ވެންޓިލޭޓަރުގެ މައްސަލާގައި އަމީން އާއި އިތުރު ބައެއްގެ މައްޗަށް ދައުވާކުރަން ފޮނުވައިފި

ވެންޓިލޭޓަރުތަކެއް ގެނައުމަށް ދުބާއީގެ ކުންފުންޏަކާ ހަވާލުކޮށް އެޑްވާންސްކޮށް ފައިސާ ދެއްކި މައްސަލައާ އާއި އިތުރު ވެންޓިލޭޓަރު ގެނައުމުގައި ކޮރަޕްޝަނަށް މަގުފަހިވާ ގޮތަށް އަމަލުކޮށްފައިވާ ކަމަށް ތުހުމަތުކުރެވޭތީ ހެލްތު މިނިސްޓަރު އަބްދުﷲ އަމީން އާއި އިތުރު 10 ފަރާތަކަށް ދައުވާކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލްގެ އޮފީހަށް ހުށަހަޅައިފިއެވެ.

މި މައްސަލާގައި އޭސީސީން ކުރި ތަހުގީގަށް ފަހު މިއަދު ވަނީ ބަޔާނެއް އާންމުކޮށްފައެވެ. އެ ބަޔާނުގައި އޭސީސީން ބުނީ މިއީ މިހާތަނަށް އެ ކޮމިޝަނުން ކުރި އެންމެ ބޮޑު ތަހުގީގު ކަމަށާއި ދައުލަތުގެ އެކި އިދާރާތަކުން 1،600 ޑޮކިއުމެންޓާއި 500 އަށް ވުރެ ގިނަ އީމެއިލް އެނަލައިޒްކޮށްފައިވާ ކަމަށެވެ. އަދި 36 މީހެއްގެ ބަޔާން ނަގާފައިވާ އިރު ބޭންކް އެކަންޓްތައް އެނަލައިޒްކޮށްފައިވާ ކަމަށް ބަޔާނުގައި ވެއެވެ.

advertisement

އޭސީސީން ބުނީ ކޮވިޑް-19ގެ ބަލިމަޑުކަމަށް ތައްޔާރުވުމުގެ ގޮތުން ވެންޓިލޭޓަރު ގެނައުމަށް ހަވާލުކުރުމަށް ކުރިއަށް ގެންދިޔަ މަސައްކަތުގެ ތެރެއިން އެންމެ ބޮޑު މައްސަލައެއްގެ ގޮތުގައި ފާހަގަކުރެވިފައި ވަނީ 75 ވެންޓިލޭޓަރު ގެނައުމަށް ދުބާއީގެ ކުންފުންޏެއް ކަމަށްވާ އެގްޒެކިއުޓާސްއާ ހަވާލުކުރި މައްސަލަ ކަމަށެވެ. އެ ކުންފުންޏާ ހަވާލުކުރި ވެންޓިލޭޓަރުތަކަށްވާ އަގުގެ 90 ޕަސެންޓް އެޑްވާންސްކޮށް ދީފައިވާ އިރު އެ ކުންފުނިން ފުރަތަމަ ގެނައި 10 ވެންޓިލޭޓަރު ވެސް އެއްބަސްވުމާ ހިލާފަށް އަދި މިންގަނޑުތަކަށް ނުފެތޭ ކަމަށް ހެލްތުން ވަނީ ކަނޑައަޅާފައެވެ. އޭގެ ފަހުން 10 ވެންޓިލޭޓަރު ގެނައި ނަމަވެސް ބާކީ ވެންޓުލޭޓަރުތައް އަދި ވެސް ގެނެވިފައެއް ނުވެއެވެ. އަދި މަސައްކަތް ހަވާލުކުރި އިރު ވި އެއްބަސްވުމާ ހިލާފަށް ގިނަ އޮޅުވާލުންތަކެއް އޮޅުވާލާފައިވާކަން ވަނީ ފާހަގަކުރެވިފައެވެ.

އޭސީސީގެ ބަޔާނުގައި ފާހަގަކޮށްފައިވާ ގޮތުގައި ވެންޓިލޭޓަރުތައް ގެނައުން ދުބާއީގެ ކުންފުންޏާ ހަވާލުކުރުމުގެ މަސައްކަތް ފެއްޓެވީ މިނިސްޓަރު އަމީންއެވެ. އެ ގޮތުން އެއީ ޑަބްލިޔުއެޗްއޯ މެދުވެރިކޮށް އައި ކުންފުންޏެއް ކަމަށް ބަލައި އެ ކުންފުނީގެ ޑިއުޑިލިޖެންސް ނުހަދައި މަސައްކަތް ހަވާލުކުރަން ބިޑް ކޮމިޓީން ނިންމީ މިނިސްޓަރު އަމީން ދެއްވި މައުލޫމާތުތަކުގެ މައްޗަށް ބިނާކޮށް ކަމަށް ބިޑް ކޮމިޓީގެ މެންބަރުންގެ ބަޔާންތަކުން އެނގޭ ކަމަށް ކަމަށް ވެސް އޭސީސީން ފާހަގަކޮށްފައި ވެއެވެ. މީގެ އިތުރުން ބިޑް ކޮމިޓީގެ ބައްދަލުވުންތަކުގައި ބައިވެރިނުވާ ދެ މެންބަރަކު ބައްދަލުވުންތަކުގައި ބައިވެރިވުމަށް ބާރު އަޅުއްވައި ކުންފުންޏަށް އެޑްވާންސްކޮށް ފައިސާ ދެއްކުން އަވަސްކުރެއްވުމަށް މިނިސްޓަރު އަމީން މަސައްކަތްކުރެއްވި ކަން ފާހަގަކުރެވިފައިވާ ކަމަށް އޭސީސީން ބުނެފައި ވެއެވެ.

ވެންޓިލޭޓަރުތަކުގެ މައްސަލާގައި އޮޑިޓުން ވެސް ގިނަ މައްސަލަތަކެއް ފާހަގަކޮށްފައި ވަނިކޮށް އޭސީސީން ތަހުގީކުރި މައްސަލަ އަށް ފަހު ނެރުނު ބަޔާނުގައި ބުނެފައި ވަނީ ވެންޓުލޭޓަރު ގެނައުމަށް ހަވާލުކުރުމުގައި މިނިސްޓަރު އަމީން އެކި ކަންކަމުގައި އިންސްޓްރަކްޝަން ދެއްވާފައިވާކަން ފާހަގަކުރެވިފައިވާ ކަމަށެވެ.

މިނިސްޓަރު އަމީންގެ މައްޗަށް ދައުވާކުރަން އޭސީސީން އެދިފައި ވަނީ ގާނޫނޫލްއުގޫބާތުގެ 512 ވަނަ މާއްދާގެ (ހ) އާއި 513 ވަނަ މާއްދާގެ (ށ) އަދި 313 ވަނަ މާއްދާގެ (ހ) ގެ ދަށުންނެވެ. މިނިސްޓަރުގެ އިތުރުން ހެލްތު މިނިސްޓްރީގެ ޑިރެކްޓަރު ނައުޝާދު އަލީ އާއި ޑެޕިއުޓީ މިނިސްޓަރު ނިޝާމާ މުހައްމަދާއި، ބިޑް ކޮމިޓީގެ މެންބަރުން ކަމަށްވާ އައިމިނަތު ޝައުފާ އާއި ފާތިމަތު ލިމްޔާގެ މައްޗަށް ދައުވާކުރަން ވެސް އޭސީސީން ވަނީ ޕީޖީ އަށް ހުށަހަޅާފައެވެ. މި މައްސަލަ ތަހުގީގުކުރަން ފެށުމާ އެކު ބިޑް ކޮމިޓީގެ މެންބަރުން މަގާމުން ސަސްޕެންޑްކޮށްފައިވާ އިރު މިނިސްޓަރު އަމީން ހުންނެވީ އަމިއްލަފުޅަށް މަސައްކަތުން އެކަހެރިވެވަޑައިގެންނެވެ.