ރާއްޖޭގެ އިޤްތިޟާދުގައި އެންމެ މުހިންމު އެއް ސިނާއަތް ކުރިއެރުވުމުގައި މިފްކޯއިން 27 އަހަރު

މަސްވެރިކަމަކީ ދިވެހިންގެ ލޭނާރޭ އަބަދުވެސް އަންނަނީ ބުނަމުންނެވެ. މީގެ ސަބަބުތައްވެސް ގިނައެވެ. ދިވެހިންގެ ދިރިއުޅުމާއި މަސްވެރިކަން ގުޅި ލާމެހިފައިވާލެއް ބޮޑުކަމެވެ. ދިވެހިންގެ ދިރިއުޅުމާއި މަސްވެރިކަން ގުޅުންނެތް ޒަމާނެއް ދެކެފައިވާނެކަމަކަށް ގަބޫލެއް ނުކުރެވެއެވެ. މިއީ ރާއްޖޭގެ އިޤްތިޟާދުގައިވެސް އެހާމެ މުހިންމު ސިނާއަތެކެވެ. މި ސިނާއަތް ކުރިއެރުވުމަށް ސަރުކާރުން ވަނީ މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ، މިފްކޯ ގެ ނަމުގައި ކުންފުންޏެއް އުފައްދަވާފައެވެ. މި ކުންފުނީގެ މަސައްކަތްތައް ފެށިތާ މިހާރު މިވަނީ  27 އަހަރު ވެފައެވެ.

މިވަގުތު މިފްކޯ ހިންގަމުންދަނީ އެސްޓީއޯގެ ސަބްސިޑަރީ ކުންފުންޏެއްގެ ގޮތުގައެވެ. މިފްކޯއިން އަންނަނީ ރާއްޖޭގައި ބާނާ މަހުން ތަފާތު އެކި އުފެއްދުންތައް ބާޒާރަށް ނެރެ ރާއްޖެއިން ބޭރަށް ރާއްޖެއިން ބާނާމަސް އެކްސްޕޯޓްކޮށް މަސްވެރިކަމުގެ ސިނާއަތު ކުރިއެރުވުމަށް ގިނަ މަސައްކަތްތަކެއް ކުރަމުންނެވެ.

advertisement

މިފްކޯގެ 27 އަހަރުގެ ދިގު މާޒީގައި އެ ކުންފުނިން ވަނީ މުޅި ދުނިޔެއަށް މަޝްހޫރު ރާއްޖޭގެ ދޮށީގެ މަސްވެރިކަން ދަމަހައްޓައި ރާއްޖޭގެ މަސްވެރިކަމުގެ ސިނާއަތު ޕްރޮމޯޓްކުރަމުންނެވެ. ރާއްޖޭގައި އެންމެ ފުޅާ ދާއިރާއެއްގައި މަސް ބަންދުކުރުމުގެ މަސައްކަތް ކުރަނީވެސް މިފްކޯއިންނެވެ.

ރާއްޖޭގެ 4 ސަރަހައްދެއްގައި މިފްކޯގެ ކާރުހާނާތައް އަންނަނީ އޮޕަރޭޓްކުރަމުންނެވެ. މަސްވެރިންނަށް ބޭނުންވާ ލޮޖިސްޓިކަލް އެހީތެރިކަންވެސް މިފްކޯއިން އަންނަނީ ފޯރުކޮށްދެމުންނެވެ.ދުނިޔޭގެ ބާޒާރަށް އަންނަ ބަދަލާއި ގުޅިގެން މަސް ގަންނަ އަގާއި މަސްވެރިންނަށް ވިއްކާ ޑީސަލްގެ އަގަށްވެސް އަންނަނީ ބަދަލުގެންނަމުންނެވެ.

މިފްކޯގެ ހަޔާތުގައި 27 އަހަރު ފުރިފައިވާއިރު މިފްކޯގެ މަސް ބަންދުކުރާ ކާރުހާނާތައް ވަނީ އީޔޫއިން އެކްރެޑިޓްކޮށްފައެވެ. މި ފެކްޓްރީތަކުގައި މިފްކޯއިން އަންނަނީ މަސް ޕްރޮސެސްކޮށް، ދަޅުގައި މަސް ބަންދުކޮށް، ފިނިކޮށްގެންނާއި އަދި ވެލިއު އެޑްކޮށްގެން ތަފާތު އުފެއްދުންތައް ބާޒާރަށް ނެރެ އަދި ރާއްޖެއިން ބޭރަށް އެކްސްޕޯޓްވެސްކުރަމުންނެވެ.

މިފްކޯގެ ތަރައްޤީއަށް 231 މިލިއަން ރުފިޔާގެ މަޝްރޫޢެއް ހިންގުމަށް ނިންމާފައިވާކަން މި ސަރުކާރުން ވަނީ މީގެކުރިން ހާމަކޮށްފައެވެ. މިއީ އިންޑިއާ ސަރުކާރުން ރާއްޖެއަށް ފޯރުކޮށްދީފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން ހިންގާ މަޝްރޫޢެކެވެ.

މިމަޝްރޫޢުގެ ދަށުން ކުރިއަށްގެންދާ މަސައްކަތްތަކުގެ ތެރޭގައި، ޅ. ފެލިވަރު ފިޝަރީޒް ކޮމްޕްލެކްސްގައި ސްޓޯރޭޖް ފެސިލިޓީ ޤާއިމްކޮށް ‘ޓޫނާ ކުކްޑް ލޮއިންސް’ ޕްލާންޓަކާއި ‘ފިޝްމީލް’ ޕްލާންޓެއް ގާއިމްކުރާނެއެވެ. އަދި ގދ. ގެމަނަފުށީގައި 50 މެޓްރިކް ޓަނުގެ އައިސް ޕްލާންޓެއް ގާއިމްކޮށް، 100 މެޓްރިކް ޓަނުގެ އައިސް ސްޓޯރޭޖެއް ގާއިމްކުރާނެކަމަށް ސަރުކާރުން ވަނީ ހާމަކޮށްފައެވެ.

މިފްކޯގެ ހަޔާތުގައި 27 އަހަރު ދަތިއުނދަގޫތަކާއިއެކުވެސް އެ ކުންފުނިން ވަނީ މަސްވެރިންނަށް ބޭނުންވާ އެހީތެރިކަން ފޯރުކޮށްދިނުމަށް ގިނަ މަސައްކަތްތަކެއް ކޮށްފައެވެ. މިފްކޯގެ އުފެއްދުންތަކުގެ ކޮލިޓީ ހިފެހެއްޓުމަށް ކުރި ބުރަ މަސައްކަތަކީ މިހިސާބަށް މިފްކޯ އައުމުގެ އެންމެ ބޮޑު އެއް ނަތީޖާއެވެ.