އަންނަ އަހަރު 1 މިލިއަން ފަތުރުވެރިން ރާއްޖެ ގެނެވޭނެ – ޓޫރިޒަމް މިނިސްޓަރ

އަންނަ އަހަރު އެއް މިލިއަން ފަތުރުވެރިން ރާއްޖެއަށް ގެނެވޭނެކަމަށް އުންމީދުކުރައްވާކަމަށް ޓޫރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.

ޕީއެސްއެމްގެ ޕްރޮގްރާމްގައި ވާހަކަފުޅު ދައްކަވަމުން ޓޫރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވީ 750،000 ފަތުރުވެރިން އަންނަ އަހަރު ރާއްޖެއަށް ގެނެވޭނެކަމަށް ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުން ބުނެފައިވާކަމަށެވެ. ނަމަވެސް މިއަދަދު މިއަށްވުރެ އިތުރުކުރެވޭނެކަމުގެ އުންމީދު އެބައޮތްކަމަށާއި އެކަން ހާސިލްކުރެވޭނެކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، 2019 ވަނަ އަހަރު ބެޑް ނައިޓްސްގެ އަދަދު ރާއްޖޭގައި އުޅުނީ 10.5 މިލިއަނުގައިކަމަށެވެ. އެހެންކަމުން އަންނަ އަހަރުވެސް ބެޑް ނައިޓްސް 10 މިލިއަނަށްވުރެ އިތުރުވާނެކަމަށް ބެލެވޭކަމަށެވެ، މިނިސްޓަރ ވިދާޅުވީ ދުނިޔޭގެ ފަތުރުވެރިކަމުގެ ސިނާއަތް މި އޮތް ޙާލަތަށް ބަލާއިރު، އަންނަ އަހަރު ރާއްޖެއަށް 7 ލައްކަ ފަތުރުވެރިން އައުމަކީވެސް ލިބޭ ކާމިޔާބީއަކަށް ވެގެންދާނެކަމަށެވެ.

advertisement

ކޯވިޑް19 އަށްފަހު ރާއްޖޭގެ ބޯޑަތު ބަންދުކޮށްފައި އޮތުމަށްފަހު އަލުން ބޯޑަރު ހުޅުވާލީ ޖުލައި 15 ވަނަ ދުވަހުއެވެ. އެއިރު ހުޅުވާލާފައިވަނީ ރިސޯޓްތަކާއި ސަފާރީތަކެވެ. ނަމަވެސް މިމަހުގެ 15 ވަނަ ދުވަހުން މީހުން ދިރިއުޅޭ ގެސްޓަހައުސްތައްވެސް ވަކި އުސޫލްތަކެއްގެމަތިން ހުޅުވުމުގެ ހުއްދަ ޓޫރިޒަމް މިނިސްޓްރީން އަންނަނީ ދޫކުރަމުންނެވެ.

ރާއްޖޭގެ ބޯޑަރު ހުޅުވާލި ފުރަތަމަ 3 މަސްދުވަހުގެ ތެރޭގައި ރާއްޖެއަށް 27،217 ފަތުރުވެރިން ޒިޔާރަތްކޮށްފައިވާކަމަށް އިމިގްރޭޝަންގެ ތަފާސްހިސާބުތަކުން ދައްކައެވެ. ބޯޑަރު ހުޅުވާލި 2 ވަނަ މަހާއި އަޅާބަލާއިރު 3 ވަނަ މަހު ރާއްޖެ އައި ފަތުރުވެރިންގެ އަދަދު ވަނީ 56 އިންސައްތަ އިތުރުވެފައެވެ.