ސްކޫލްތަކަށް ކުދިން ވެއްދުމަށް ހާއްސަ ޕޯޓަލްއެއް އިފްތިތާހްކޮށްފި

މާލޭގެ ސްކޫލްތަކަށް ދަރިވަރުން ވެއްދުން ފަސޭހަކުރުމަށް ހާއްސަ ޕޯޓަލްއެއް އެޑިއުކޭޝަން މިނިސްޓްރީން އިފްތިތާހްކޮށްފިއެވެ.

އެޑިއުކޭޝަން މިނިސްޓްރީން ބުނީ މި ޕޯޓަލް މެދުވެރިކޮށް މާލެ ސަރަހައްދުގެ ސްކޫލްތަކަށް ދަރިވަރުން ވެއްދުމާއި އެއް ސްކޫލުން އަނެއް ސްކޫލަށް ބަދަލުކުރުމަށް ފޯމާއި ލިޔެކިޔުންތައް ހުށަހެޅޭނެ ކަމަށެވެ.

advertisement

އެ މިނިސްޓްރީން ބުނީ އޮންލައިންކޮށް ފޯމް ހުށަހެޅުމުން ބެލެނިވެރިންގެ ފޯނަށް ފޯމް ހުށަހެޅިކަމުގެ ސްލިޕް ލިބިގެނދާނެ ކަމަށެވެ.

މި ބަދަލާ އެކު ބެލެނިވެރިންނަށް ގިނަ ފަސޭހަތަކެއް ލިބިގެންދާނެ ކަމަށާއި ފޯމާ ގުޅޭ ލިޔެކިޔުންތައް ވެސް އޮންލައިންކޮށް ހުށަހެޅޭތީ ފުރުސަތު ލިބޭ ސްކޫލްތަކަށް އިތުރު ލިޔެކިޔުންތައް ހުށަނާޅައި ފަސޭހަކަމާ އެކު މި ކަން ހަމަޖެހިގެންދާނެ ކަމަށް އެޑިއުކޭޝަން މިނިސްޓްރީން ބުންޏެވެ. މީގެ އިތުރުން މި ޕޯޓަލް މެދުވެރިކޮށް ޝަކުވާ ހުށަހެޅުމުގެ ފުރުސަތު ވެސް ވަނީ ތަނަވަސްކޮށްދީފައެވެ.

ކޮވިޑް-19އާ ގުޅިގެން މާލޭގެ ސްކޫލްތައް ގިނަ ދުވަސްތަކެއް ވަންދެން ބަންދުކޮށްފައި އޮތުމަށް ފަހު ދާދި ފަހުން ހުޅުވާލާފައިވާ އިރު މި ވަގުތު ކިޔަވައިދެނީ ވަކި ގްރޭޑްތަކަކަށެވެ. ދަށް ގްރޭޑްތަކުގެ ދަރިވަރުންނަށް މި އަހަރު ކިޔަވައިދޭން ފެށޭނެ ކަމަކަށް ނުބެލެވެއެވެ. އަނެއްކޮޅުން އަންނަ އަހަރުގެ ކިޔެވުން ފެށޭނީ އަހަރުގެ މެދުތެރެއިން ކަމަށް ބެލެވެއެވެ.