އިދިކޮޅު ކޯލިޝަނުން ހޯމް މިނިސްޓަރުގެ އިތުބާރުނެތްކަމުގެ މައްސަލަ މަޖިލީހަށް ހުށައަޅަނީ

ހޯމް މިނިސްޓަރު އިމްރާން އަބްދުﷲގެ އިތުބާރު ނެތް މައްސަލަ ރައްޔިތުންނަށް މަޖިލީހަށް ވެއްދުމުގެ މަސައްކަތް އިދިކޮޅު ޕްރޮގްރެސިވް ކޯލިޝަނުން ފަށައިފި އެވެ.

މިނިސްޓަރ އިމްރާންގެ އިތުބާރުނެތްކަމުގެ މައްސަލަ އިދިކޮޅު ކޯލިޝަނުން ހުށައަޅަނީ 3 މައްސަލައަކާއި ގުޅިގެންނެވެ. އެއީ ހުޅުމާލޭ ފަޅުތެރޭގައި އޮތް ސަފާރީއެއްގައި ކެންޔާ އަންހެނަކަށް ޖިންސީ ގޯނާކުރި މައްސަލަ އާއި ޑރ. އަފްރާޝިމް އަލީ އަވަހަރާކޮށްލުން އަދި ނޫސްވެރިޔާ އަހުމަދު ރިލްވާން ވަގަށް ނެގި މައްސަލާގައި އިމްރާން ދައްކަވާފައިވާ ވާހަކަތަކާއި ގުޅިގެންނެވެ.

advertisement

ޕީޕީއެމް އަދި ޕީއެންސީގައި ހިމެނިވަޑައިގަންނަވަނީ ރައްޔިތުންގެ މަޖިލީހުގެ ނުވަ މެންބަރުންނެވެ. މަޖިލީހަށް ވަޒީރެއްގެ އިތުބާރު ނެތް ކަމުގެ މައްސަލަ ހުށައަޅަން ބޭނުންވަނީ 10 މެންބަރެއްގެ ސޮޔެވެ. އެހެންކަމުން މިހަރު އިދިކޮޅު ކޯލިޝަނުން މަސައްކަތްކުރަނީ މެންބަރުންގެ ސޮއެ ހޯދުމަށެވެ.

ދިވެހިރާއްޖޭގެ އަޑުން ގެނެސްދިން ޕްރޮގުރާމެއްގައި ވާހަކަދައްކަވަމުން މިނިސްޓަރ އިމްރާން ވިދާޅުވީ ސަފާރީގައި ހިނގީ އާންމުންގެ ތެރޭގައި ހުރެ ވެސް މީހަކު ކޮށްފާނެ ކަހަލަ ކަމެއް ކަމަށާއި، އާންމުންގެ ތެރޭގައި ދެކެވޭކަހަލަ ބޮޑު ރޭޕްކޭސްއެއް މި މައްސަލައިގައި ނެތްކަމަށެވެ.

ދިވެހިރާއްޖޭގެ އަޑުގައި އިމްރާން ދެއްކެވި ވާހަކައިގެ ސަބަބުން މީޑިއާގައި ދައުރުވަމުންދާ ވާހަކަތަކާއި ގުޅިގެން ފަހުން މިނިސްޓަރ ކުރެއްވި ޓްވިޓެއްގައި ވިދާޅުވެފައިވަނީ އަންހެނަކަށް ޖިންސީ އަނިޔާއެއް ނުވަތަ ފުރައްސާރައެއް ކުރުމަކީ ކުޑަކަމެއްނޫންކަމަށާއި އެއީ ބޮޑުކަމެއްކަމަށެވެ. އެއީ ކުޑަކަމެއްކަމަށް ބުނެފައި ނޯންނާނެކަމަށެވެ. މީޑިއާގައި ފަތުރަމުންދާ ބައެއް ވާހަކަތަކުން މާނައޮޅޭކަމަށްވެސް އިމްރާންގެ ޓްވިޓުގައި ވަނީ ބުނެފައެވެ.