އައްޑޫ ފްލައިން ސްކޫލްއިން ދަރިވަރުން ވަކިކުރުން މަޑުޖައްސާލައިފި

އައްޑޫ ސިޓީގައި ހިންގަމުންދާ ފްލައިން ސްކޫލް އިން ދަރިވަރުން ވަކިކުރި ނިންމުމަށް އަމަލުކުރުން މަޑުޖައްސާލައިފިއެވެ.

ފްލައިން ސްކޫލްގެ ކޯސް ފުރިހަމަ ނުކުރެވި ކޯސް ދިގުދަންމާލަމުންދާތީ އެ ސްކޫލްގެ ދަރިވަރުންތަކެއް ހަޔާ އެޑިއުކޭޝަން މިނިސްޓްރީއަށް ވަނީ ޕެޓިޝަނެއް ހުށައަޅާފައެވެ. މި މައްސަލައިގައި ފަސް ދަރިވަރަކު އިއްޔެ ވަނީ ވަކިކޮށްފައެވެ.

advertisement

ކޯހުން ދަރިވަރުން ވަކިކުރި ސަބަބެއްކަމަށް ބުނެފައިވަނީ ކޯހުގެ މުއްދަތު ފަހަނަ އަޅާ ދިޔައިރުވެސް ކޯސް ނިމިފައިނުވުމާއި ކިޔެވުމަށް ފަރުވާކުޑަވުމުގެ ސަބަބުން ކަމަށެވެ.

އައްޑޫ ފްލައިން ސްކޫލްއިން އަލުން ދަރިވަރުންނަށް ފޮނުވި ސިޓީގައި ބުނީ ފްލައިން ސްކޫލުން ވަކިކުރި މައްސަލައިގެ ނިންމުމަށް އަމަލުކުރުން މަޑުޖައްސާލައިފައިވާ ކަމަށެވެ. އަދި އެ މައްސަލަ ރިވިއު ކޮމެޓީއިން މިހާރު ބަލަމުންދާކަމަށެވެ.

ދަރިވަރުން ވަކިކުރި ނިންމުން ބަދަލުކުރުމަށް ޓްރާންސްޕޯޓް މިނިސްޓްރީއިންވެސް ވަނީ އެ ސްކޫލަށް އަންގައިފައެވެ.

ދަރިވަރުންނަށް ދިމާވެފައިވާ ދަތިތަކަށް ހައްލެއް ހޯދައި ދިނުމުގެ ގޮތުން އެ އެކެޑެމީގައި ކިޔަވާ ދަރިވަރުންގެ ލޯންތައް ދެއްކުން ހަޔާ އެޑިއުކޭޝަން މިނިސްޓްރީން މިހާރު ވަނީ ކޯސް ނިންމާތާ ހަ މަސް ދުވަހަށް ފަސް ކޮށްދީފައެވެ.