މަހިބަދޫ މޫދުކޮށީގައި ބޮޑުކުރި ފާނަތައް ނެދަލޭންޑަށް ފޮނުވަނީ
25 އޮކްޓޯބަރ 2020 - 12:40
ރާއްޖޭގައި ކަސް ފާނަ އާލާކުރުމުގެ
މަޝްރޫޢުގެ ދަށުން އދ. މަހިބަދޫގައި އާލާކުރި ފާނަތައް ނެދަލޭންޑްއަށް ފޮނުވަން
ތައްޔާރުވެއްޖެއެވެ.
ނެދަލޭންޑަށް ފޮނުވަން ތައްޔާރުކޮށްފައިވާ ފާނައިގެ
ޝިޕްމަންޓަކީ ރާއްޖޭގައި މުޅިން އަލަށް ކުރިއަށްގެންދާ ކަސް ފާނަ އާލާކުރުމުގެ
މަޝްރޫޢުގެ ދަށުން މަހިބަދޫގައި އާލާކުރި ފާނަތަކެކެވެ.
މޫދުކޮށީގައި ފާނަ ބޮޑުކުރުމުގެ މަޝްރޫޢަކީ ވޯލްޑް ބޭންކުގެ ހިލޭ އެހީގައި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގެ ފަރާތުން ހިންގި ސަސްޓެއިނަބަލް ފިޝަރީޒް ރިސޯސަސް ޑިވެލޮޕްމަންޓް ޕްރޮޖެކްޓެކެވެ.
ފިޝަރީޒް މިނިސްޓްރީގެ ފަރާތުން ކުރިއަށްގެންދިޔަ މަޝްރޫޢުގެ ދަށުން އާލާކޮށްފައިވާ ފާނަ އެކްސްޕޯޓްކުރުމާ ގުޅޭގޮތުން ފިޝަރީޒް މިނިސްޓަރ ޒަހާ ވަޙީދު ވިދާޅުވީ މަހިބަދޫގައި އާލާކޮށްފައިވާ ފާނަ އެކްސްޕޯޓްކުރަނީ ނެދަލެންޑްގެ ވެރިރަށް އެމްސްޓެޑަމްއަށްކަމަށެވެ. މިއީ ލިބޭ ވަރަށް ބޮޑު ހިތްހަމަޖެހުމެއްކަން ފާހަގަކުރައްވައި މިނިސްޓަރ ވިދާޅުވީ، މިއީ ރާއްޖޭގައި ކުރިއަށްގެންދޭނެ، އަދި މިކަމުން ރަނގަޅު ނަފާއެއް ލިބޭނެ މަސައްކަތެއްކަން ޔަޤީންވާކަމަށެވެ.
މޫދުކޮށީގައި ފާނަބޮޑުކުރުމުގެ މަޝްރޫގެ ދަށުން އދ. މަހިބަދޫ، އޮމަދޫ، ދިގުރަށް އަދި ދަނގެއްޗަށް އަމާޒުކޮށްގެން، ފާނަ ބޮޑުކުރުމުގެ މަސައްކަތްތައް އެ މިނިސްޓްރީން ވަނީ މިއަހަރުގެ ޖަނަވަރީ މަހުން ފެށިގެން ފަށާފައެވެ. މި 4 ރަށުގެ 19 ގޭބީސީއަކަށް މަޝްރޫޢުގެ ޚަރަދުގައި ކުދި ފާނައާއި، ކޮށްޓާއި، މަސްކާނާ ދަނީ ހަވާލުކުރަމުންނެވެ. މިހާތަނަށް ފާނަ ދޫކޮށްފައި ވަނީ މަހިބަދޫއާއި އޮމަދޫން ހޮވާލެވުނު ޖުމްލަ 11 ފަރާތަކަށެވެ.