ޒުވާނުންނާއި ގުޅުވައިގެން ޢައްސާން ވިދާޅުވި ވާހަކައަށް އަނދުން ހުސައިންގެ ވަރުގަދަ ރައްދެއް

ޒުވާނުންގެ ރައްކާތެރިކަމާއި ގުޅިގެން ޣައްސާން މައުމޫން ދެއްކެވި ވާހަކައަށް ހެންވޭރު ދެކުނު ދާއިރާގެ މެމްބަރ ހުސެއިން ޝަހީމް (އަނދުން ހުސެއިން) ވަރުގަދަ ރައްދެއް ދެއްވައިފިއެވެ.

‘ވިސްލް ބްލޯވަރ’ ގާނޫނުގެ ދަށުން ރައްކާތެރިކަން ލިބެންޖެހޭ ކޮރަޕްޝަން ފަދަ މައްސަލަތައް ފަޅާ އަރުވާލާ ޒުވާނުން ރައްކާތެރި ކުރުމުގައި މި ސަރުކާރުން ފެއިލް ވެފައިވާ ކަމަށް ޢައްސާން ވަނީ ޓްވީޓް ކުރައްވާފައެވެ. އަދި ޒުވާނުންގެ ދުވަހު ޒުވާނުންނަށް ދޭ މެސެޖަކީ މިއީތޯ ޢައްސާންގެ ޓްވިޓުގައި ވަނީ ސުވާލުއުފައްދާފައެވެ.

advertisement

ޢައްސާންގެ ޓްވިޓަށް ރައްދުދެއްވައި އަނދުން ހުސައިން ވަނީ ފޮޓޯތަކެއް ހިއްސާކުރައްވައި އެ ފޮޓޯތައް މީގެކުރިން ފެނުނުތޯ ޢައްސާންއަށް ވަނީ ސުވާލުކޮށްފައެވެ. އެއީ ރައީސް މައުމޫންގެ ވެރިކަމުގައި ޖަލުގައި މަރަން އޯޑަރުދިން މީހުންގެ ފޮޓޯތަކެއް ކަމަށް އަނދުން ހުސައިންގެ ޓްވިޓްގައި ވަނީ ވިދާޅުވެފައެވެ.

އަނދުން ހުސައިންގެ އެ ޓްވިޓް ޢައްސާން ވަނީ ދޮގުކުރައްވާފައެވެ. ޢައްސާން ވިދާޅުވީ، މިއީ އެމްޑީޕީން ރާއްޖޭގައި ވެރިކަން ކުރާ ދެވަނަ ފަހަރު ކަމަށެވެ. ރައީސް މައުމޫންގެ މައްޗަށް ކުރެވޭ ތުހުމަތުތައް ތެދު ކަމަށްވާ ނަމަ، ގާނޫނީ ފިޔަވަޅު ނާޅުއްވާނީ ކީއްވެގެންތޯ ޢައްސާން ވަނީ ސުވާލު އުފައްދަވާފައެވެ.

ޢައްސާންގެ މި ޓްވިޓަށް ރައްދުދެއްވައި އަނދުން ހުސައިން ވަނީ ޖަލުގައި އަނިޔާވެރި ކޮށް މަރާލާފައިވާ އީވާން ނަސީމްގެ މައްސަލައާއި ގުޅިގެން ރައީސް މައުމޫން ދެއްކެވި ވާހަކަފުޅު ޓުވީޓު މެދުވެރިކޮށް ހިއްސާ ކުރައްވާފައެވެ.