ޚަބަރު

އާސިއާންގެ ގައުމުތަކުގެ ބައެއް ސަފީރުންނާ ޝާހިދު ބައްދަލުކުރައްވައިފި

13 އޮކްޓޯބަރ 2020 - 11:34

އެސޯސިއޭޝަން އޮފް ސައުތު އީސްޓް އޭޝިއަން ނޭޝަންސް (އާސިއާން)ގެ ބައެއް ގައުމުތަކުން ރާއްޖެ އަށް ކަނޑައަޅާފައިވާ ސަފީރުންނާ ރާއްޖޭގެ ޚާރިޖީ ވަޒީރު އަބްދުﷲ ޝާހިދު މިއަދު ބައްދަލުކުރައްވައިފިއެވެ.

އޮންލައިންކޮށް ބޭއްވި މި ބައްދަލުވުމަކީ މިނިސްޓަރު ޝާހިދު އިސްނެންގެވުމުގެ މަތިން އާސިއާންގެ ގައުމުތަކާއި ރާއްޖެއާ މެދު އޮންނަ ގުޅުން ބަދަހިކުރުމުގެ ގޮތުން ބޭއްވި ބައްދަލުވުމެއް ކަަމަށް ފޮރިން މިނިސްޓްރީން މައުލޫމާތު ދެއެވެ. މި ބައްދަލުވުމުގައި އިންޑޮނީޝިއާ އާއި މެލޭޝިއާގެ ހައި ކޮމިޝަނަރުންނާއި ލާއޯސް އާއި ފިލިޕީންސް، ތައިލެންޑް އަދި ވިއެޓްނާމްގެ އެމްބެސެޑަރުން ބައިވެރިވެވަޑައިގެންނެވިއެވެ.

advertisement

ފޮރިން މިނިސްޓްރީން ބުނީ ކޮވިޑް-19ގެ ސަބަބުން ރާއްޖެ އާއި އާސިއާންގެ ގައުމުތަކަށް ކުރިމަތިވެފައިވާ ދަތިތަކާ ގުޅޭ ގޮތުން މަޝްވަރާކުރެއްވި ކަމަށެވެ. މީގެ އިތުރުން އާސިއާންގެ ގައުމުތަކާއި ރާއްޖެއާ ދެމެދު އޮންނަ ގުޅުން އިތުރަށް ބަދަހިކުރުމާއި މަލްޓިލެޓްރަލް ފޯރަމްތަކުގައި ގުޅިގެން މަސައްކަތްކުރުމާ ބެހޭ ގޮތުން ވެސް މަޝްވަރާކުރެއްވި ކަމަށް ފޮރިން މިނިސްޓްރީން ބުންޏެވެ.

ފޮރިން މިނިސްޓްރީން ބުނީ އާސިއާންގެ ގައުމުތަކުން ރާއްޖެއާ ދެމެދު ބަހައްޓާ ގާތްކަމާއި އެހީތެރިކަމަށް މިނިސްޓަރު ޝާހިދު ޝުކުރު އަދާކުރެއްވި ކަމަށެވެ.

ރިއެކްޝަންސް
0
0
0
0
0
0
0