ޑިގްރީއާއިއެކު ވަޒީފާއެއް ނެތިފައި

ރާއްޖޭގެ އާބާދީ 5 ލައްކައިން މައްޗަށް އަރާފައިވާއިރު، ތައުލީމް ހާސިލްކޮށް މުޖްތަމައަށް ނިކުންނަ ކުދިންގެ އަދަދުވެސް އަންނަނީ އިތުރުވަމުންނެވެ. ރާއްޖޭގެ އެކި ސަރަހައްދުތަކުގައި 5 ޔުނިވަރސިޓީގެ ކެންޕަސްތައް މިހާރުވެސް އަންނަނީ ހިންގަމުންނެވެ.

މިދިޔަ އަހަރުގެ ތެރޭގައި ސަރުކާރުން ވަނީ ހިލޭ ޑިގްރީއަށް ކިޔެވޭނެ ސްކީމްއެއްވެސް ތައާރަފްކޮށްފައެވެ. މި ސްކީމްގެ ދަށުން ޔުނިވަރސިޓީގައި ކިޔަވަމުންއަންނަ ދަރުވަރުންނަށް ފުރަތަމަ ޑިގްރީއާއި ހަމައަށް ހިލޭ ކިޔެވުމުގެ ފުރުސަތު ވަނީ ފަހިވެފައެވެ. މިއީ ރާއްޖޭގައި ތައުލީމީ ޒުވާނުން އިތުރުކޮށް ޤައުމު ތަރައްޤީކުރުމުގެ ގޮތުން ސަރުކާރުން ފެށި ޕްރޮގުރާމެކެވެ.

advertisement

މި ޕްރޮގުރާމްގެ ސަބަބުން މާލީ ދަތިކަމުގެ ސަބަބުން ކުރިން ނުކިޔެވިފައިތިބި އެތައް ކުދިންނަކަށް ކިޔެވުމުގެ މަގު ފަހިވެގެންދިޔައެވެ. މީގެ ސަބަބުން ތައުލީމް ޙާސިލްކުރާ ޒުވާނުންގެ އަދަދު އިތުރުވިއެވެ. ނަމަވެސް މިހާރު އޮތް އެންމެ ބޮޑު ކަންބޮޑުވުމަކީ ކިޔަވައިގެން ނިކުންނަ ޒުވާނުންގެ އަދަދު އިތުރުވާވަރަށް ވަޒީފާގެ ފުރުސަތު ނެތުމެވެ. ވަޒީފާ ނުލިބި ގިނަ ޒުވާނުން މިއަދު މުޖްތަމައުގައި އެބަތިއްބެވެ. ތައުލީމް ހާސިލްކުރި ދާއިރާއިން ވަޒީފާ ނުލިބި އެހެން ދާއިރާތަކުން ވަޒީފާ އަދާކުރާ ޒުވާނުންވެސް މިއަދު މުޖްތަމައުގައި މަދެއްނޫނެވެ. މިކަންކަން ބަލާ މިކަމަށް ހައްލު ގެނެސްދޭނީ ކޮންބައެއް ހެއްޔެވެ.؟

ރާއްޖޭގައި ގިނަ އަދަދެއްގެ ކުންފުނިތަކެއް މިހާރުވެސް އަންނަނީ ހިންގަމުންނެވެ. ކުދި ފަންތިއާއި މެދުފަންތީގެ ވިޔަފާރިތައް ލައިގެން މިއަދަދު އަދި މާބޮޑަށް އިތުރުވެގެންދެއެވެ. ދުނިޔޭގެ ފެންވަރުގައި ފާހަގަކޮށްލެވޭ ބޮޑެތި ކުންފުނިތަކަކުންވެސް މިހާރު ރާއްޖޭގައި ވިޔަފާރި ވަނީ ފަށާފައެވެ. އެހެންކަމުން ރާއްޖޭގެ އިޤްތިޟާދުގައި ހަރަކާތްތެރިވާ ކުންފުނިތަކުގެ އަދަދު މަދެކޭ ދެންނެވޭކަށެއްނެތެވެ. ނަމަވެސް ކުންފުނިތައް އިތުރުވިނަމަވެސް ރާއްޖޭގައި ވަޒީފާނެތި ތިބި މީހުންގެ އާބާދީއަށް ބަދަލެއްނާދެއެވެ. ތައުލީމް ހާސިލްކުރުމުގެ ފުރުސަތު ފަހިވެ، ތައުލީމް ހާސިލްކޮށްގެން ނިކުންނަ ކުދިންގެ އަދަދު އިތުރުވިނަމަވެސް ވަޒީފާއެއް ހޯދުން ވެފައިވަނީ އުނދަގޫކަމަށެވެ. ވަޒީފާ ނެތިފައިތިބި ގިނަ ޒުވާނުންނަށް މިކަމަށް އަވަސް ހައްލެއް ބޭނުންވެއެވެ.