ވިޔަފާރިވެރިންނާއި ދަރިވަރުންނަށް އިންޑިއަށް ދަތުކުރުމުގެ ހުއްދަ ދީފި

އިންޑިއާ އަށް ދަތުކުރާ ދިވެހިންނަށް ލުއިތަކެއް ދިނުމަށް އެ ގައުމުން އަނެއްކާ ވެސް ނިންމައިފިއެވެ.

އިންޑިއާ އިން ބުނީ ކޮވިޑް-19އާ ގުޅިގެން ބޯޑަރު ބަންދުކޮށްފައިވީ ނަމަވެސް ވިޔަފާރިވެރިންނާއި ދަރިވަރުންނަށް އެ ގައުމަށް ދަތުކުރުމުގެ ހުއްދަ ދިނުމަށް ނިންމާފައިވާ ކަމަށެވެ.

advertisement

މީގެ ކުރިން އިންޑިއާ ސަރުކާރުން ވަނީ ދިވެހިންގެ ތެރެއިން ކޮންމެހެން ބޭސް ފަރުވާ އަށް އެ ގައުމަށް ދާންޖެހޭ މީހުންނަށް ހުއްދަ ދީފައެވެ. އެ ގޮތުން އާސަންދަ މެދުވެރިކޮށް ބޭސް ފަރުވާ އަށް ދާން ބޭނުންވާ ފަރާތްތަކަށް ކަނޑައަޅާފައިވާ ވަކި ވަރަކަށް އަންނަނީ އިންޑިއާ އަށް ފޮނުވަމުންނެވެ. އޭގެ ތެރޭގައި ހިމެނެނީ ބޮޑެތި ބަލިތަކަށް ފަރުވާ ހޯދަންޖެހޭ މީހުންނެވެ.

މި ލުއިތައް ދިނުމަށް އިންޑިއާ ސަރުކާރުން ނިންމާފައި މި ވަނީ އެ ގައުމުން ރާއްޖެ އަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު އާއި ރާއްޖޭގެ ޚާރިޖީ ވަޒީރު އަބްދުﷲ ޝާހިދު އިއްޔެ ކުރެއްވި މަޝްވަރާތަކަށް ފަހު އެވެ.

ރާއްޖެއިން އިންޑިއާގެ އެކި ސަރަހައްދުތަކަށް ދަތުކުރަން ބޭނުންވާ ވިޔަފާރިވެރިންނާއި ކިޔަވާ ދަރިވަރުންނާއި އެ ދަރިވަރުންގެ ބެލެނިވެރިން ވެސް ދަތުރުކުރުމުގެ ކުރިން ފޮރިން މިނިސްޓްރީން ހުއްދަ ހޯދަންޖެހެއެވެ.

އިންޑިއާ އަށް ދާ ދިވެހިން ވެސް އެ ގައުމަށް ދިއުމަށް ފަހު ކަމާ ބެހޭ ފަރާތްތަކުން ކަނޑައަޅާ ގޮތެއްގެ މަތިން ކަރަންޓީނު ވާންޖެހެއެވެ.

ކޮވިޑް-19ގެ މިހާލަތުން އަރައިގަތުމުގައި އިންޑިއާ އިން އަންނަނީ ރާއްޖެ އަށް ގިނަ އެހީތަކެއް ވަމުންނެވެ. އަދި އިގްތިސާދު ކޮޅަށް ޖަހައި ތަރައްގީގެ މަޝްރޫއުތަކުގައި ވެސް މި ވަގުތު އެންމެ ގާތް އެންމެ ބޮޑު އެހީތެރިއަކީ އިންޑިއާ އެވެ.