ހުޅުމާލެ މަގުތައް ހެދުމަށް 19 މިލިއަން ޑޮލަރުގެ ލޯނެއް!

ހުޅުމާލޭގެ މަގުތައް ހެދުމަށް 19.2 މިލިއަން ޑޮލަރުގެ ލޯނެއް ނެގުމަށް ހައުސިން ޑިވެލޮޕްމަންޓް ބޭންކް (އެޗްޑީސީ) އަށް ދައުލަތުން ސޮވެރިން ގެރެންޓީ ދީފިއެވެ.

ފިނޭންސް މިނިސްޓްރީގެ ދަރަނީގެ ތަފާސް ހިސާބުތައް ދައްކާ ގޮތުން މި ގެރެންޓީ ދީފައި ވަނީ މިދިޔަ މަހުގެ ތެރޭގައެވެ. ގެރެންޓީ ދީފައި ވަނީ އިންޑިއާގެ އެގްޒިމް ބޭންކުން 19.2 މިލިއަން ޑޮލަރު (295.6 މިލިއަން ރުފިޔާ)ގެ ލޯނެއް ނެގުމަށެވެ.

advertisement

މިއީ ފުރަތަމަ ފިޔަވައްސާއި ދެ ވަނަ ފިޔަވަހީގެ ބައެއް މަގުތައް ތަރައްގީކުރުމަށް ނަގާ ލޯނެކެވެ. މީގެ ކުރިން އިންޑިއާގެ މޯހަން މުތާ އެކްސްޕޯޓް އާއި އަޝޯކާ ބިލްޑްކޮމްއާ ގުޅިގެން އުފައްދާފައިވާ ޖޮއިންޓް ވެންޗާއަކާ ހަވާލުކޮށްގެން ދެ ވަނަ ފިޔަވަހީގެ ގިނަ މަގުތަކެއް ވަނީ ނިންމާފައެވެ. މިއީ 40.3 މިލިއަން ޑޮލަރު (621.4 މިލިއަން ރުފިޔާ)ގެ މަޝރޫއެކެވެ.

ދެ ވަނަ ފިޔަވަހީގެ ގިނަ މަސައްކަތްތަކެއް މިހާރު ވެސް ހަލުވިކަމާ އެކު ކުރިއަށް އެބަދެއެވެ. އެ ގޮތުން ހަދާފައިވާ މަގުތަކާ އެކު ޕާކިން ޒޯންތައް ކަނޑައެޅުމުގެ މަސައްކަތް ވެސް އަންނަނީ ކުރަމުންނެވެ. ހުޅުމާލޭ އިރުމަތީ ފަރާތުން ގޮނޑޮދޮށާވީ ސަރަހައްދުގެ ބައެއް އާންމުންނަށް މިހާރު ވެސް ހުޅުވާލާފައިވާ އިރު ކުރިއަށް އޮތް ދުވަސްތަކުގައި އިތުރު ސަރަހައްދުތައް ހުޅުވާލުމަށް އެޗްޑީސީން އަންނަނީ މަސައްކަތްތަކެއް ކުރަމުންނެވެ. އެ ގޮތުން މިދިޔަ ސަރުކާރުން ފެށި ހިޔާ މަޝްރޫއުގެ ދަށުން ތަރައްގީކުރާ ފްލެޓްތައް އަންނަ އަަހަރުގެ ކުރީކޮޅު މީހުންނާ ހަވާލުކުރުމަށް މަސައްކަތްކުރަމުން އަންނަ އިރު އެ ސަރަހައްދުގައި މީހުން ދިރިއުޅެން ފެށުމުގެ ކުރިން އާންމު ހިދުމަތްތައް ހަމަޖެއްސުމަށް ވެސް އެޗްޑީސީން އަންނަނީ މަސައްކަތްތަކެއް ކުރަމުންނެވެ.