ވީއައިއޭއަށް އަންނަ ޕްރައިވެޓް ޖެޓްތަކުގެ އަދަދު އިތުރުވާން ފަށައިފި

ވެލާނާ އިންޓަނޭޝަނަލް އެއަރޕޯޓަށް އަންނަ ޕްރައިވެޓް ޖެޓްތަކުގެ އަދަދު އިތުރުވާންފަށަފައިވާކަމަށް އެމްއޭސީއެލްއިން ވިދާޅުވެއްޖެއެވެ.

ފާއިތުވި ހަތަރު މަސް ތެރޭ ވީއައިއޭ އަށް އައިސްފައިވާ ޕްރައިވެޓް ޖެޓުތަކުގެ އަދަދު މަހުން މަހަށް އަންނަނީ އިތުރުވަމުންނެވެ. އެމްއޭސީއެލްގެ ތަފާސް ހިސާބުތަކަށް ބަލާއިރު ޖުލައި މަހު 28 ޕްރައިވެޓް ޖެޓު އައިސްފައިވާއިރު، އޮގަސްޓުމަހު 59 ޖެޓް ވަނީ އައިސްފައެވެ. ސެޕްޓެމްބަރު މަހު 60 ޕްރައިވެޓް ޖެޓު އައި އިރު މިމަހުގެ މިހާތަނަށް 126 ޖެޓް އައިސްފައިވާކަމަށް އެމްއޭސީއެލްގެ ތަފާސްހިސާބުތަކުން ދައްކައެވެ. މިމަހުގެ މިހާތަނަށް އަދި ޕްރައިވެޓް ޖެޓްތަކުގެ އަދަދަކީ މިދިޔަ މަހާ އަޅާ ބަލާއިރު 110 އިންސައްތަ އިތުރު އަދަދެކެވެ.

ވެލާނާ އިންޓަރނޭޝަނަލް އެއަރޕޯޓު، ވީއައިއޭ މެނޭޖުކުރާ އެމްއޭސީލުން ހާމަކުރާގޮތުގައި މި އަދަދަކީ އެހެން އަހަރުތަކުގެ މި މުއްދަތާއި އަޅާ ބަލާއިރު މަދު އަދަދެއް ނަމަވެސް ރާއްޖެއަށް ޖެޓުތަކުގެ އަދަދު ރަނގަޅު މިންވަރަކަށް އިތުރުވަމުންދާ ކަމަށެވެ. ކުރިއަށް އޮތް ޑިސެމްބަރުމަހުގެ ފަހުކޮޅު އެއަރޕޯޓަށް ގިނަ އަދަދެއްގެ ޕްރައިވެޓު ޖެޓުތައް އަންނާނެ ކަމަށް އެމްއޭސީއެލްއިން ވަނީ ލަފާކޮށްފައެވެ.

advertisement