އިނގިރޭސިވިލާތުން ދަތުރުކުރަން ލުއިދިން ޤައުމުތަކުގެ ތެރޭގައި ރާއްޖެ ހިމެނިއްޖެ

އިނގިރޭސިވިލާތުން ދަތުރުކުރަން ލުއިދިން ޤައުމުތަކުގެ ތެރޭގައި ރާއްޖެ ހިމެނިއްޖެއެވެ.

އިނގިރޭސިވިލާތުގެ ޓްރާންސްޕޯޓް ސެކެޓްރީ ގްރާންޓް ޝެޕްސް ކުރެއްވި ޓްވީޓެއްގައި ވިދާޅުވީ ރާއްޖެ އެ ޤައުމުގެ “ޓްރެވެލް ކޮރިޑޯ” ގެ ތެރެއަށް އިތުރުކުރެވިފައިވާކަމަށެވެ. އެހެންކަމުން އަންނަ އާދިއްތަ ދުވަހުން ފެށިގެން އިނގިރޭސިވިލާތުން ރާއްޖެ އަންނަ ފަތުރުވެރިން އަނބުރާ ޤައުމަށް ދިއުމަށްފަހު 14 ދުވަހުގެ ކަރަންޓީނުގެ މުއްދަތު ހަމަކުރާކަށް ނުޖެހޭނެއެވެ. ރާއްޖޭގެ އިތުރުން އަންނަ އާދިއްތަ ދުވަހުން ފެށިގެން އިތުރު 3 ޤައުމެއްވެސް ވަނީ އިނގިރޭސިވިލާތުން ލުއިދީފައެވެ. އެއީ ކެރަރީސް، ޑެންމާކް އަދި މިކޮނޮސްއެވެ.

advertisement

އިނގިރޭސި ސަރުކާރުން އެ ގައުމުގެ ޓްރެވަލް ކޮރިޑޯ ލިސްޓުގައި ރާއްޖެ ހިމެނުމާ ގުޅިގެން ދުނިޔޭގެ އެންމެ ބޮޑު އެއް ޓުއާ އޮޕަރޭޓަރު ކުންފުނި ކަމަށްވާ ކޯނީ އިން މިއީ ބޮޑު އުފަލެއްގެ ގޮތުގައި ވަނީ ސިފަކޮށްފައެވެ.

އިނގިރޭސިވިލާތުން ޤައުމުތަކަށް ލުއިދެނީ ކޯވިޑް19 ގެ ހާލަތަށް ބެލުމަށްފަހުގައެވެ. އެ ޤައުމުން ރާއްޖެއަށް ލުއިދީފައިމިވަނީ ރާއްޖޭގައި ކޯވިޑް19 ފެތުރުން ވަރަށް ބޮޑަށް މަދުވެފައިވަނިކޮށެވެ.

ކޯވިޑް19 ގެ ފަހުން އަލުން ބޯޑަރު ހުޅުވާލުމާއިއެކު ރާއްޖެއަށް އިނގިރޭސިވިލާތުން ގިނަ އަދަދެއްގެ ފަތުރުވެރިން ވަނީ އައިސްފައެވެ. މިމަހުގެ މިހާތަނަށްވެސް އިނގިރޭސިވިލާތުން 525 ފަތުރުވެރިން ވަނީ ރާއްޖެ އައިސްފައެވެ. އިނގިރޭސިވިލާތުން ރާއްޖެއަށް ލުއިދީފައިވާއިރު އަދި ކުރިއަށްއޮތީ ރާއްޖޭގެ ފަތުރުވެރިކަމުގެ ހައި ސީޒަންކަމުން ކުރިއަށްއޮތް ދުވަސްތަކުގައި އެޤައުމުން ރާއްޖެއަށް އަންނަ ފަތުރުވެރިންގެ އަދަދު އިތުރުވާނެކަމަށް ބެލެވެއެވެ.