ފަތުރުވެރިންނަށް ޙިދުމަތްދޭ ހުރިހާ ފެސިލިޓީތަކަކަށް ސްޕްލިޓް ސްޓޭ ހުއްދަދީފި

ރާއްޖެ އަންނަ ފަތުރުވެރިން އެމީހުން ޗުއްޓީ ހޭދަކުރާ ތަން ނޫން އެހެން ތަންތަނަށް ދެވޭގޮތަށް “ސްޕްލިޓް ސްޓޭ” ހުއްދަ ޓޫރިޒަމް މިނިސްޓްރީން ދީފިއެވެ.

ޓޫރިޒަމް މިނިސްޓްރީން ވިދާޅުވީ، ރާއްޖޭގައި ފަތުރުވެރިންނަށް ޙިދުމަތްދޭ ހުރިހާ ފެސިލިޓީތަކަކަށް މިހާރު ސްޕްލިޓް ސްޓޭ ހުއްދަ ދީފައިވާކަމަށެވެ. މި ބަދަލާއިއެކު ރިސޯޓަކަށް ޗުއްޓީ ހޭދަކުރަން އަންނަ ފަތުރުވެރިއަކަށްވެސް ހޮޓެލް، ގެސްޓްހައުސް އަދި ސަފާރީއަށްވެސް ދެވޭނެއެވެ. މީގެކުރިން ޓުއަރިޒަމް މިނިސްޓްރީން ސްޕްލިޓް ސްޓޭ ހެދުމުގެ ހުއްދަ ދޫކޮށްފައިވަނީ އެއް ރިސޯޓުން އަނެއް ރިސޯޓަށް ދިއުމަށް އެކަންޏެވެ.

ޓޫރިޒަމް މިނިސްޓްރީން ވިދާޅުވީ، ހުއްދަދިން ނަމަވެސް ސްޕްލިޓް ސްޓޭއާއި ގުޅިގެން އެ މިނިސްޓްރީން ކަނޑައަޅާފައިވާ ގައިޑްލައިންއަށް އަމަލުކޮށް ކުރިއާލާ ހުއްދަ ނަގަންޖެހޭނެކަމަށެވެ.

ކޯވިޑް19 އަށްފަހު ރާއްޖޭގެ ރިސޯޓްތަކާއި ސަފާރީތަކުން އަލުން ފަތުރުވެރިންނަށް ޙިދުމަތްދޭން ފަށާފައިވަނީ ޖުލައިމަހުގެ 15 ވަނަ ދުވަހުއެވެ. އަދި ގެސްޓްހައުސްތައް ހުޅުވާފައިވަނީ މިމަހުގެ 15 ވަނަ ދުވަހުއެވެ.

advertisement