ީބައިނަލް އަގުވާމީ އެވޯޑެއް ސްޓެލްކޯއަށް ލިބިއްޖެ

ބައިނަލް އަގުވާމީ އެވޯޑެއް ސްޓޭޓް އިލެކްޓްރޯނިކް ކޮމްޕެނީ ،ސްޓެލްކޯއަށް ލިބިއްޖެއެވެ.

ސްޓެލްކޯއަށް ލިބިފައިވަނީ “ޑްރީމް ކޮމްޕެނީސް ޓު ވޯކް ފޯ” އެވޯޑެވެ. މި އެވޯޑް ލިބިފައިވަނީ އޭޝިއާސް ބެސްޓް އެމްޕްލޯޔަރ ބްރޭންޑް އެވޯޑްސް 2020 ހަފްލާގެ ތެރެއިންނެވެ. އޮންލައިންކޮށް ބޭއްވި މި ހަފްލާ ބާއްވާފައިވަނީ ވޯލްޑް އެޗްއާރުޑީ ކޮންގްރެސް އާއި، އެމްޕްލޯޔަރ ބްރޭންޑިންގ އިންސްޓިޓިއުޓް ގުޅިގެންނެވެ.

“ޑްރީމް ކޮމްޕެނީސް ޓު ވޯކް ފޯ” ގެ އެވޯޑް އެ ކުންފުންޏަށް ލިބިފައި ވަނީ މުވައްޒަފުންގެ ކުރިއެރުމާއި، ހިތްހަމަޖެހުމަށް އަޅާފައިވާ ހަރުދަނާ ފިޔަވަޅުތަކުގެ ސަބަބުންކަމަށް ސްޓެލްކޯއިން ބުނެއެވެ. އަދި ކުންފުނި ހިންގުމުގައި ޒަމާނީ އެންމެ ފަހުގެ ޓެކްނޮލޮޖީތައް ތައާރަފުކޮށް ބޭނުން ކުރުމާއި، އެކުންފުނީގެ ތިމާވެއްޓާއި ރައްޓެހި ހަކަތައަށް އަހުލުވެރިކުރުވުމުގެ ޕްރޮގްރާމްގެ ސަބަބުންނެވެ.

މީގެއިތުރުން އިންޑިވިޖުއަލް ކެޓަގަރީއިން “އިމާރޖިންގ ލީޑަރ އޮފް ދި އިޔަރ” އެވޯޑް ސްޓެލްކޯގެ އެމްޑީ ހަސަން މުގުނީއަށް ވަނީ ލިބިފައެވެ. މި އެވޯޑް މުޣުނީއަށް ލިބިވަޑައިގެންފައިވަނީ ކުންފުނީގެ މުވައްޒަފުންގެ ކަންކަން ފުރިހަމަކޮށް ގެންދިއުމުގެ އިތުރުން ކުންފުންޏާއި މެދު ކަސްޓަމަރުންގެ މެދުގައި އޮންނަ އިތުބާރާއި، ތަސައްވަރު އިތުރަށް ރަނގަޅު ކުރުމަށްޓަކައި ކުރައްވަމުން ގެންދަވާ ކަންކަމުގެ ސަބަބުންކަމަށް ސްޓެލްކޯއިން ބުނެއެވެ.
ވޯލްޑް އެޗްއާރުޑީ ކޮންގްރެސްއަކީ ހިއުމަން ރިސޯސަސް ދާއިރާގައި މަސައްކަތް ކުރާ ފަރާތްތަކަށް ހާއްސަކޮށްގެން ބާއްވާ އެންމެ ބޮޑު އެއް ކޮންގްރެސްއެވެ. އޭޝިއާ ސަރަހައްދުގެ 30 އަށްވުރެ ގިނަ ގައުމުގެ ކުންފުނިތަކުން ވަނީ އެވޯޑަށް ވާދަކޮށްފައެވެ.

advertisement