އަންނަ އަހަރަށް 35 ބިލިއަން ރުފިޔާގެ ބަޖެޓެއް!

އަންނަ އަހަރަށް ލަފާކުރާ ދައުލަތުގެ ބަޖެޓް މަޖިލީހަށް ފޮނުވައިފިއެވެ.

ބައެއް މީޑިއާތަކަށް ފިނޭންސް މިނިސްޓްރީން ވަނީ އެކަން ޔަގީންކޮށްދީފައެވެ. ބަޖެޓްގެ އަދަދު ހާމަކޮށްފައި ނުވި ނަމަވެސް ބައެއް މީޑިއާތަކުން ބުނެފައި ވަނީ އަންނަ އަހަރަށް ދައުލަތުން ލަފާކުރާ ބަޖެޓް 35 ބިލިއަން ރުފިޔާ އަށް އަރާ ކަމަށެވެ.

advertisement

މާލިއްޔަތު ގާނޫނު ބުނާ ގޮތުން ކުރިއަށް އޮންނަ އަހަރަށް ދައުލަތުން ލަފާކުރާ ބަޖެޓް އެ އަަހަރު ފެށުމުގެ ދެ މަސް ދުވަސް ކުރިން މަޖިލީހަށް ހުށަހަޅާންޖެހޭނެއެވެ.

ކޮވިޑް-19ގެ ސަބަބުން މި އަހަރުގެ ބަޖެޓަށް ބޮޑެތި ބަދަލުތަކެއް އައިސްފައިވާ އިރު ދައުލަތަށް ލިބޭ އާމްދަނީ ދަށްވުމާ ގުޅިގެން ބަޖެޓް ރިވައިޒްކުރުމަށް ފަހު އަލުން ހުށަހަޅާނެ ކަމަށް ފިނޭންސް މިނިސްޓްރީން ކުރިން ބުނެފައި ވެއެވެ. ނަމަވެސް މިހާތަނަށް ވެސް ރިވައިޒްޑް ބަޖެޓް ހުށަހަޅާފައެއް ނުވެއެވެ.

މި ހިނގާ އަހަރަށް ދައުލަތުން ފާސްކޮށްފައި ވަނީ 37.8 ބިލިއަން ރުފިޔާގެ ބަޖެޓެކެވެ. ނަމަވެސް ކޮވިޑް-19އާ ގުޅިގެން ރާއްޖޭގެ ބޯޑަރު ބަންދުވުމުން ދައުލަތަށް ލިބޭ އާމްދަނީގެ ބޮޑުބައެއް ހުއްޓުމަކަށް އައިސް ގިނަ ދަތިތަކެއް ވަނީ ކުރިމަތިވެފައެވެ. އަދި ހަރަދުތައް ވަނީ ކުޑަކުރަންޖެހިފައެވެ، ދައުލަތަށް ލިބޭނެ ކަމަށް ކުރިން އަންދާޒާކުރި އަދަދަށް ވުރެ މި އަހަރު ލިބޭ އާމްދަނީ ވެސް ވަރަށް ބޮޑުތަނުން ދަށް ވާނެ ކަމަށް ވަލީ ބެލެވިފައެވެ.

ފިނޭންސްގެ ތަފާސް ހިސާބުތަކަށް ބަލާއިރު ޓެކުހުގެ ގޮތުގައި މި އަހަރު ލިބޭނެ ކަމަށް މިހާރު ލަފާކޮށްފައި ވަނީ 9.5 ބިލިއަން ރުފިޔާއެވެ. އަދި އެ ނޫން ގޮތްގޮތުން ލިބޭ އާމްދަނީ މިހާރު ލަފާކޮށްފައި ވަނީ ތިން ބިލިއަން ރުފިޔާ އަށް އަރާނެ ކަމަށެވެ. އަދި ހިލޭ އެހީގެ ގޮތުގައި ލިބޭ އާމްދަނީ 9.2 ބިލިއަން ރފިޔާ އަށް އަރާނެ ކަމަށް އަންދާޒާކޮށްފައި ވެއެވެ. އެހެންކަމުން ދައުލަތަށް މި އަހަރު ލިބޭ އާމްދަނީ މަޖިލީހުން ފާސްކުރި ބަޖެޓްގެ ދެ ބައި ކުޑަ އެއްބަޔަށް ވެސް އަރާނެ ކަމަކަށް ނުބެލެވެއެވެ. ކުރިން ބަޖެޓް ޑެފިސިޓްގެ ގޮތުގައި އަންދާޒާކޮށްފައި ވަނީ 6.1 ޕަސެންޓެވެ. ނަމަވެސް މިހާރު އަންދާޒާކުރެވޭ ގޮތުގައި މި ނިސްބަތް 10 ޕަސެންޓާ ގާތްކުރާނެއެވެ.

ކޮވިޑްގެ ސަބަބުން އާމްދަނީ ދަށަށް ދިޔަ ނަމަވެސް ދައުލަތުން ފަށާފައިވާ ގިނަ މަޝްރޫއުތަކެއް ހުއްޓުމެއް ނެތި ކުރިއަށް އެބަ ގެންދެއެވެ. ގިނަ މަޝްރޫއުތަކަކީ ލޯނު އެހީގައި ކުރިއަށް ގެންދާ މަޝްރޫއުތަކެވެ.