ފިޗުން ރާއްޖޭގެ ކްރެޑިޓް ރޭޓިން ދަށްކުރުން ބަލައެއް ނުގަނެވޭ: ފިނޭންސް މިނިސްޓްރީ

ބައިނަލްއަގުވާމީ ކްރެޑިޓް ރޭޓިން އެޖެންސީއެއް ކަމަށްވާ ފިޗް ރޭޓިންސް އިން ރާއްޖޭގެ ކްރެޑިޓް ރޭޓިން ދަށްކުރުމުގައި ބަލާފައިވާ މިންގަނޑާ މެދު ފިނޭންސް މިނިސްޓްރީން ސުވާލު އުފައްދައިފިއެވެ.

ފިޗުން މީގެ ކުރިން ދީފައިވާ “ބީ” ރޭޓިން މިހާރު ވަނީ “ސީސީސީ” އަށް ދަށްކޮށްފައެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި ލޯނު ނަގައިގެން ހިންގި ބޮޑެތި ބިޔަ މަޝްރޫއުތަކާ އެކު ވެސް ފިޗުން ރާއްޖެ އަށް “ބީ ޕްލަސް” ދީފައިވާ އިރު މި އަހަރުގެ އޭޕްރީލް މަހުގެ ތެރޭގައި ރޭޓިން ވަނީ “ބީ” އަށް ދަށްކޮށްފައެވެ. މި ރޭޓިން ދަށްކޮށްފައި މި ވަނީ ރާއްޖޭގެ ދަރަނި އިތުރުވަމުން ދިއުމާ ގުޅިގެންނެވެ. ފިޗުން ބުނެފައި ވަނީ މި ބަދަލު ގެނަސްފައި ވަނީ ރާއްޖެ އަށް ޑޮލަރު ވަންނަ މިންވަރު ދަށްވެ އިގްތިސާދަށް އައިސްފައިވާ ބަދަލާއި ކޮވިޑާ-19އާ ގުޅުގެން ރާއްޖޭގެ ދަރަނި އިތުރުވެފައިވާ މިންވަރަށް ބަލާފައި ކަމަށެވެ.

advertisement

ފިޗުން ފާހަގަކޮށްފައިވާ ބައެއް ކަންކަމުގެ ތެރޭގައި ބޭރުގެ މާލީ އެހީ ރާއްޖެ އަށް ލިބުނު ނަމަވެސް ބޭނުންކުރަން ހުރި ބޭރު ފައިސާގެ އަދަދު ދަށްވުން ހިމެނެއެވެ. އަދި ޓުއަރިޒަމް ރަނގަޅު ނުކޮށް ބޭރު ފައިސާ ލިބޭނެ މަގެއް ނެތުމުން ބޭރުގެ ގައުމުތަކަށް ވަރަށް ބޮޑަށް ބަރޯސާ ވާންޖެހިފައިވާ ކަން ފިޗުން ފާހަގަކޮށްފައި ވެއެވެ.

ފިޗްގެ މި ރިޕޯޓަށް ރައްދު ދީ ފިނޭންސް މިނިސްޓްރީން އާންމުކުރި ބަޔާނެއްގައި ބުނެފައި ވަނީ ދަރަނި އަދާކުރުމުގައި ރާއްޖެ “ޑިފޯލްޓް” ވެފައި ނުވާ ކަމަށާއި ކުރިއަށް އޮތްތަނުގައި ވެސް އެކަން އެ ގޮތުގައި ދެމެހެއްޓޭނެ ކަމަށެވެ. އަދި ސޮވެރިން ބޮންޑްތަކަށް ވެސް އުސޫލާ އެއްގޮތަށް ވަގުތަށް ފައިސާ ދެއްކުމުގައި ދެމި އޮންނާނެ ކަމަށް ވެސް ބުނެފައި ވެއެވެ.

ކޮވިޑް-19ގެ ހާލަތުން އަރައިގަތުމުގައި ރާއްޖެ ކުރިއެރުންތަކެއް ހޯދަމުން އަންނަ ކަމަށާއި ޖުލައި 15 އިން ފެށިގެން ޓުއަރިޒަމް ވެސް ފަށައިގަނެ އަދި ހަލުވި ބާރު މިނެއްގައި ހަމައަކަށް އެޅެމުން އަންނަކަން ފިނޭންސްގެ ބަޔާނުގައި ފާހަގަކޮށްފައި ވެއެވެ. އެ ގޮތުން ރާއްޖެ އަންނަ ޓުއަރިސްޓުންގެ އަދަދު މަހުން މަހަށް އިތުރުވަމުން އަންނަ ކަމަށާއި 2،000 އިން މިހާރު 21،000 އަށް އިތުރުވެފައިވާ ކަމަށް ބަޔާނުގައި ފާހަގަކޮށްފައި ވެއެވެ.

ފިނޭންސްގެ ބަޔާނުގައި ބުނެފައި ވަނީ މާޗް މަހު ރޭޓް ދަށްކުރި ފަހުން ވޭތުވެ ދިޔަ މަސްތަކުގައި އިގްތިސާދީ ހާލަތު ދަށްވަމުން ދިޔަކަން ފިޗުން ފާހަގަކޮށްފައިވާ އިރު އިންޑިއާ އާއި ޖަޕާނާއި އޭޝިއަން ޑިވެލޮޕްމަންޓް ބޭންކް، ވޯލްޑް ބޭންކް ގްރޫޕް، އިސްލާމިކް ޑިވެލޮޕްމަންޓް ބޭންކް ގްރޫޕް، ޔޫރަޕިއަން އިންވެސްޓްމަންޓް ބޭންކް، އޭޝިއަން އިންފްރާސްޓަރަކްޗާ އިންވެސްޓްމަންޓް ބޭންކް، އޯޕެކް ފަންޑް ފޯ އިންޓަނޭޝަނަލް ޑިވެލޮޕްމަންޓް، އިންޓަނޭޝަނަލް މަނިޓަރީ ފަންޑް އަދި އެހެން ފަރާތްތަކުގެ އެހީތެރިކަމާ އެކު ފައިނޭޝިންގް ގެޕް ކުޑަކުރެވިފައިވާ ކަމަށެވެ.

ފިޗުން ލަފާކޮށްފައިވާ ގޮތުގައި ޓުއަރިޒަމްގެ މަސައްކަތްތައް ފެށިފައި ވިޔަސް މުޅިން ރަނގަޅުވާނީ 2022 ގައެވެ. އަދި ކޮވިޑް-19ގެ ސަބަބުން ރާއްޖޭގެ ޓުއަރިޒަމަށް ލިބޭ ގެއްލުން 2004ގެ ސުނާމީ އާއި 2009 ވަނަ އަހަރުގެ ފައިނޭޝަލް ކްރައިސިސް އަށް ވުރެ ބޮޑުވާނެއެވެ.