އިންޑިއާ ފަތުރުވެރިންނަށް އެންމެ ތަފާތު ތަޖުރިބާއެއް ކުރެވޭނީ ރާއްޖެއިން – ސަފީރު

އިންޑިއާ ފަތުރުވެރިންނަށް އެންމެ ތަފާތު ތަޖުރިބާއެއް ކުރެވޭނީ ރާއްޖެއިންކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވެއްޖެއެވެ.

ޓްރެވެލް ޓްރޭޑް މޯލްޑިވްސް އަށް ދެއްވި ޙާއްސަ އިންޓަވިއުއެއްގައި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވީ، ރާއްޖޭގެ ގޮނޑުދޮށްތަކާއި، ކަނޑުއަޑީގެ ރީތިކަން ފޮޓޯއަކުން ފެނުމުގެ ބަދަލުގައި ރާއްޖެއައިސް އެކަން ތަޖުރިބާކޮށްލުމަކީ ކުރެވޭ ތަފާތު އިހްސާސްއަކަށް ވެގެންދާނެކަމަށެވެ. އިންޑިއާގެ ފަތުރުވެރިންނަށް ރާއްޖެއައިސް ރާއްޖޭގެ މި ގުދިރަތީ ރީތިކަން ތަޖުރިބާކޮށްލުމަށް ބާރުއަޅާނެކަމަށް ސަފީރު ވިދާޅުވިއެވެ. ރާއްޖެއަކީ މުޅި ދުނިޔެއިންވެސް އިންޑިއާގެ ފަތުރުވެރިންނަށް ތަޖުރިބާކޮށްލެވޭނެ އެންމެ ތަފާތު ތަޖުރިބާއަށް ވެގެންދާނެކަމުގެ ޔަޤީންކަން ސަފީރު ވަނީ އަރުވާފައެވެ.

advertisement

އިންޑިއާއިން ރާއްޖެ އަންނަ ފަތުރުވެރިން އިތުރުކުރުމަށް މިހަރު ކުރަމުންދާ މަސައްކަތްތަކަށް އަލިއަޅުވާލައްވާ ސަފީރު ވިދާޅުވީ، ރާއްޖެއަށް އެންމެ ގިނައިން ފަތުރުވެރިން އަންނަ 5 ވަނަ ޤައުމުގެ ގޮތުގައި އިންޑިއާއޮވެ 2 ވަނައަށް ޖެހިލުމަކީވެސް މިކަމުގައި ލިބިގެންދިޔަ ކުރިއެރުމެއްކަމަށެވެ. އަދި ރާއްޖެއަށް އެންމެ ގިނަ ފަތުރުވެރިން އަންނަ ޤައުމަކަށް އިންޑިއާ ނުހެދެންވީ ސަބަބެއްނެތްކަމަށް ސަފީރު ވިދާޅުވިއެވެ. ރައްޖެއާ އިންޑިއާއާއި ދެމެދު ގާއިމްކޮށްފައިވާ “އެއަރ ބަބުލް” އެގްރީމަންޓަކީ އިންޑިއާއިން ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް 2 ގައުމުގެ ސަރުކާރުން އެޅުއްވި އެއް ފިޔަވަޅެވެ.

ސަންޖޭ ސުދީރު ވިދާޅުވީ ހައި ކޮމިޝަންގެ ލެވެލްގައި ރާއްޖެއަންނަ ފަތުރުވެރިން އިތުރުކުރުމަށް ގިނަ މަސައްކަތްތަކެއް ކުރައްވަމުންދާކަމަށެވެ. އެގޮތުން އިންޑިއާގެ ބައެއް ޓުއަރ އޮޕަރޭޓަރުންނާއި، ޓްރެވެލް އެޖެންސީތަކާއި އަދި މިނޫންވެސް ކަމާގުޅުންހުރި ފަރާތްތަކާއި މަޝްވަރާކުރަމުންދާކަމަށެވެ. މީގެއިތުރުން ޓޫރިޒަމް މިނިސްޓަރ ޑރ. އަބްދުﷲ މައުސޫމްއާއި، އެމްއެމްޕީއާރުސީން ރާއްޖެ އަންނަ ފަތުރުވެރިން އިތުރުކުރުމަށް ކުރަމުންދާ މަސައްކަތްތަކަށް އެމްބަސީގެ ފަރާތުން ފުރިހަމަ އެއްބާރުލުން ދެއްވަމުންދާކަން ސަފީރު ވަނީ ފާހަގަކުރައްވާފައެވެ.

މިއަހަރުގެ އޮގަސްޓް މަހުގެ ތެރާގައި ރާއްޖެއާއި އިންޑިއާއާއި ދެމެދު ވަނީ “އެއަރ ބަބުލް” އެއް ޤާއިމްކޮށްފައެވެ. މި އެއްބަސްވުމުގެ ދަށުން ދެގައުމުގެ ދެމެދުގައި ވައިގެ ދަތުރުތައް އަންނަނީ ކުރަމުންނެވެ.

2 ގައުމުގެ “އެއަރ ބަބުލް” އާއިއެކު އިންޑިއާގެ 5 ސަރަހައްދަކުން ރާއްޖެއަށް ދަނީ ވައިގެ ދަތުރުތައް ކުރަމުންނެވެ. އޭގެތެރޭގައި ހިމެނެނީ ތްރިވަނަންތަޕޫރަމް، ކޮޗިން، މުމްބާއީ، ދިއްލީ، އަދި ބެންގަލޫރުއެވެ.

ތްރިވަނަންތަޕޫރަމް – ރާއްޖެއަށް، އެއަރ އިންޑިއާ – ހަފްތާއަކު 1 ފްލައިޓް (ބުދަ)

ކޮޗިން – ރާއްޖެ، އިންޑިގޯ – ހަފްތާއަކު 3 ފްލައިޓް (ބުރާސްފަތި އަދި އާދިއްތަ)

މުމްބާއީ – ރާއްޖެ، އިންޑިގޯ – ހަފްތާއަކު 4 ފްލައިޓް (ބުރާސްފަތި އަދި އާދިއްތަ)

މުމްބާއީ – ރާއްޖެ، ގޯ އެއަރ – ހަފްތާއަކު 3 ފްލައިޓް (ބުދަ، ބުރާސްފަތި، ހޮނިހިރު އަދި އާދިއްތަ)

ދިއްލީ – ރާއްޖެ، ގޯ އެއަރ – ހަފްތާއަކު 3 ފްލައިޓް (ބުދަ، އާދިއްތަ)

ބެންގަލޫރ – ރާއްޖެ، ހަފްތާއަކު 2 ފްލައިޓް (ބުދަ، ބުރާސްފަތި، ހޮނިހިރު އަދި އާދިއްތަ)

އިންޑިއާއަކީ ރާއްޖޭގެ ފަތުރުވެރިކަމުގައި މިހާރު އެންމެ ބާރަށް ކުރިއަރަމުންއަންނަ އެއް މާކެޓްއެވެ. އިންޑިއާއިން ރާއްޖެ އަންނަ ފްލައިޓްތަކުގެ އަދަދު އިތުރުވުމާއިއެކު އެ ގައުމުން ރާއްޖެ އަންނަ ފަތުރުވެރިންގެ އަދަދު އިތުރުވާނެކަމަށް ބެލެވެއެވެ.

ރާއްޖޭގެ ބޯޑަރު އަލުން ފަތުރުވެރިންނަށް ހުޅުވާލާފައިވަނީ މިދިޔަ ޖުލައިމަހުގެ 15 ވަނަ ދުވަހުއެވެ. ރާއްޖޭގައި ރަޖިސްޓްރީކޮށްގެން ހިންގާ ފަތުރުވެރިންނަށް ޙިދުމަތްދޭ ތަނަކަށް އަންނަ ކޮންމެ ފަތުރުވެރިއަކަށް 30 ދުވަހުގެ އޮން އެރައިވަލް ވިސާ ލިބޭނެއެވެ.

ރާއްޖެއައިސް ކޯވިޑް19 އަށް ޓެސްޓުކުރުން މަޖުބޫރުވެފައިނުވާތީ ރާއްޖެ އަންނަ ހުރިހައި ފަތުރުވެރިންވެސް ރާއްޖެ އައުމުގެ 96 ގަޑިއިރު ކުރިން ކޯވިޑް19 އަށް ނެގެޓިވްކަން އަންގައިދޭ ޕީސީއާރު ޓެސްޓެއް އޮންނަން ޖެހެއެވެ.