އެންމެ ގިނަ މީހުން ރާއްޖެ އައިސްފައިވަނީ އެމިރޭޓްސްގެ ފްލައިޓްތަކުން

ކޯވިޑް19 އަށްފަހު ބޯޑަރު ހުޅުވުލުމާއިއެކު މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައިވަނީ އެމިރޭޓްސް އެއަރލައިނުންކަމަށް ތަފާސްހިސާބުތައް ދައްކައިފިއެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުގައި އެމިރޭޓްސް އިން މިހާތަނަށް 14,987 މީހުން ވަނީ ރާއްޖެ އައިސްފައެވެ. އޮކްޓޯބަރ މަހުގެ 28 ވަނަ ދުވަހުގެ ނިޔަލަށް އެމިރޭޓްސްއިން ވަނީ ރާއްޖެއަށް 178 ފްލައިޓް އަޅާފައެވެ. އެ އެއާލައިނުން ވަނީ ޔޫރަޕުގެ ފިނި މޫސުމާ ދިމާކޮށް ފްލައިޓް އިތުރު ކުރަން ވެސް މިހާރު ނިންމާފަ އެވެ. ކޯވިޑް19 އަށްފަހު އެމިރޭޓްސްގެ ދަތުރުތައް ރާއްޖެއަށް އަލުން ފަށާފައިވަނީ ޖުލައި 16 ވަނަ ދުވަހުއެވެ.

advertisement

2 ވަނައަށް އެންމެ ގިނަ ފަތުރުވެރިން ރާއްޖެ އައިސްފައިވަނީ ގަތަރު އެއާވޭސްގެ ފްލައިޓްތަކުންނެވެ. ގަތަރު އެއާވޭސް އިން މިހާތަނަށް ރާއްޖެ އަށް 206 ފްލައިޓް އަޅާފައިވާއިރު މި ފްލައިޓްތަކުގައި 14,690 މީހުން ވަނީ ރާއްޖެ އައިސްފައެވެ. ގަތަރު އެއަރވޭސްއަކީ ރާއްޖޭގެ ބޯޑަރު ހުޅުވާލުމާއިއެކު އެންމެ ފުރަތަމަ ރާއްޖެއަށް ދަތުރުފެށި އެއަރލައިންއެވެ.

3 ވަނައަށް އެންމެ ގިނަ މީހުން ރާއްޖެ އައިސްފައިވަނީ އޭރޯޕްލޮޓުންނެވެ. އޭރޯފްލޮޓުން ރާއްޖެއަށް 28 ފްލައިޓް އަޅާފައިވާއިރު 4,639 މީހުން ވަނީ މި ދަތުރުތަކުގައި ރާއްޖެ އައިސްފައެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުގައި ބޯޑަރު ހުޅުވިފަހުން މިހާރު 12 އެއާލައިނެއް ދަނީ ރާއްޖެ އަށް ދަތުރު ކުރަމުންނެވެ. އަދި މިމަސް ނިމުމުގެ ކުރިން 18 އެއަރލައިނަކުން ރާއްޖެ ދަތުރުކުރާނެކަމަށް ޓޫރިޒަމް މިނިސްޓްރީން ބުނެއެވެ.