ޕޮމްޕެއޯ މަސައްކަތްކުރައްވަނީ ރާއްޖެ އާއި ޗައިނާ ޖައްސަން: ޗައިނާ

އެމެރިކާގެ ސެކްރެޓަރީ އޮފް ސްޓޭޓް މައިކް ޕެމްޕެއޯ މަސައްކަތްކުރައްވަނީ ރާއްޖެ އާއި ޗައިނާއާ ޖައްސަން ކަމަށް ޗައިނާ އިން ބުނެފިއެވެ.

ޕޮމްޕެއޯ ރާއްޖެ އަށް ކުރެއްވި ދަތުރުފުޅުގައި ޗައިނާއާ ބެހޭ ގޮތުން ދެއްކެވި ވާހަކަތަކަށް ރައްދު ދެއްވައި ޗައިނާގެ އެމްބަސީން ނެރުނު ބަޔާނެއްގައި ބުނެފައި ވަނީ ޗައިނާއާ ބެހޭ ގޮތުން ޕޮމްޕެއޯ ފެތުރުއްވީ ދޮގު ބުހުތާނު ވާހަކަތަކެއް ކަމަށެވެ. އަދި މުޅި ދަތުރުގައި ވެސް މަސައްކަތްކުރެއްވީ ޗައިނާ އާއި ރާއްޖެއާ ދެމެދު އޮތް ގުޅުން ގޯސްކޮށް ދޭތެރެ ޖެއްސުމަށް ކަމަށް ވެސް އެ ބަޔާނުގައި ވެއެވެ.

advertisement

ޕެމްޕެއޯގެ ދަތުރުފުޅުގައި ޚާރިޖީ ވަޒީރު އަބްދުﷲ ޝާހިދާ ބައްދަލުކުރެއްވުމަށް ފަހު ނޫސްވެރިންނާ ބައްދަލުކުރައްވައި ޗައިނާ އަށް ފާޑު ވިދާޅުވީ މޫސުމާ ބެހޭ ގޮތުން ދެއްކެވި ވާހަކަތަކެއްގައެވެ. އެ ގޮތުން މޫސުމީ ބަދަލުތަކުން އަރައިގަތުމަށް ބައިނަލްއަގުވާމީ ފަރާތްތަކުން މަސައްކަތްކުރަންޖެހުނު ނަމަވެސް ބައެއް ގައުމުތަކުން އެއާ ދެކޮޅަށް މަސައްކަތް ކުރަމުން ދާ ކަމަށް ވިދާޅުވިއެވެ. މިސާލެއްގެ ގޮތުން ފާހަގަކުރެއްވީ ޗައިނާގެ ކުންފުނިތަކެވެ. އެ ގޮތުން ތިމާވެއްޓަށް ބެލުމެއް ނެތި އަމަލުކުރުމާއި ކުނި އެޅުމާއި ގާނޫނާ ހިލާފަށް މަސް ބޭނުމާއި އެހެން ގައުމުތަކުގެ ކަނޑުގެ ސަރަހައްދަށް ވަދެ މަސް ބޭނުމާއި އެހެން ގައުމުތަކުގެ އިގްތިސާދަށް ގެއްލުންވާ ގޮތަށް ޗައިނާ އިން އަމަލުކުރާ ކަމަށް ޕޮމްޕެއޯ ތުހުމަތުކުރެއްވިއެވެ.

މި ވާހަކަތަކަށް ރައްދުދީ ޗައިނާ އިން ބުނީ އެމެރިކާއަކީ އަމިއްލަ އެދުން ބޮޑު ގައުމެއް ކަމަށާއި އެހެން ގައުމުތަކަށް ހަންފެތުރުމާއި ނުފޫޒު ފޯރުވުމަށް އެމެރިކާ އިން ގެންގުޅޭ ސިޔާސަތަކީ ބައިނަލްއަގުވާމީ ސުލްހަ އާއި ހަމަޖެހުމަށް އޮތް ނުރައްކަލެއް ކަމަށެވެ. އަދި ނޭޝަނަލް ކްލައިމެޓް ޗޭންޖް ސްޓްރެޓެޖީއެއް އެބަ އޮތް ކަމަށާއި ޗައިނާގެ އަމާޒަކީ 2060 ވަނަ އަހަރު އަންނަ އިރު ކާބަން ނިއުޓްރަލް ގައުމަކަށް އެ ގައުމު ހެދުން ކަމަށް ވެސް ޗައިނާ އެމްބަސީން ނެރުނު ބަޔާނުގައި ވެއެވެ.

ތިމާވެށީގެ ވާހަކަ އެމެރިކާ އިން ދައްކާ އިރު ތިމާވެށި ހިމާޔަތްކުރުމަށް ގައުމުތަކުން ހަދާފައިވާ އެންމެ މުހިންމު އެއްބަސްވުން ކަމަށްވާ ޕެރިސް އެގްރީމެންޓުން ވަކިވެފައި ވަނީ ވެސް އެމެރިކާ އިންކަން ޗައިނާގެ ބަޔާނުގައި ފާހަގަކޮށްފައި ވެއެވެ. ތިމާވެށީގެ ކަންކަމުގައި ޗައިނާ އަށް އިނގިލި ދިއްކުރެވެން ޗައިނާ އަށް އެބަ އޮތްތޯ ވެސް އެ ބަޔާނުގައި ސުވާލުކޮށްފައި ވެއެވެ.

ޗައިނާ އިން ބުނީ މިނިވަން އަދި ސުލްހަވެރި ޚާރިޖީ ސިޔާސަތެއް ގެންގުޅުމަކީ ކޮންމެ ގައުމަކަށް ވެސް އޮތް ހައްގެއް ކަމަށާއި ނަމަވެސް ވަކި ފަރާތަކަށް ޖެހި ވަކި ގައުމަކާ ނުވަތަ ވަކި ގައުމުތަކަކާ ގުޅުން ބަދަހިކުރުމަށް އެމެރިކާ އިން ފާޅުގައި ކުދި ގައުމުތަކަށް ބާރުއަޅަމުން ގެންދާ ކަމަށެވެ.

ޗައިނާއާ އެމެރިކާއާ ދެމެދު އެންމެ ބޮޑަށް މައްސަލަ އުފެދިފައިވާ ދެކުނު ޗައިނާ ކަނޑުގެ ސަރަހައްދާ ގުޅޭ ގޮތުން ޕޮމްޕެއޯ ރާއްޖޭގައި ދެއްކެވި ވާހަކަތަކަށް ވެސް ޗައިނާގެ ބަޔާނުގައި ރައްދު ދީފައި ވެއެވެ. މިލްކުވެރިކަމާ މެދު މައްސަލަ އުފެދިފައިވާ އެ ސަރަހައްދުގައި ޗައިނާ އިން އަސްކަރީ ހަރަކާތްތައް ހިންގާތީ އެކަމަށް ޕޮމްޕެއޯ ފާޑު ވިދާޅުވުމުން ރައްދުގައި ޗައިނާ އިން ބުނީ ޗައިނާ އިން އެ ސަރަހައްދުގައި އަސްކަރީ ގޮތުން ހަރަކާތްތެރިވާންޖެހެނީ އެމެރިކާ އިން އެ ސަރަހައްދާ ކައިރީގައި އަސްކަރީ ހަރަކާތްތައް ހިންގާތީ ކަމަށެވެ. އަދި ގައުމުތަކުގެ ސިޔާދަތަށް އެމެރިކާ އިން އިހްތިރާމްކުރާ ކަމަށް ބުނާ ބުނުން ޗައިނާ އިން ސިފަކުރީ ބޮޑު ޖޯކެއްގެ ގޮތުގައެވެ. އިންޑިއާ ބޭނުންކޮށްގެން އެމެރިކާ އިން ސަރަހައްދުގެ މަސްލަހަތު ނަގާލަން މަސައްކަތްކުރާ ކަމަށް ވެސް ޗައިނާގެ ބަޔާނުގައި ތުހުމަތުކޮށްފައި ވެއެވެ. އެގޮތުން އެމެރިކާ އާއި އިންޑިއާގެ އިތުރުން މި ސަރަހައްދުގެ ބައެއް އެހެން ގައުމުތައް ހިމަނައިގެން އުފައްދައިގެން އުޅޭ “އިންޑޯ-ޕެސިފިކް އެލަޔަންސް”އަކީ ވެސް ގައުމުތަކުގެ މެދުގައި ހަމަނުޖެހުން އުފައްދައި ދޭދޭ ގައުމުތަކުގެ މެދުގައި ވާދަވެރިކަން އިތުރުކުރަން އެމެރިކާ އަޑީގައި އޮވެގެން ކުރާ ކަމެއްގެ ގޮތުގައި ޗައިނާ އިން ތުހުމަތުކޮށްފައި ވެއެވެ. މި އެލަޔަންސަށް ރާއްޖެ ވަރަށް މުހިންމު ކަމަށް ޕޮމްޕެއޯ ވިދާޅުވެފައި ވެއެވެ.