އަންނަ އަހަރު ރާއްޖޭގެ މަޤްބޫލުކަން އިތުރުވެ ފަތުރުވެރިކަން ރަނގަޅުވާނެ – ފޯބްސް

އަންނަ އަހަރު ރާއްޖޭގެ ޓޫރިޒަމް ރަނގަޅުވެ ފަތުރުވެރިންގެ މަގުބޫލުކަން އިތުރުވެގެންދާނެކަމަށް މަޝްހޫރު ވިޔަފާރި މަޖައްލާ “ފޯބްސް” އިން ބުނެފި އެވެ.

ފޯބްސް މަޖައްލާއިން ވަނީ 2021 ވަނަ އަހަރު  ދުނިޔޭގައި ދަތުރު ކުރުމަށް އެންމެ ރަނގަޅު 20 މަންޒިލެއް ހޮވާފައެވެ. މި ލިސްޓުގެ 14 ވަނައިގައި ހިމަނާފައިވަނީ ދިވެހިރާއްޖެއެވެ. އެ ލިސްޓަށް ގައުމުތައް ހޮވީ ފަތުރުވެރިކަމުގެ ތަޖްރިބާކާރެއް ކަމަށްވާ ޖޫލީ ޑެންޒިގާ އެވެ. ޖޫލީ އަކީ އެމެރިކާގެ އެންމެ ބޮޑު އެއް ޓްރެވަލް އެޖެންސީ ކަމަށްވާ “އެމްބާކްބިޔޯންޑް”ގެ ކޯ ފައުންޑާ އެވެ.

advertisement

ޖޫލީ ވިދާޅުވި ގޮތުގައި ރާއްޖެއަށް ގިނަ ބަޔަކު އަންނާނެ ކަމަށް ލަފާކުރެވެނީ ރާއްޖެ އިން އެމެރިކާއާ އެކު މަޝްވަރާކޮށްފައިވާ ކަންކަމުގެ އިތުރުން ރާއްޖޭގައި ހުޅުވާ އާ ހޮޓަލްތަކުގެ ސަބަބުންނެވެ. އަދި އަންނަ އަހަރު ރާއްޖޭގެ ޓޫރިޒަމަށް ވަރަށް ބޮޑު ކުރިއެރުމެއް އަންނާނެ ކަމަށް ވެސް އޭނާ ވަނީ ލަފާކޮށްފައެވެ.

ރާއްޖެ އަކީ އެހެން ގައުމުތަކާ ޚިލާފަށް ގުދުރަތީ ގޮތުން، ވަކި ރަށްތަކެއްގައި ރިސޯޓް ހިންގާ ގައުމަކަށް ވުމުން އޮތް ރައްކާތެރިކަން ވެސް ފޯބްސް އިން ފާހަގަކޮށްފައިވެއެވެ. މިއީ ރާއްޖެއަށް އަންނަ ފަތުރުވެރިންގެ އަދަދު އިތުރުވެ ފަތުރުވެރިންނަށް ހިތްހަމަޖެހި ޗުއްޓީ ހޭދަ ކުރެވޭނެ ސަބަބެއް ކަމަށް ފޯބްސްއިން ވަނީ ބުނެފަ އެވެ.

ރާއްޖޭގެ ބޯޑަރު އަލުން ހުޅުވާލުމާއިއެކު މިވީ ކުޑަ ދުވަސްކޮޅުގެ ތެރޭގައިވެސް ރާއްޖެ އަންނަ ފަތުރުވެރިންގެ އަދަދު އަންނަނީ އިތުރުވަމުންނެވެ. ރާއްޖެއަންނަ ފަތުރުވެރިންގެ ސަލާމަތާއި ރައްކާތެރިކަމަށް ސަރުކާރުން ގިނަ ފިޔަވަޅުތަކެއްވެސް ދަނީ އަޅުއްވަމުންނެވެ.