ބިދޭސީންގެ އެކޮމަޑޭޝަން ވިޔަފާރިތައް ރެޖިސްޓްރީކުރަން ލާޒިމްކޮށްފި

ބިދޭސީންނަށް ހާއްސަކޮށްގެން ހަދާފައިވާ އެކޮމަޑޭޝަންތައް ރެޖިސްޓްރީކުރަން ލާޒިމްކޮށް އިކޮނޮމިކް މިނިސްޓްރީން ގަވާއިދެއް ހަދައިފިއެވެ.

އިކޮނޮމިކް މިނިސްޓްރީގެ އާ ގަވާއިދުގައިވާ ގޮތުން ވިޔަފާރި އުސޫލުން ބިދޭސީން ބައިތިއްބާ ތަންތަން ހުންނަންވާނީ އެ މިނިސްޓްރީން ކަނޑައަޅާ މިންގަނޑު ތަކެއްގައެވެ. އަދި އެ ތަންތަން ހިންގަންޖެހޭނީ ރެޖިސްޓްރީކޮށްގެން ކަމަށް ވެސް އެ ގަވާއިދުގައި ވެއެވެ.

advertisement

މިނިސްޓްރީގެ ގަވާއިދުގައި ބުނެފައި ވަނީ ބިދޭސީންނަށް ވަޒީފާ ދޭ ފަރާތުން ކުއްޔަށް ހިފާ ތަނެއް ނުވަތަ އެ ފަރާތަކުން ހަމައެކަނި އެ ފަރާތުގެ ބެލުމުގެ ދަށުގައިވާ ބިދޭސީން ބައިތިއްބުމަށް ހަމަޖައްސާ ތަންތަން ފިޔަވައި ބިދޭސީން ބައިތިއްބާ ތަންތަން ރެޖިސްޓްރީ ކުރަންޖެހެއެވެ.

މާލޭގައި ދުވަހު އަދި މަހު ކުއްޔަށް ބިދޭސީން ބައިތިއްބަ ގިނަ ތަންތަން މިހާރު ވެސް އެބަހުއްޓެވެ. މި ތަންތަން މީގެ ފަހުން ހިންގޭނީ އިކޮނިމިކް މިނިސްޓްރީން ކަނޑައަޅާފައިވާ މިންގަނޑުގެ ތެރެއިން ރެޖިސްޓްރީކޮށްގެންނެވެ.

އެ މިނިސްޓްރީން ބުނީ ބިދޭސީންނަށް ހާއްސަ އެކޮމަޑޭޝަންތައް އަމިއްލަ ފަރުދަކަށް ނުވަތަ ކުންފުނި، ޕާޓްނާޝިޕް ނުވަތަ ކޯޕަރޭޓިވް ސޮސައިޓީއަކަށް ވެސް ރެޖިސްޓްރީކުރެވިދާނެ ކަމަށެވެ. އެ ތަންތަން ރެޖިސްޓްރީކުރަންޖެހެނީ އެ މިނިސްޓްރީގެ “ބިޒްނަސް ޕޯޓަލް”ގައި އެކްސްޕެޓް އެކޮމޮޑޭޝަންގެ ގޮތުގައި ކަމަށް ވެސް ގަވާއިދުގައި ބުނެފައި ވެއެވެ.

އިކޮނިމިކް މިނިސްޓްރީން ވަނީ އެފަދަ ތަންތަން ރެޖިސްޓްރީކުރުމުގައި ގެންގުޅޭނެ މިންގަނޑުތައް ވެސް ކަނޑައަޅާފައެވެ. އެ ގޮތުން އަމިއްލަ ތަނެއް ނަމަ އެ ތަނެއްގެ ރެޖިސްޓްރީ އާއި ކުއްޔަށް ނަގާފައިވާ ތަނެއް ނަމަ އެކަމާ ގުޅޭ ލިޔުންތަކާޢި ވިޔަފާރީގެ ނަމާއި އެ ތަންތަނާ ހަވާލުވާ މީހަކާ ބެހޭ މައުލޫމާތު ހުށަހަޅަންޖެހޭނެއެވެ. ކުއްޔަށް ނަގާ ތަނެއް ނަމަ އެ ތަނެއްގެ ވެރި ފަރާތުގެ ހުއްދަ ވެސް ބޭނުންވާނެ ކަމަށް ވެސް މިނިސްޓްރީން ކަނޑައަޅާފައި ވެއެވެ.

މިފަދަ ތަނެއް ރެޖިސްޓްރީކުރުމަށް ބޭނުންވާ އިތުރު މައުލޫމާތުތަކުގެ ތެރޭގައި ތަނުގެ ފްލޯ ޕްލޭނާއި ކޮޓަރީގެ އަދަދާއި އެނދު ކެޕަސިޓީ އާއި އެހެނިހެން ވަސީލަތްތަކުގެ މައުލޫމާތު ހިމެނެއެވެ. މި ތަންތަނުގެ ރެޖިސްޓްރީ ފީއެއްގެ ގޮތުގައި 500ރ. ވަނީ ކަނޑައަޅާފައެވެ.

މިފަދަ ތަންތަން ރެޖިސްޓްރީކުރުމުގެ ކުރިން އެ ރަށެއްގެ ކައުންސިލަކުން ބަލައި އިންސްޕެކްޓްކުރާނެ ކަމަށް ވެސް އިކޮނޮމިކް މިނިސްޓްރީން ބުންޏެވެ. އަދި އެފަދަ ތަނެއްގައި ގަވާއިދާ ހިލާފަށް އުޅޭ ބިދޭސީން ބޭތިއްބުން މަނާކޮށްފައިވާ އިރު އެކަން ކަށަވަރުކުރަންޖެހޭ ކަމަށް ވެސް އިކޮނޮމިކް މިނިސްޓްރީން ބުންޏެވެ.

އެ މިނިސްޓްރީން ވަނީ ގަވާއިދާ ހިލާފުވާ ފަރާތްތަކަށް އަދަބުތަކެއް ވެސް ކަނޑައަޅާފައެވެ. އެގޮތުން އުސޫލަށް ނުފެތޭ ތަނެއް ނަމަ 5،000ރ. އިން ޖޫރިމަނާކުރާނެ ކަމަށް ކަނޑައަޅާފައި ވެއެވެ. އަދި އިސްލާހު ނުކޮށްފި ނަމަ އެތަނެއްގެ ވިޔަފާރި ހުއްދަ ބާތިލްކުރާނެ ކަމަށް ވެސް މި މަހުގެ 29 ވަނަ ދުވަހުން ފެށިގެން އަމަލުކުރާ ގަވާއިދުގައި ވެއެވެ.

ރާއްޖޭގައި އުޅޭ ބިދޭސީންގެ ސައްހަ އަދަދު ދައުލަތުގެ ކަމާ ބެހޭ ފަރާތްތަކަށް ނޭނގޭ އިރު ގަވާއިދާ ހިލާފަށް ވެސް ލައްކައަކަށް ވުރެ ގިނަ ބިދޭސީން ރާއްޖޭގައި އުޅޭ ކަމަށް އަންދާޒާކުރެވެއެވެ. އަދި ބިދޭސީން އުޅެނީ ވަރަށް ބޮޑަށް ތޮއްޖެހި، އިންސާނުން ވެސް ދިރިއުޅެން ކަމުނުދާ ފަދަ ހާލަތުގައި ކަން ފާހަގަކުރެވެއެވެ. ކޮވިޑް-19އާ ގުޅިގެން ކަމާ ބެހޭ ފަރާތްތަކުން ބެލި ބެލުމުގެ ތެރެއިން ވެސް މި ކަންތަތްތައް ވަރަށް ބޮޑަށް ފާހަގަކުރެވިފައިވާ އިރު މި ތަންތަނުގެ ތޮއްޖެހުން ކުޑަކުރުމަށް އެފަދަ ބައެއް ތަންތަނުގައި ތިބި ފަރާތްތައް ވަގުތީ އިޔާތަކަށް ގެންގޮސްފައި ވެއެވެ. އަދި ބިދޭސީންނަށް ހާއްސަކޮށްގެން ގުޅިފަޅުގައި ސަރުކާރުން އަންނަނީ އެކޮމޮޑޭޝަން ބްލޮކްތަކެއް ތައްޔާރުކުރަމުންނެވެ. އަދި ގަވާއިދާ ހިލާފަށް އުޅޭ ބިދޭސީން ދެނެގަތުމަށް ޕްރޮގްރާމެއް ހިންގާ އިރު އެފަދަ ފަރާތްތައް ގައުމަށް ފޮނުވާލުމުގެ މަސައްކަތްތަކެއް ވެސް އަންނަނީ ކުރަމުންނެވެ. އެ ގޮތުން މިހާތަނަށް 8،000 އަށް ވުރެ ގިނަ ބިދޭސީން އަނބުރާ ގައުމަށް ފޮނުވާލާފައި ވެއެވެ.

މި ގަވާއިދުގެ އިތުރުން އިކޮނޮމިކް މިނިސްޓްރީން މިހާރު ވަނީ އެމްޕްލޮއިމެންޓް އެޕްރޫވަލް ދިނުމުގައި ވެސް އާ އުސޫލްތަކެއް ތައާރަފްކޮށްފައެވެ. އެ ގޮތުން ވިސާ ދޫކުރާ އިރު ބިދޭސީންގެ އެކޮމަޑޭޝަން ހަމަޖެހިފައިވާ ގޮތް އެ މިނިސްޓްރީގައި ރެޖިސްޓްރީކުރަންޖެހެއެވެ.