ޗައިނާގެ ފަތުރުވެރިން ރާއްޖެ އައުމުގެ ހުއްދަ އަންނަ މަހު ދެނީ

ޗައިނާގެ ރައްޔިތުންނަށް ދަތުރުކުރެވޭ ގައުމުތަކުގެ ތެރޭގައި ރާއްޖެ ހިމެނުމުގެ މަޝްވަރާތައް މިހާރު ކުރެވެމުންދާ އިރު މި ހުއްދަ އަންނަ މަހުގެ ތެރޭގައި ހުއްދަ ދޭނެކަން ކަށަވަރުވެއްޖެއެވެ.

ވެލާނާ އިންޓަނޭޝަނަލް އެއާޕޯޓް ހިންގަމުން އަންނަ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިހާރު އާންމުކޮށްފައިވާ ޝެޑިއުލްގައިވާ ގޮތުން އަންނަ މަހުގެ ތެރޭގައި ޗައިނާގެ ސަރަހައްދުތަކުން ދަތުރުތައް ފެށުމަށް އެއާލައިންތަކުން ވަނީ ތާވަލްކޮށްފައެވެ. އެ ގޮތުން ރާއްޖެ އަށް ގިނަ އަދަދެއްގެ ޓުއަރިސްޓުން އަންނަ ޗައިނާގެ ގުއަންޒޯ އިން އަންނަ މަހުގެ 29 ވަނަ ދުވަހު ޗައިނާ ސަދަން އެއާލައިންގެ ފްލައިޓެއް ދަތުރުކުރުމަށް ތާވަލްކޮށްފައި ވެއެވެ.

advertisement

މީގެ އިތުރުން ޑިސެމްބަރު މަހުގެ ތެރޭގައި ޗައިނާގެ އިތުރު ސަރަހައްދުތަކުން އަންނަ ފްލައިޓްތައް ވަނީ ތާވަލްކޮށްފައެވެ. އެ ގޮތުން ވެރިރަށް ބެއިޖިން އިން ވެސް ފްލައިޓްތަކެއް ރާއްޖެ އަށް ތާވަލްކޮށްފައި ވެއެވެ.

ކޮވިޑްގެ ހާލަތު ކުރިމަތިވެ ރާއްޖޭގެ ބޯޑަރު ބަންދުކުރުމާ ހަމައަށް އެންމެ ގިނައިން ރާއްޖެ އަށް ޓުއަރިސްޓުން އަންނަ ގައުމަކަށް އޮތީ ޗައިނާއެވެ. ޗައިނާގެ ދަތުރުތައް ބައެއް އެހެން ގައުމުތަކަށް މިހާރު ފަށާފައިވީ ނަމަވެސް ރާއްޖޭގައި އަދިވެސް ކޮވިޑް ފެތުރެމުން ދާތީ ޗައިނާ އިން ރާއްޖޭގެ ހާލަތު އަންނަނީ ރިވިއުކުރަމުންނެވެ.

ޗައިނާގެ އިތުރުން ރާއްޖެ އަށް ޓުއަރިސްޓުން ގިނަ އަދަދަކަށް އަންނަ ބައެއް ގައުމުތަކުން މިހާރު ވަނީ ރާއްޖެ އަށް ދަތުރުކުރުމުގެ ހުއްދަ ދީފައެވެ. އެ ގޮތުން އިނގިރޭސި ވިލާތް ވެސް ހިމެނެއެވެ.

ޖުލައި 15ގައި ބޯޑަރު ހުޅުވާލުމަށް ފަހު ސަރުކާރުގެ މިހާރުގެ އަމާޒަކީ އެ ހިސާބުން ފެށިގެން އަހަރު ނިމޭ އިރު 120،000 ފަތުރުވެރިން ރާއްޖެ ގެނައުމެވެ. އެވްރެޖްކޮށް މިހާރު ވެސް ރާއްޖެ އަށް ދުވާލެއްގެ މައްޗަށް 1،000 އަށް ވުރެ ގިނަ ޓުއަރިސްޓުން އާދެއެވެ. އަދި ރާއްޖެ އަށް ދަތުރުކުރާ ފްލައިޓްތަކުގެ އަދަދު ވެސް އަންނަނީ އިތުރުވަމުންނެވެ. ބެލެވޭ ގޮތުގައި ޑިސެމްބަރު މަހު އަންނަ ކްރިސްމަސް އާއި އާ އަހަރުގެ ޗުއްޓީއާ ދިމާކޮށް ގިނަ އަދަދެއްގެ ބުކިންގްސް މިހާރު ވެސް އަންނަނީ ލިބެމުންނެވެ.

މީގެ އިތުރުން މި މަހުގެ ތެރޭގައި ސަރުކާރުން ވަނީ މާލެ ސަރަހައްދު ފިޔަވައި އެހެން ސަރަހައްދުތަކުގެ ގެސްޓްހައުސްތަކަށް ހުއްދަ ދީފައެވެ. އަދި އަންނަ މަހުގެ ތެރޭގައި މާލެ ސަރަހައްދަށް ހުއްދަ ދިނުމަށް އަންނަނީ ތައްޔާރުވަމުންނެވެ. އެހެންކަމުން އިތުރު މާކެޓްތައް ވެސް ހުޅުވިގެންދާނެއެވެ.

މިދިޔަ އަހަރުގެ ތެރޭގައި ރާއްޖެ އަށް 1.7 މިލިއަން ޓުއަރިސްޓުން އައިސްފައިވާ އިރު ކޮވިޑް-19އާ ގުޅުގެން ބޯޑަރު ބަންދުކުރުމާ ހަމައަށް ރާއްޖެ އަންނަ ޓުއަރިސްޓުންގެ އަދަދު އައީ ވަރަށް ބޮޑަށް އިތުރުވަމުންނެވެ. ބޯޑަރު ބަންދުކުރުމާ ހަމައަށް 380،000 އަށް ވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައި ވެއެވެ.