ފުރަތަމަ 6 ދުވަސްތެރޭ މާފުއްޓަށް 102 ފަތުރުވެރިން

ގެސްޓްހައުސްތައް ހުޅުވާލި ފުރަތަމަ 6 ދުވަހުގެ ތެރޭގައި މާފުއްޓަށް 102 ފަތުރުވެރިން އައިސްފައިވާކަމަށް އެރަށު ކައުންސިލްގެ ރައީސް ވިދާޅުވެއްޖެއެވެ.

ކޯވިޑް19 ގެ ސަބަބުން ރާއްޖޭގެ ގެސްޓްހައުސްތައް ބަންދުކޮށްފައި އޮތުމަށްފަހު އަލުން މި ސިނާއަތް ފަތުރުވެރިންނަށް ހުޅުވާލާފައިވަނީ މިމަހުގެ 15 ވަނަ ދުވަހުއެވެ. ގެސްޓްހައުސް ސިނާއަތް ހުޅުވާލުމާއިއެކު އެންމެ ފުރަތަމަ ފަތުރުވެރިންގެ ބަޔަކު އައިސްފައިވަނީވެސް މާފުއްޓަށެވެ. 

advertisement

މާފުށީ ކައުންސިލްގެ ރައީސް އުސްމާން ރަޝީދު ކުރެއްވި ޓްވިޓެއްގައި ވިދާޅުވެފައިވަނީ، މާފުށި އަލުން ލޯކަލް ޓޫރިޒަމަށް ހުޅުވާލިތާ 6 ދުވަސްތެރޭގައި 102 ފަތުރުވެރިން ޒިޔާރަތްކޮށްފައިވާކަމަށެވެ. މާފުއްޓަށް ހަޤީޤީ އުފާވެރިކަން މިއަދު ލިބެމުންދާކަމަށާއި، މީގެ ނަފާ ރައްޔިތުންނަށް ލިބެމުންދާކަން އުސްމާން ވަނީ ވިދާޅުވެފައެވެ.

މާފުށީގައި މިވަގުތު ހުޅުވައިގެން ޙިދުމަތްދެމުންދަނީ 6 ގެސްޓްހައުސްއަކުންނެވެ. އަދި ކުރިއަށްއޮތް ހަފްތާގެ ތެރޭގައި އިތުރު 5 ގެސްޓްހައުސްއެއް ހުޅުވައި ޙިދުމަތްދޭން ފެށުމަށް އަންނަނީ ތައްޔާރުވަމުންނެވެ.

ގެސްޓަހައުސް ސިނާއަތް މިމަހު އަލުން ހުޅުވާލުމާއިއެކު ރާއްޖޭގެ ހަތަރު އަތޮޅަކުން ނުވަ ރަށެއްގައި ހިންގާ 29 ގެސްޓުހައުސްއެއް އަލުން ހުޅުވުމުގެ ހުއްދަ ޓޫރިޒަމް މިނިސްޓްރީން ވަނީ ދޫކޮށްފައެވެ. އެރަށްތަކުގެ ތެރޭގައި ހނ. ފޮއްދޫ، ކ. ހުރާ، ކ. މާފުށި، ކ. ގުރައިދޫ، އއ. މަތިވެރި، އއ. އުކުޅަސްއެވެ. މީގެއިތުރުން އއ. ތޮއްޑޫ، ވ.ތިނަދޫ އަދި ވ. ފުލިދޫ އަށްވެސް ގެސްޓްހައުސް ހުޅުވުމުގެ ހުއްދަ ޓޫރިޒަމް މިނިސްޓްރީން ވަނީ ދީފައެވެ.

ގެސްޓް ހައުސްތައް އަލުން ހުޅުވުމަށް ޓޫރިޒަމް މިނިސްޓްރީން ހުއްދަދޭއިރު އެންމެ ފުރަތަމަ ކަމެއްގެ ގޮތުގައި ބަލާނީ ރަށު ފެންވަރުގައި ފުރިހަމަކުރަންޖެހޭ ކަންކަން ފުރިހަމަކޮށްފައިވޭތޯއެވެ. އެގޮތުން އެރަށެއްގައު ކަރަންޓީން ފެސިލިޓީތަކާއި، އައިސޮލޭޝަން ފެސިލިޓީތައް ހުންނަން ޖެހެއެވެ. ރަށު ފެންވަރުގައި ފުރިހަމަކުރަންޖެހޭ ކަންކަން ފުރިހަމަވުމުން އެރަށަކަށް ގެސްޓްހައުސް ހިންގުމުގެ ހުއްދަ ދެއެވެ. އަދި ގެސްޓްހައުސްތަކުން އެމީހުންގެ އެސްއޯޕީތައް ހުށައެޅުމަށްފަހު ޓޫރިޒަމް މިނިސްޓްރީން ގެސްޓްހައުސްތަކަށް ފަތުރުވެރިން އައުމުގެ ހުއްދަ ދޫކުރެއެވެ.