ކުދި އަދި މެދު ފަންތީގެ ވިޔަފާރިތަކަށް ފަހި މާހައުލެއް ގާއިމުކުރުމަށް އެމްއޯޔޫއެއްގައި ސޮއިކޮށްފި

ކުދި އަދި މެދު ފަންތީގެ ވިޔަފާރިތަކަށް ފަހި މާހައުލެއް ގާއިމުކުރުމަށްޓަކައި ސަރުކާރުން ކުރަމުން އަންނަ މަސައްކަތަށް އެހީތެރިކަން ފޯރުކޮށްދިނުމަށް އިކޮނޮމިކް މިނިސްޓްރީ އާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ބިޒްނަސް ސެންޓަރ ކޯޕަރޭޝަނާ ދެމެދު އެމްއޯޔޫއެއްގައި ސޮއިކޮށްފިއެވެ.

އިކޮނިމިކް މިނިސްޓްރީން ބުނީ މި އެމްއޯޔޫގެ މަގުސަދަކީ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށްޓަކައި ހުޅުމާލޭގައި ހިންގާ މަޝްރޫއުތަކުގައި ގުޅިގެން މަސައްކަތް ކުރުން ކަމަށެވެ. އެ ގޮތުން އެޗްޑީސީން ހިންގާ ތަރައްގީގެ މަޝްރޫއުތަކުގައި ކުދި އަދި މެދު ފަންތީގެ ވިޔަފާރިތަކަށް ބައިވެރިވުމަށް މަގުފަހިކޮށްދީ، އެފަދަ ވިޔަފާރިތަކަށް ފުރުސަތު ފަހިކޮށްދިނުން ހިމެނޭ ކަމަށެވެ.

advertisement

މީގެ އިތުރުން ކުދި އަދި މެދު ފަންތީގެ ވިޔަފާރިތައް ތަރައްގީކުރުމަށް ބިޒްނަސް ސެންޓަރ ކޯޕަރޭޝަނުން އިސްނަގައިގެން ހުޅުމާލޭގައި ކުރިއަށް ގެންދާ މަޝްރޫއުތަކުގައި، ކޮންސެޝަނަލް ރޭޓެއްގައި ޖާގަ ފޯރުކޮށްދިނުމާއި، ހުޅުމާލޭގައި ކުދި އަދި މެދު ފަންތީގެ މަޝްރޫއުތައް ތަރައްގީކުރުމަށް މަސައްކަތްކުރުމާއި އެފަދަ ކަންކަމުގައި އެހީތެރިކަން ފޯރުކޮށްދިނުގެ އިތުރުން ކުދި އަދި މެދު ފަންތީގެ ވިޔަފާރިތައް ތަރައްގީކުރުމަށް ދުރު ރާސްތާގެ ޕްލޭނެއް ހެދުން ހިމެނޭ ކަމަށް ވެސް އިކޮނޮމިކް މިނިސްޓްރީން ބުންޏެވެ.

މި އެމްއޯޔޫގައި އިކޮނިމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ފައްޔާޒް އިސްމާއިލްއެވެ. އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ އެމްޑީ ސުހައިލް އަހްމަދެވެ. ބިޒްނަސް ސެންޓަރ ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ އެމްޑީ ފަޒްލީނާ ފާކިރެވެ.