ކައުންސިލް އިންތިހާބު އަންނަ މާޗް މަހު!

ކޮވިޑް-19އާ ގުޅިގެން ފަސްކުރި ކައުންސިލް އިންތިހާބު އަންނަ މާޗް މަހު ބޭއްވުމަށް މަސައްކަތްކުރަމުން އަންނަ ކަމަށް އިލެކްޝަންސް ކޮމިޝަނުން ބުނެފިއެވެ.

މީގެ ކުރިން މި އަހަރުގެ އޭޕްރީލް މަހަށް ތާވަލްކުރި ކައުންސިލް އިންތިހާބު ފަސްކުރަންޖެހުނީ ކޮވިޑް-19 ފެތުރެން ފެށުމާ ގުޅިގެންނެވެ. ކައުންސިލް މެންބަރުންގެ ދައުރު ހަމަވާތީ އިންތިހާބު ފާސްކުރީ ގާނޫނަށް ބަދަލު ގެނެސްގެންނެވެ. އެ ގޮތުން މިހާރު ތިއްބެވި ކައުންސިލަރުންގެ ދައުރު ދައްމާލުމަށް މަޖިލީހުން ފާސްކުރިއެވެ.

advertisement

އިލެކްޝަންސް ކޮމިޝަނުން ބުނީ އަންނަ އަަހަރުގެ މާޗް މަހު އިންތިހާބު ބޭއްވުމަށް ވާންޖެހޭ ތައްޔާރީތައް ވަމުން އަންނަ ކަމަށާއި އެ ގޮތުން ވޯޓު ލިސްޓަށް އަންނަ ބަދަލުތައް އަޕްޑޭޓް ކުރަމުން އަންނަ ކަމަށެވެ.

އީސީން ބުނީ އުންމީދަކީ މާޗް މަސް އަންނަ އިރު އިންތިހާބު ބޭއްވޭ ވަރަށް ކޮވިޑްގެ ހާލަތު ރަނގަޅުވުން ކަމަށާއި ނަމަވެސް ހާލަތު ރަނގަޅު ނުވި ނަމަވެސް އިންތިހާބު ބޭއްވުމަށް އުންމީދުކުރާ ކަމަށެވެ. އަދި މިހާރު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ މިންގަނޑުތަކަށް ބަދަލު ނުގެންނަ ނަމަ އިންތިހާބު ބާއްވަންޖެހޭނީ އެ މިންގަނޑުތަކުގެ ތެރެއިން ކަމަށާއި ގައިދުރުކުރުން ފަދަ ކަންކަން ކުރަންޖެހޭ ނަމަ އިންތިހާބުގެ ކަންކަމަށް ވެސް ބަދަލުތަކެއް އަންނާނެ ކަމަށް އީސީން ބުންޏެވެ. އެ ގޮތުން ވޯޓު ލާ މަރުކަޒުތައް އިތުރުކުރުން ފަދަ ކަންކަން ކުރަންޖެހޭ ކަމަށް އެ ކޮމިޝަނުން ބުންޏެވެ.

މި ފަހަރު އިލެކްޝަންސް ކޮމިޝަނުން ހަމަޖައްސާފައި އޮތީ ކައުންސިލްތަކުގެ އިންތިހާބުގެ އިތުރުން އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބު އެކުއެކީގައި ބޭއްވުމަށެވެ. އިންތިހާބު ފަސްކުރި އިރު ގިނަ ތައްޔާރީތަކެއް އިލެކްޝަންސް އިން ވަނީ ވެފައެވެ. އެ ގޮތުން ކެންޑިޑޭޓުންގެ ގުރުލުން ވެސް ބާއްވާފައި ވެއެވެ. އިންތިހާބު ފަސްކުރުމާ ގުޅިގެން އީސީން ވަނީ ނަން އަނބުރާ ގެންދިއުމުގެ ފުރުސަތު ކެންޑިޑޭޓުންނަށް ދީފައެވެ. އަދި އިންތިހާބު ދެން ބާއްވާ ދުވަހާ ހަމައަށް 18 އަހަރު ފުރޭ މީހުންގެ ނަން ވޯޓާސް ލިސްޓްގައި ހިމެނުމަށް ވަނީ ނިންމާފައެވެ.