އިންޑިއާގެ ފޮރިން ސެކްރެޓަރީ އަންނަ މަހު ރާއްޖެ ވަޑައިގަންނަވަނީ

އިންޑިއާ އާއި ރާއްޖޭގެ ޚާރިޖީ ގުޅުން އިތުރަށް ބަދަހިކުރެވޭނެ ގޮތްތަކާ ބެހޭ ގޮތުން މަޝްވަރާކުރެއްވުމަށް އިންޑިއާގެ ފޮރިން ސެކްރެޓަރީ އަންނަ މަހު ރާއްޖެ ވަޑައިގަތުމަށް ހަމަޖައްސަވައިފިއެވެ.

އިންޑިއާގެ ބައެއް މީޑިއާތަކުން ރިޕޯޓްކޮށްފައިވާ ގޮތުގައި އިންޑިއާގެ ފޮރިން ސެކްރެޓަރީ ހާޝް ޝްރިންގްލާ ރާއްޖެ އަށް ކުރައްވާ ދަތުރުފުޅު ތާވަލްކޮށްފައި ވަނީ ނޮވެމްބަރު މަހުގެ 10 ވަނަ ދުވަހަށެވެ. މިއީ ކޮވިޑް-19 ގެ ބަލިމަޑުކަން ފެތުރެން ފެށި ފަހުން ގައުމުން ބޭރަށް އެމަނިކުފާނު ކުރައްވާނެ ތިން ވަނަ ދަތުރުފުޅެވެ. ކޮވިޑްގެ ތެރޭގައި މިޔަންމާ އާއި ބަންގްލަދޭޝް އަށް ވެސް އެމަނިކުފާނު ވަނީ ދަތުރުފުޅެއް ކުރައްވާފައެވެ.

advertisement

މިކަމާ ބެހޭ ގޮތުން ރާއްޖެއިން އަދި ވަކި އެއްޗެއް ހާމަކޮށްފައެއް ނުވެއެވެ. މިއީ ޝްރިންގްލާ މަގާމާ ހަވާލުވެވަޑައިގެންނެވި ފަހުން ރާއްޖެ އަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅާ ބެހޭ މާ ގިނަ މައުލޫމާތެއް މިހާތަނަށް ހާމަކޮށްފައެއް ނުވެއެވެ. ރާއްޖޭގެ ވެރިކަން ބަދަލުވި ފަހުން އިންޑިއާ އާއި ރާއްޖެއާ ދެމެދު އޮތް ގުޅުން އިތުރަށް ވަނީ ބަދަހިވެގެން ގޮސްފައެވެ. އަދި އިންޑިއާ އިން އަންނަނީ ރާއްޖޭގެ ތަރައްގީގެ ގިނަ މަޝްރޫއުތަކަކަށް ފަންޑުކުރަމުންނެވެ. އަދި ކޮވިޑް-19ގެ ސަބަބުން ކުރިމަތިވެފައިވާ އިގްތިސާދީ އަޑިގަނޑުން އަރައިގަތުމުގައި ވެސް އިންޑިއާ އިން އަންނަނީ އެހީތެރިކަން ފޯރުކޮށްދެމުންނެވެ. އެ ގޮތުން ބަޖެޓް ސަޕޯޓްގެ ގޮތުގައި އިންޑިއާ ސަރުކާރު މެދުވެރިވެގެން ސްޓޭޓް ބޭންކް އޮފް އިންޑިއާ އިން 250 މިލިއަން ޑޮލަރުގެ ލުއި ލޯނު އެހީ ވެސް ފޯރުކޮށްދީފައި ވެއެވެ. އަދި ރާއްޖޭގައި ހިންގާ ބޮޑެތި މަޝްރޫއުތަކަށް އިންޑިއާ އިން އަންނަނީ ފަންޑްކުރަމުންނެވެ. އެގޮތުން ތިލަފުއްޓާއި މާލެ ގުޅުވާލާ ގްރޭޓާ މާލެ ކަނެކްޓިވިޓީ މަޝްރޫއަށް އިންޑިއާގެ އެގްޒިމް ބޭންކުން ވަނީ 400 މިލިއަން ޑޮލަރުގެ ލޯނު ހަމަޖައްސައިދީފައެވެ. އަދި މި މަޝްރޫއަށް އިންޑިއާ ސަރުކާރުން 100 މިލިއަން ޑޮލަރުގެ ހިލޭ އެހީ ފޯރުކޮށްދެއެވެ.