ބީސީސީއިން ހުޅުވާ ފިހާރައިގައި ދިވެހި އުފެއްދުން ވިއްކުމުގެ ފުރުސަތު ހުޅުވާލައިފި

ބިޒްނަސް ސެންޓަރ ކޯޕަރޭޝަން (ބީސީސީ)އިން ހުޅުމާލެ ސެންޓްރޯ މޯލްގައި ހުޅުވުމަށް ހަމަޖެހިފައިވާ ފިހާރައިގައި ތަކެތި ވިއްކުމުގެ ފުރުސަތު ދިވެހި ވިޔަފާރިތަކަށް ހުޅުވާލައިފިއެވެ.

ހުޅުމާލެ ސެންޓްރޯ މޯލްގައި ބީސީސީއިން ދިވެހި އުފެއްދުންތައް ވިއްކާ ފިހާރައެއް ހުޅުވުމަށް ހަމަޖެހިފައިވަނީ އަންނަ މަހުއެވެ.

advertisement

މިއީ ދިވެހި އަތްތެރިމަސައްކަތް ކުރައްވާ ދިވެހިންނަށް އަމާޒުކޮށްގެން ސަރުކާރުގެ ކުދި އަދި މެދު ފަންތީގެ ސިޔާސަތުގެ ދަށުން އެފަދަ ވިޔަފާރިތައް ކުރިއެރުވުމުގެ މަގްސަދުގައި އެފަރާތްތަކަށް ތަކެތި ވިއްކަން ފަހި މާހައުލެއް ގާއިމު ކުރުމުގެ ގޮތުން ބީސީސީ އިން ކުރަން ނިންމާފައިވާ ކަމެކެވެ.

ބީސީސީއިން ވިދާޅުވީ ދިވެހި އުފެއްދުންތައް ވިއްކާ ފިހާރައިގައި ތަކެތި ވިއްކަން ބޭނުންވާ ފަރާތްތަކުން މިމަހުގެ 22 ވަނަ ދުވަހުގެ ހަވީރު 1500 ގެ ކުރިން ޕްރޮޕޯސަލް ހުށައަޅަންޖެހޭނެކަމަށެވެ. އީމެއިލް މެދުވެރިކޮށްވެސް ޕްރޮޕޯސަލް ހުށައެޅޭނެއެވެ.

ބީސީސީއިން ވެލާނާ އިންޓަނޭޝަނަލް އެއަރޕޯޓުގައި މިހާރުވެސް ދިވެހި އުފެއްދުންތައް ވިއްކުމަށް ހާއްސަ ފިހާރައެއް ހުޅުވައިގެން އަންނަނީ ދިވެހި އުފެއްދުންތެރިންގެ އުފެއްދުންތައް ވިއްކަމުންނެވެ.