ގަލްފް އެއަރގެ ދަތުރުތައް އަލުން ރާއްޖެއަށް ފަށަނީ

ގަލްފް އެއަރގެ ދަތުރުތައް އަލުން ރާއްޖެއަށް ފަށަން އެ އެއަރލައިނުން ނިންމައިފިއެވެ.

ގަލްފް އެއަރއިން ބުނީ އެ އެއަރލައިނުން ރާއްޖެއަށް އަލުން ދަތުރުތައް ފަށާނީ ޑިސެމްބަރ މަހުގެ 12 ވަނަ ދުވަހުކަމަށެވެ. ދަތުރުތައް ފަށާއިރު ހަފްތާއަކު 2 ފްލައިޓް ވެލާނާ އިންޓަނޭޝަނަލް އެއަރޕޯޓަށް ބާއްވާނެކަމަށް ގަލްފް އެއަރއިން ބުނެއެވެ.

advertisement

ގަލްފް އެއަރއިން ރާއްޖެއަށް ކުރާ ދަތުރުތަކުގައި ބޭނުންކުރާނީ އެއަރބަސް މަރުކާގެ 150 އިކޮނޮމީ ސީޓް އަދި 16 ގޯލްޑް ކްލާސް ސީޓް ހިމެނޭ ބޯޓުތަކެކެވެ. ގަލްފް އެއަރއިން އެންމެ ފުރަތަމަ ރާއްޖެއަށް ދަތުރުތައް ފަށާފައިވަނީ މިދިޔަ އަހަރުގެ އޮކްޓޯބަރ މަހުގެ 27 ވަނަ ދުވަހުއެވެ.

ރާއްޖޭގެ ބޯޑަރު އަލުން ހުޅުވާލުމާއިއެކު ގަލްފް އެއަރއިން އަންނަނީ އަލުން ރާއްޖެއަށް ދަތުރުތައް ފެށުމަށް ވާންޖެހޭ ތައްޔާރީތައް ކަމާގުޅުންހުރި ފަރާތްތަކާއި ގުޅިގެން ކުރަމުންނެވެ.

ގަލްފް އެއަރއިން މިހާރުވެސް އަންނަނީ ބައިނަލްއަޤްވާމީ ގިނަ މަންޒިލްތަކަކަށް ދަތުރުކުރަމުންނެވެ. އޭގެތެރޭގައި ހިމެނެނީ ދުބާއީ، ކުވައިތް، ޖިއްދާ، މަދީނާ، މަސްކަޓް، އަންމާން، ލަންޑަން، ޕެރިސް، ފްރެންކްފާޓް، އެތެންސް އަދި ޑާކާ ހިމެނެއެވެ.