އެންމެ ގިނަ ފަތުރުވެރިން އައީ މާފުއްޓަށް

ކޯވިޑް19 އަށްފަހު ރާއްޖޭގެ ގެސްޓްހައުސް ސިނާއަތް އަލުން ހުޅުވާލުމާއިއެކު މިހާތަނަށް އެންމެ ގިނަ ފަތުރުވެރިން އައިސްފައިވަނީ މާފުށީގެ ގެސްޓްހައުސްތަކަށްކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ރާއްޖޭގެ ގެސްޓްހައުސްތައް އަލުން ހުޅުވާފައިވަނީ އޮކްޓޯބަރ 15 ވަނަ ދުވަހުއެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އޮކްޓޯބަރ މަހުގެ 15 ވަނަ ދުވަހުން ފެށިގެން މިމަހުގެ އެއްވަނަ ދުވަހާއި ހަމައަށް ރާއްޖޭގެ ގެސްޓްހައުސްތަކަށް 1210 ފަތުރުވެރިން ވަނީ އައިސްފައެވެ. މީގެތެރެއިން 548 ފަތުރުވެރިން އައިސްފައިވަނީ މާފުއްޓަށެވެ.

advertisement

ކޯވިޑް19 އަށްފަހު އަލުން ގެސްޓްހައުސް ސިނާއަތް ހުޅުވުމުގެ ހަރަކާތް ބާއްވާފައިވަނީވެސް މާފުށީގައެވެ. ފުރަތަމަ ގެސްޓުން އައީވެސް މާފުއްޓަށެވެ. މާފުއްޓަކީ ރާއްޖޭގައި ގެސްޓު ހައުސް ވިޔަފާރި އެންމެ ފުޅާ ދާއިރާއެއްގައި ކުރަމުން އަންނަ އެއް ރަށެވެ.

މާފުށީގެ އިތުރުން ދެން އެންމެ ގިނަ އަދަދެއްގެ ފަތުރުވެރިން އައިސްފައިވަނީ ތޮއްޑޫ އަދި ހުރާއަށެވެ. މިމަހުގެ 1 ވަނަ ދުވަހާއި ހަމައަށް ކ.ހުރާއަށް 138 ފަތުރުވެރިން އައިސްފައިވާއިރު، އއ. ތޮއްޑޫއަށް އައިސްފައިވަނީ 112 ފަތުރުވެރިންނެވެ.

ގެސްޓްހައުސް ހުޅުވުމުގެ ހުއްދަ މިހާތަނަށް ދީފައިވާ ރަށްރަށުގެ ތެރޭގައި ހިމެނެނީ ކ. ހުރާ، ކ. މާފުށި، ކ. ގުރައިދޫ، އއ. މަތިވެރި، އއ. އުކުޅަސް، އއ. ތޮއްޑޫ، އއ. ރަސްދޫ، ވ. ފުލިދޫ، ވ. ތިނަދޫ، ނ. ފޮއްދޫގެ އިތުރުން އައްޑޫ ސިޓީގެ ފޭދޫ އަދި މަރަދޫ ފޭދޫގެ ބައެއް ގެސްޓްހައުސްތަކެވެ.  އަތޮޅުތެރޭގެ 40 އަށްވުރެ ގިނަ ގެސްޓްހައުސް ހުޅުވާފައިވާއިރު ފަތުރުވެރިންނަށް ޙިދުމަތްދިނުމަށް ގެސްޓްހައުސްތަކުގައި މިވަގުތު ޙިދުމަތްދެމުންދާ އެނދުގެ އަދަދުވަނީ 1199 އަކަށްވުރެ މައްޗަށް އަރާފައެވެ.