ރާއްޖެއަށް އައި ފަތުރުވެރިންގެ އަދަދު 31000 އަށްވުރެ މައްޗަށް އަރައިފި

ރާއްޖެއަށް އައި ފަތުރުވެރިންގެ އަދަދު 31000 އަށްވުރެ މައްޗަށް އަރައިފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ޖުލައިމަހު ރާއްޖެއަށް 1752 ފަތުރުވެރިން ވަނީ އައިސްފައެވެ. އޮގަސްޓް މަހު އައި 7628 ފަތުރުވެރިން، ސެޕްޓެމްބަރ މަހު އައި 9538 ފަތުރުވެރިން އަދި އޮކްޓޯބަރ މަހުގެ 21 ގެ ނިޔަލަށް ރާއްޖެއައި 12،934 ފަތުރުވެރިން ވަނީ އައިސްފައެވެ. މިއާއިއެކު ޖުލައި 15 އިން މިމަހުގެ 21 ގެ ނިޔަލަށް 31،852 ފަތުރުވެރިން ރާއްޖެ އައިސްފައިވާކަމަށް ތަފާސްހިސާބުތަކުން ދައްކައެވެ.

advertisement

އޮކްޓޯބަރ މަހު ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ ރަޝިއާއިންނެވެ. އެ ޤައުމުން 6026 ފަތުރުވެރިން ވަނީ ރާއްޖެ އައިސްފައެވެ. 2 ވަނައަށް އެންމެ ގިނައިން ފަތުރުވެރިން ރާއްޖެއައީ ޔޫއޭއީ އިންނެވެ. އެއީ 3377 ފަތުރުވެރިންނެވެ. 2795 ފަތުރުވެރިންނާއިއެކު 3 ވަނައިގައި އުޅެނީ އެމެރިކާއެވެ. މި 3 ޤައުމުގެ އިތުރުން ދެން އެންމެ ގިނައިން ރާއްޖެއަށް ފަތުރުވެރިން އައި ޤައުމުގެ ތެރޭގައި ހިމެނެނީ އިނގިރޭސިވިލާތް، ސްޕެއިން، ޖަރުމަނުވިލާތް، ފްރާންސް، ޔޫކްރެއިން، ބްރެޒިލް އަދި އިންޑިއާއެވެ.

ޖުލައިމަހު އެވްރެޖްކޮށް ދުވާލެއްގެ މައްޗަށް ރާއްޖެ އައިސްފައިވަނީ 117 ފަތުރުވެރިންނެވެ. ނަމަވެސް އޮކްޓޯބަރ މަހު އެވްރެޖްކޮށް ދުވާލެއްގެ މައްޗަށް 616 ފަތުރުވެރިން އަންނަކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. އެހެންކަމުން މަހަކުން މަހަކަށް ރާއްޖެ އަންނަ ފަތުރުވެރިންގެ އަދަދު އަންނަނީ އިތުރުވަމުންނެވެ.