އަންނަ މަހު ކޮޗިން ފެރީގެ 2 ވަނަ ދަތުރު ރާއްޖެ ކުރާނެ – އަމްރު

އިންޑިއާގެ އާއި ރާއްޖެއާ މުދާ އުފުލަންފެށި ކޮޗިން ފެރީ ގެ ދެވަނަ ދަތުރު އަންނަ މަހުގެ މެދެއްހާހިސާބުގައި ކުރާނެކަމަށް އެސްޓީއޯގެ މެނޭޖިން ޑިރެކްޓަރު ހުސައިން އަމުރު ވިދާޅުވެއްޖެ އެވެ.

ކޮޗިން ފެރީގެ ހަބަރެއް މި މަހު ނެތް ކަމަށް ބުނެ ކުރީގެ މެންބަރު އަހްމަދު ނިހާން ކުރެއްވި ޓްވީޓަކަށް ރައްދު ދެއްވާ އެސްޓީއޯގެ އެމްޑީ އަމްރު ވިދާޅުވީ އިންޑިއާ ކާގޯ ފެރީ މި ވަގުތު މާލެ ސަރަހައްދުގައި މުދާ ބާލަމުންދާ ކަމަށެވެ. އަދި އެނބުރި ގޮސް ދެން އަންނާނީ އަންނަ މަހުގެ 12 ހިސާބުގައި ކަމަށް އަމްރު ވަނީ ވިދާޅުވެފައެވެ.

advertisement

އިންޑިއާގެ ކޮޗިންއިން މުދާ ހިފައިގެން ހދ.ކުޅުދުއްފުއްޓަށް އައި ފުރަތަމަ ކާގޯ ފެރީ އެރަށަށް ބަނދަރުކޮށްފައިވަނީ މިދިޔަ މަހުގެ 26 ގައެވެ. އިންޑިއާގެ ކޮޗިންއިން ކާގޯއާ އެކީ އައި، މި ފުރަތަމަ ފެރީއަކީ އެއްފަހަރާ 3000 ޓަނުގެ މުދާ އުފުލޭ ބޯޓެކެވެ. ފުރަތަމަ ދަތުރުގައި ކުޅުދުއްފުއްޓަށް 500 ޓަނުގެ ސިމެންތިއާއި، އަދި އެހެނިހެން ބާވަތްތަކުގެ މުދާ ހިމެނޭ 2 ކޮންޓެއިނަރު ގެނެސްފައިވެއެވެ.

އިންޑިއާ-ކޮޗިން ކާގޯ ފެރީގެ ރާއްޖޭގެ އެޖެންޓަކީ މޯލްޑިވްސް ސްޓޭޓް ޝިޕިންގްއެވެ. މި ފެށި ކާގޯ ފެރީގެ ސަބަބުން އަގުހެޔޮކޮށް މުދާ ގެނައުމަށް ދިވެހި ވިޔަފާރިވެރިންނަށް މަގުފަހިވެގެންދާނެކަމަށް ސަރުކާރުން ބުނެއެވެ.

މި ކާގޯފެރީ ރާއްޖެ އަންނަނީ ރާއްޖެ އަށް އެންމެ ގިނައިން މުދާ ގެންނަ ސޫތުކުޅި ބަނދަރުގައި ހުރި މުދަލާއި ކޮޗިންގެ ބަންދަރުން މުދާ ހިފައިގެންނެވެ.