ލުފްތަންސާގެ ދަތުރުތައް މިއަދު ރާއްޖެއަށް ފަށައިފި

ޖަރުމަނުވިލާތުގެ ލުފްތަންސާ އެއަރލައިނުން ރާއްޖެއަށް މިއަދު ދަތުރުތައް ފަށައިފިއެވެ.

ޖަރުމަނުވިލާތުގެ ލުފްތަންސާ އެއަރލައިނުން ރާއްޖެއަށް ދަތުރުތައް އަލުން ފަށައި އެ އެއަރލައިންގެ ފުރަތަމަ މަތިންދާބޯޓު ވީއައިއޭގައި ޖައްސާފައިވަނީ މިއަދު ހެނދުނުއެވެ. ލުފްތަންސާއިން ރާއްޖެއަށް ކުރާ ދަތުރުތައް ކުރާނީ ޖަރުމަންވިލާތުގެ ފްރެންކްފަރޓް އިން ވެލާނާ އިންޓަނޭޝަނަލް އެއަރޕޯޓަށެވެ.

advertisement

ރާއްޖެއަށް އެ އެއަރލައިންގެ ދަތުރުތައް އަލުން ފަށާއިރު ހަފްތާއަކު 2 ފްލައިޓް ބޭއްވުމަށް ވަނީ ނިންމާފައެވެ. އެއީ ކޮންމެ ހަފްތާއެއްގެވެސް ބުދަ އަދި އާދިއްތަ ދުވަހުއެވެ.

ލުފްތަންސާއިން ބުނީ އެ އެއަރލައިންގެ ބޭނުމަކީ ފަތުރުވެރިކަމަށް އަލުން މަގު ހުޅުވައިދިނުންކަމަށެވެ. އެގޮތުން އެ އެއަރލައިނުން ދަނީ ދަތުރުތައް މެދުކަނޑާލާފައިވާ ގިނަ މަންޒިލްތަކަކަށް އަލުން ދަތުރުތައް ފަށަމުންނެވެ.

ރާއްޖެ ހިމެނޭގޮތުން އެ އެއަރލައިނުން 6 މަންޒިލަކަށް ދަތުރު ފެށުމަށް ހަމަޖެހިފައިވާކަން އެ އެއަރލައިނުން މީގެކުރިން ވަނީ ހާމަކޮށްފައެވެ. އަދި އެމަންޒިލްތަކަށް ބުކިން ހެއްދުމުގެ ފުރުސަތުވެސް ހުޅުވާލިއެވެ.

ލުފްތަންސާއިން ރާއްޖެއަށް ދަތުރުތައް ފެށުމާއިއެކު ކޯވިޑް19 އަށްފަހު ރާއްޖެއަށް ދަތުރުފެށި އެއަރލައިންގެ އަދަދު މިވަނީ 14 އަށް އަރާފައެވެ.