ހޯރަފުށީ އެއާޕޯޓް އަންނަ ހަފުތާ އަށް ނިންމަނީ!

ހއ. ހޯރަފުށީގައި ހަދަމުން އަންނަ އެއާޕޯޓް އަންނަ ހަފުތާ އަށް ނިންމުމަށް މަސައްކަތްކުރާ ކަމަށް އެ ތަން ތަރައްގީކުރުމުގެ މަސައްކަތްކުރަމުން އަނަން އެމްޓީސީސީން ބުނެފިއެވެ.

އެމްޓީސީސީން ކޮށްފައިވާ ޓްވީޓެއްގައި ބުނެފައި ވަނީ ހޯރަފުށީ އެއާޕޯޓްގެ މަސައްކަތް ކުރިއަށް ދާ ގޮތް ބައްލަވާލެއްވުމަށް އެ ކުންފުނީގެ ސީއީއޯ އާދަމް އާޒިމް އެ ރަށަށް ވަޑައިގެންފައިވާ ކަމަށެވެ. މުޅި މަޝްރޫއުގެ 84 ޕަސެންޓް މިހާރު ނިމިފައިވާ ކަމަށާއި ކުންފުނީގެ އަމާޒަކީ އަންނަ ހަފުތާގެ އާދީއްތަ ދުވަހަށް އެއާޕޯޓްގެ މަސައްކަތްތައް ނިންމާލުން ކަމަށެވެ.

advertisement

އެމްޓީސީސީން ބުނެފައި ވަނީ ރަންވޭގެ 99 ޕަސެންޓް ނިމިފައިވާ ކަމަށާއި ޓާމިނަލް ބިލްޑިންގެ 75 ޕަސެންޓް ނިމިފައިވާ ކަމަށެވެ. އަދި ފަޔާ ބިލްޑިންގގެ ވެސް 50 ޕަސެންޓް ނިމިފައިވާ ކަމަށް އެމްޓީސީސީން ބުންޏެވެ.

ހޯރަފުށީ ކައިރި ސަރަހައްދު ހިއްކައިގެން ތަރައްގީކުރަމުން އަންނަ އެއާޕޯޓްގައި 1،200 މީޓަރުގެ ރަންވޭއެއް ހިމެނެއެވެ. ހިއްކި ސަރަހައްދު ވަނީ ހޯރަފުއްޓާ ގުޅާލާފައެވެ. މަޝްރޫއުގެ ތަފްސީލްތަކަށް ބަލާއިރު 8،635 އަކަމީޓަރުގެ އޭޕްރަންއަކާއި 9،473 އަކަމީޓަރުގެ ޕާކިން އޭރިޔާއެއް ވެސް ހިމެނެއެވެ. މިއީ 198 މިލިއަން ރުފިޔާ ހޭދަކޮށްގެން ތަރައްގީކުރާ އެއާޕޯޓެކެވެ.

މި އެއާޕޯޓްގެ ސަބަބުން ހއ. އަތޮޅަށް ބޮޑު ކުރިއެރުމެއް ލިބިގެންދާނެއެވެ. ހާއްސަކޮށް އެ ސަރަހައްދުގެ ޓުއަރިޒަމް ފުޅާވެގެންދާނެއެވެ.