ކޯވިޑް19 އިން ލިބުނު ގެއްލުމުން އަރައިގަތުމަށް އެސްއެމްއީތަކަށް 300 މިލިއަން ރުފިޔާ ދޫކޮށްފި

“ރިކަވަރީ ލޯނު ސްކީމް”ގެ ދަށުން ކުދި ފަންތިއާއި މެދުފަންތީގެ ވިޔަފާރިތަކަށް 300 މިލިއަން ރުފިޔާ ދޫކޮށްފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސް މިނިސްޓްރީން އާއްމުކޮށްފައިވާ ތަފާސް ހިސާބުތައް ދައްކާގޮތުން އެސްޑީއެފްސީ މެދުވެރިކޮށް 1815 ފަރާތަކަށް 300 މިލިއަން ރުފިޔާ ވަނީ ދޫކޮށްފައެވެ. އޭގެތެރޭގައި ހިމެނެނީ ކުދި ވިޔަފާރިއާއި މެދު ފަންތީގެ 1254 ވިޔަފާރިއަކަށް ދޫކޮށްފައިވާ 283.2 މިލިއަން ރުފިޔާއާއި އަމިއްލަ މަސައްކަތްކުރާ 561 ފަރާތަކަށް ދޫކުރި 16.8 މިލިއަން ރުފިޔާ އެވެ.

ކޯވިޑް19 ވިޔަފާރި އެހީގެ ދަށުން ކަނބަލުން ހިންގާ ވިޔަފާރިތަކަށްވެސް އެސްޑީއެފްސީން ދަނީ ލޯނު ދޫކުރަމުންނެވެ. އެގޮތުން އަމިއްލަ މަސައްކަތްކުރާ ކަނބަލުންނާއި ވިޔަފާރިތައް ހިންގާ ކަނބަލުންނަށްވެސް އެސްޑީއެފްސީން ވަނީ ލޯނު ދޫކޮށްފައެވެ. އެގޮތުން މިހާތަނަށް 532 ކަނބަލަކަށް 110.3 މިލިއަން ރުފިޔާގެ ލޯނު ވަނީ ދޫކޮށްފައެވެ.

ރިކަވަރީ ލޯނު ސްކީމްއަކީ ކޯވިޑް19އާ ގުޅިގެން ކުދި ވިޔަފާރިއާއި މެދު ފަންތީގެ ވިޔަފާރިތަކަށް ލިބިފައިވާ ގެއްލުމުން އަރައިގަތުމަށް އެސްޑީއެފްސީ މެދުވެރިކޮށް ދޫކުރާ ލޯނުތަކެކެވެ.

ރިކަވަރީ ލޯނު ސްކީމްގެ ދަށުން އެސްޑީއެފްސީން މިހާތަނަށް އެންމެ ގިނަ ލޯނު ދޫކޮށްފައިވަނީ ކޮމާސްގެ ދާއިރާއިންނެވެ. އެއީ ޖުމްލަ 184.4 މިލިއަން ރުފިޔާއެވެ. 

advertisement