް ރިއާޔަތްކޮށް، އެޗްޕީއޭގެ ލަފާގެ މަތިންނެވެ.

ކޯވިޑް-19 އާ ގުޅިގެން އެންމެ ފުރަތަމަ ރާއްޖޭގެ ހުރިހާ ސްކޫލެއްގެ ކިޔެވުން މެދުކަނޑާލުމަށްފަހު، އަލުން ކިޔަވައިދޭން ފަށާފައި ވަނީ ޖުލައި މަހުގެ 1 ވަނަ ދުވަހުއެވެ. އޭރު އަތޮޅުތަކުގައި ގްރޭޑް 1 އިން ފެށިގެން 12 ދަރިވަރުންނަށް ކިޔަވައިދޭން ނިންމި ނަމަވެސް މާލޭގެ ހާލަތަށް ބަލާ ކިޔަވައިދެމުން އައިސްފައިވަނީ ގްރޭޑް 9 އިން 12އަށެވެ.

advertisement