ދަރިންނަށް ވަގުތު ދިނުން؛ އަބަދު އެކުގައި ތިބިނަމަވެސް ވަގުތު ދެވޭބާ؟

ދަރިންނަކީ ކޮންމެ މަޔަކާއި ބަފައެއްގެވެސް ލޮލުގެ ނޫރު ކަމުގައި ވީހިނދު އެކުދިން ރަނގަޅު ގޮތުގައި އުފާވެރިކަމާއެކު ބޮޑުކުރުން އެއީ ކޮންމެ ބެލެނިވެރިޔަކުވެސް ހިތާހިތުން ކުރާނެ ދުޢާކަން ކަށަވަރެވެ. އަދި ހަމަ އެއާއެކު އެކުދިންނާއެކު އުފާވެރި ވަގުތުތަކެއް ހޭދަ ކުރުމީ ކޮންމެ މަންމައެއް އަދި ބައްޕައެއްގެ ވެސް އުއްމީދަކަށް ވާނެކަން ކަށަވަރެވެ. އަދި މިގޮތަށް ވަގުތު ހޭދަކުރުން އެއީ ކޮންމެ ކުއްޖަކު ވެސް އުފާވެރިކަމާއެކު ދުޅަހެޔޮ ސިއްޙަތެއްގައި ހެދިބޮޑުވުމަށް ކޮންމެހެންވެސް ބޭނުންތެރި ކަމެކެވެ. އެހެންނަމަވެސް ބައެއްފަހަރު ކުދިންނާއެކު ވަގުތު ހޭދަކުރުން އަޅުގަނޑުމެންނަށް މާނަކުރެވިފައިވަނީ އެކުދިންނާއެކު އެއްފުރާޅެއްގެ ދަށުގައި ގިނަވަގުތު ތިބުން ކަމުގައެވެ. ނަމަވެސް އަޅުގަނޑުމެން މިއަދު އަމިއްލަ ނަފުސާ ކޮށްލަން ޖެހޭ ސުވާލަކީ 24 ގަޑިއިރު ކުދިން ގާތުގައި ގޭގައި ތިބޭ ތިބުން އެއީ އެކުދިންނާއެކު ހޭދަކުރެވޭ ވަގުތަކަށް ވާނެތޯއެވެ.

advertisement

މިއަދު އަޅުގަނޑުމެންގެ ސިޓިންރޫމްތަކުން ފެންނަމުންދާ މަންޒަރުތަކާ އަޅުގަނޑުމެން ބޮޑުވެގެން އައިއިރު ފެނިގެންދިޔަ މަންޒަރާ ހާސްބައި ތަފާތެވެ. ނުވަދިހައިގެ އަހަރުތަކުގައި ގޭގެ ފެންޑާތަކުން ފެނިގެން ދިޔައީ އެކަކު އަނެކަކާ ވާހަކަ ދެއްކައި ހީސަމާސާ ކުރުމާއި އެންމެން އެއްކޮށް ބައިވެރިވެގެން ކުޅޭ ކުޅިވަރުތަކުން ޢާއިލީ ގުޅުންތައް ބަދަހިވެގެންދިޔަ މަންޒަރެވެ. އެހެންނަމަވެސް މިއަދު މިވަނީ މަންޒަރު މުޅިން ބަދަލުވެފައެވެ. ގޭގައި ހުންނަ ކޮޓަރިތައް ގިނަވެ، ކޮންމެ މީހަކުވެސް އެމީހެއްގެ ކޮޓަރިތެރޭގައި އަމިއްލަ މިނިވަންކަމާއެކު ވަގުތު ހޭދަކުރަން އާދަވެފައިވާއިރު އެންމެ ހަނގު ކުއްޖާ ވެސް މިއަދު ބޭނުންވަނީ އެކުދިންނަށް ޚާއްސަ ކުރެވިފައިވާ އަމިއްލަ ކޮޓަރީގައި މިނިވަންކަމާއެކު ވަގުތު ހޭދަކުރާށެވެ. މިއީ ތަހުޒީބު މުޖުތަމަޢު އަޅުގަނޑުމެންނާ ހަމައަށް ގެނެސްދިން ތަރައްޤީ ކަމާމެދަކު ޝައްކެއްނެތެވެ. ތިމާގެ ވަށައިގެންވާ ޙަޤީޤީ ދިރުންތަކާ ދުރުހެލިވެ އިޖުތިމާޢީ ވިއުގައިގެ ތަފާތު މަންސަތަކުގެ އަވައިގައިޖެހި މިއަދުގެ ޖީލު މިއަދުމިވަނީ ގެއްލިފައެވެ. ގޭގެ ފެންޑާގައި މައިންބަފައިންނާއެކު 3 ކުދިން ތިބިނަމަ މަންމަ އިންނާނީ ޓީވީ އަށް ގެއްލިފައެވެ. ބައްޕަ އިންނާނީ ފޯނަށް ގެއްލި ހުސްވެފައެވެ. އެއްކުއްޖަކު އައިޕެޑުގެ ދުނިޔޭގައި އުޅޭއިރު އަނެއް ދެކުދިން ކޮންމެވެސް ކަހަލަ ވީޑިއޯ ގޭމެއްގައި ގެއްލި ހުސްވެފައި ތިބޭ މަންޒަރަކީ މިހާރު ކޮންމެ ގެއަކުންވެސް ފެންނާނެ އެންމެ ޢާންމު އެއް މަންޒަރަކަށް މިވަނީ ވެފައެވެ. ވަޔަރލެސް ހެޑްސެޓް އަޅައިގެން ތިބޭއިރު އެކަކު އަނެކަކަށް މިތިބެވެނީ އެއްފުރާޅެއްގެ ދަށުގައިކަންވެސް އިޙްސާސް ނުވެ މުޅިދުވަސް ހޭދަވެގެންދާ ދިޔުމަކީ ވަރަށް އާދައިގެ ކަމެއްގެ ގޮތުގައި ބެލެވި އެ އާދަ “ޅަކަށިތަކުގައި” މިވަނީ ވަކި ހިއްޕާލާފައެވެ. އެހެންކަމުން އަޅުގަނޑުމެން މިއަދު ވިސްނަންވީ މި އާދަތައް ބަދަލުކޮށް ދަރިންނާއެކު ގޭގައި ހޭދަކުރެވޭ ވަގުތުތަކުގެ ބޭނުން އެންމެ އެދެވޭ ގޮތުގައި ހިފޭނެ ގޮތަކާމެދުގައެވެ. އެއީ ދަރިންނާއެކު ހޭދަކުރަން ލިބޭ އެންމެ ގަޑިއިރެއް ވެސް އެކަށީގެންވާ ގޮތުގައި ހޭދަކުރެވިއްޖެނަމަ މި ދެންނެވި ފަދައިން ހޭދަކުރެވޭ 24 ގަޑިއިރަށް ވުރެވެސް ފައިދާ ބޮޑުވާނެތީއެވެ.   

ދަރިންނާއެކު ހޭދަކުރެވޭ ވަގުތުތަކަކީ މާނަވީ ވަގުތުތަކަކަށް ހެދުން

ބައެއް މައިންބަފައިންނަކީ ދަރިންނާއެކު މުޅިދުވަސް އެއްފުރާޅެއްގެ ދަށުގައި ހޭދަކުރާ މައިންބަފައިންނަށް ވީއިރު، އަނެއްބައި މައިންބަފައިންގެ ގިނަވަގުތުތަކެއް ހޭދަކުރަނީ ވަޒީފާ ނުވަތަ އެނޫނަސް ތަފާތު ކަންކަމުގައި ގެއިންބޭރުގައެވެ. ވަޒީފާއަށް ނުގޮސް ގޭގައި އުޅުނުކަމުގައި ވިޔަސް ކޮންމެ ބެލެނިވެރިޔަކީ ވެސް އެކި ކަންކަމުގައި ވަރަށް ބުރަކޮށް މަޝްޢޫލުވެގެން އުޅެން ޖެހިފައިވާ ފަރާތެކެވެ. އެހެންކަމުން ދަރިންނާ އެކު ހޭދަކުރެވޭ ވަގުތު އެއީ ހަމަ ހަޤީގަތުގައިވެސް ދަރިންނާއެކު ހޭދަކުރެވޭ ވަގުތުކަން ކަށަވަރު ކުރަން އަޅުގަނޑުންމެން ކޮންމެ ބެލެނިވެރިޔަކުވެސް މިއަދު މަސައްކަތް ކުރަންޖެހެއެވެ. އެގޮތުން ދަރިންނާއެކު ހޭދަކުރެވޭ އެންމެ ކުޑަ ވަގުތުކޮޅަކީ ވެސް މާނަހުރި، ކުދިންނަށް ހުސްކޮށްލެވޭ ވަގުތުތަކަކަށް ހެދުން ވަރަށް މުހިއްމެވެ. މިގޮތުން ކުދިންނާއެކު މާނަވީ ވަގުތުތަކެއް ހޭދަކުރުމަށް ކުރެވިދާނެ ބައްކަންތައް ހިއްސާކޮށްލާނަމެވެ.

ކޮންމެ ދުވަހަކުވެސް ކަނޑައެޅޭ ވަކިވަގުތެއް ކުދިންނާއެކު ހޭދަކުރުން

ކުދިންނާ މަޝްވަރާކުރުމަށްފަހު ކޮންމެ ދުވަހަކުވެސް ވަކި ވަގުތުކޮޅެއް އެއްކޮށް ހޭދަކުރުމަށް ނިންމިދާނެ އެވެ. މިގޮތުން ކަނޑައެޅޭ ވަގުތުކޮޅަކީ ހަޤީޤީ މާނައިގައި ދެފަރާތުންވެސް ހިތްހަމަ ޖެހިގެން އުފަލާއެކު އެކު ހޭދަކުރެވޭ ވަގުތަކަށް ވުން މުހިއްމެވެ. މިގޮތަށް ކަނޑައަޅާ ވަގުތު ވާންޖެހޭނީ ކިޔެވުމާއި ފޯނަށް ޖަވާބު ދިނުމާއި އެއްވެސް ގެޒެޓެއް ބޭނުން ކުރުން ފަދަ ކަންކަމުން ދުރުހެލިވެ ކަނަޑައެޅޭ މިަވަގުތު ކޮޅުގައި އެންމެން އެއްތަނެއްގައި ތިބެގެން ވާހަކަ ދައްކައި ހީސަމާސާ ކުރުމާއެކު އެންމެން އެއްކޮށް ކުރާހިތްވާ ކަންކަމަށް ވަގުތު ދެވިގެންދާ ވަގުތު ކޮޅަކަށެވެ. މިފަދައިން ދުވާލަކު 30 މިނިޓް ހޭދަ ކުރެވުނު ކަމުގައި ވިޔަސް އެކަކު އަނެކަކަށް އަނގައިން ނުބުނެ ތަފާތު ކަންކަމުގައި މަޝްޢޫލުވެގެން އެއްތަނެއްގައި ތިބެގެން ހޭދަކުރާ ތިން ހަތަރު ގަޑިއިރަށްވުރެ ފައިދާ ބޮޑުވާނެކަން ކަށަވަރެވެ. އަބަދުވެސް ހަނދާން ކުރަންޖެހެނީ ދަރިންނާއެކު ވަގުތު ހޭދަކުރެވޭ މިންވަރަށްވުރެ މުހިންމީ މާނަވީ ވަގުތުތަކެއް އެކުދިންނާއެކު ހޭދަކުރުން ކަމެވެ.

މީގެ އިތުރުންވެސް ދަރިންނާއެކު ހޭދަކުރެވޭ ވަގުތުތަކުގައި ފޮތްކިޔުމާއި ފިލްމު ބެލުން ނުވަތަ އެންމެން އެއް މޭޒުދޮށެއްގައި ތިބެގެން ކެއުމަކަށް އިންސާފުކޮށްލުމާއި އެންމެންއެކުގައި  ދާހިތްވާ ތަނަކަށް ދިއުން ފަދަ ކަންކަމަކީ ކުދިންނާ އެކު މާނަވީ ވަގުތުތަކެއް ހޭދަކުރުމަށް ކުރެވިދާނެ ވަރަށް އާދައިގެ ކަންކަމެވެ. އަޅުގަނޑުމެން މައިންބަފައިން ޤަބޫލުކުރަންޖެހޭ ޙަޤީޤަތަކީ ކުދިން ކުދިންގެ ގޮތުގައި ތިބޭނީ މަދު ދުވަސްތަކެއްގައި ކަމާއި މިއަދު އެކުދިން އަޅުގަނޑުމެންގެ ވަގުތު ބޭނުންވެގެން އުޅޭ ފަދައިން މާދަމާ އެކުދިންގެ ވަގުތު ބޭނުންވެގެން އުޅެނީ އަޅުގަނޑުމެންނެވެެ. އެހެންކަމުން އެކުގައި ވަގުތު ހޭދަކުރުމުގެ އާދަ ޢާއިލާ ތެރޭގައި ހަރުލެއްވުމަކީ މުޅި ޢާއިލާގެ މުސްތަޤްބަލު އުޖާލާކުރުމަށް ކޮންމެހެންވެސް ކުރަންޖެހޭ ކަމެކެވެ.

ކުދިންގާތުގައި ލޯބިވާ ވާހަކަ ބުނެ އެކުގައި ވަގުތު ހޭދަކުރަން ބޭނުންވާކަން ހާމަކުރުން

އަދުގެ ހާލަތަށް ބަލާއިރު، ބުރަކޮށް އުޅެންޖެހުމުން ކޮންމެ ދުވަހަކު އެއްވަރަކަށް ކުދިންނާއެކު ވަގުތު ހޭދަކުރުން އެއީ ފަސޭހަކަމަކަށްނުވެދާނެއެވެ. އެހެންނަމަވެސް ކުދިންނާއެކު ހޭދަކުރާނެ ވަގުތު ނުލިބުނު ކަމުގައިވިޔަސް މައިންބަފައިން އެކުދިންނާއެކު ވަގުތު ހޭދަކުރަން ބޭނުންވާ ކަމުގެ އިޙްސާން ކުދިންނަށް ކޮށްދިނުމަކީ ނުހަނު ބޭނުންތެރި ކަމެކެވެ. އަދި ހަމައެއާއެކު ބުރަކޮށް މަސައްކަތްކުރުމުގައި އުޅޭ އުޅުމަކީ އެކުދިންނަށާއި މުޅިޢާއިލާ އަށްވެސް ރަނގަޅުގޮތް ހޯދައިދިނުމަށް ހޭދަކުރެވޭ ވަގުތުތަކެއްކަން ކުދިންނަށް ވިސްނައިދެވޭނަމަ އެކުދިންގެ ނުތަނަވަސްކަން ކުޑަވާނެއެވެ.

މިގޮތުން އާންމު ޙާލަތަށްވުރެ ބުރަކޮށް އުޅޭ ދުވަސްތަކުގައި ގެޔަށް ނުދެވޭނަމަ ކުދިންނަށް ގުޅައިގެން އެކުދިންގެ ޙާލު ބަލައި ކުދިންތިބީ ކައިގެންތޯ، ކުރަނީ ކޮންކަމެއްތޯ، އަދި ބޭނުންވާ އެއްވެސް ކަމެއް އޮތްތޯ ބަލާނަމަ އެކުދިންނާ އަޅާލާ ކަމުގެ އިޙްސާސް ކުރެވޭނެއެވެ. އަދި މިކަމަކީ މަންމަ ނުވަތަ ބައްޕަ، ދެމީހުންކުރެ އެކަކުގެ ޒިންމާއެއްކަމަށް ނުބަލައި ދެމީހުންވެސް މިކަމުގައި އެންމެ ފުރިހަމައަށް ޒިންމާ އަދާކުރަން ޖެހެއެވެ. އަދި ހަމަ އެފަދައިން އަވަދިނެތި އުޅޭ ވަގުތުތަކުގައި ކުދިންނަށް “ސަރޕްރައިޒެއްގެ” ގޮތުން ކުދިން ކާހިތްވާ ކަހަލަ އެއްޗެއް ގެޔަށް ފޮނުވާލަ ދެވިދާނެއެވެ. އަދި މިހެން ފޮނުވާއިރު ރީތި މެސެޖެއް ލިޔެ، ކުދިން ދެކެ ލޯބި ވާހަކައާއި އެއްކޮށް ވަގުތު ހޭދަކުރަން ބޭނުންވާކަމާއި ކުދިން މަތިން ހަނދާންވާ ވަހަކަ ލިޔެލާފައި ފޮނުވުން ވެގެންދާނީ އެކުދިންގެ ހިތުގައި ޢުމުރަށް ބިންވަޅުނެގިގެންދާނެ ފަދަ މާނަފުން ކަމަށެވެ.

 ރަނގަޅު ކަމެއް ކުރުމުން އެކަން ފާހަގަކުރުން

ބެލެނިވެރިއެއްގެ ހައިސިއްޔަތުން އަޅުގަނޑުމެންނަށް އެންމެ ޢާންމުކޮށް ކަންކުރެވޭ ގޮތަށް ބަލާއިރު، ކުދިންގެ ފަރާތުން ފެންނަ ގޯސް ޢަމަލުތައް ވަރަށް ފަސޭހަކަމާއެކު ފާހަގަ ކޮށް އެވާހަކަ ދެކެވެއެވެ. ޚާއްސަ ގޮތެއްގައި ގިނަވަގުތު ގޭގައި ނެތިފައި ގެއަށް އާދެވޭ ވަގުތުތަކުގައި ކުދިންނަށް ނުކުރެވި ހުންނަ ކަންތަކުގެ ވާހަކަ ދެއްކުމާއި ގޯސްކޮށް ކުރެވިފައި ހުންނަ ކަންކަމުގެ ވާހަކަ ދެއްކުމަކީ ވަރަށް އާންމުކޮށް އަޅުގަނޑުމެންނަށް ކުރެވޭ ކަންކަމެވެ. އެހެންނަމަވެސް މީގެ ބަދަލުގައި ބަލަންޖެހެނީ ނުކުރެވި ނުވަތަ ގޯސްކޮށް ކުރެވިފައި ހުންނަ ގިނަ ކަންކަން ފެނުނުކަމުގައި ވިޔަސް ރަނގަޅު އެންމެ ކަމެއް ނަމަވެސް ހޯދައި އެކަމުގެ ވާހަކަ ފުރަތަމަ ކުދިންނާ ދައްކާލުމެވެ. މިއީ ދެފަރާތަށްވެސް ވަރަށް ބޮޑު ހިތްހަމަ ޖެހުމެއްލިބި ދެފަރާތުގެ ގުޅުން ވަރަށް ބޮޑަށް ބަދަހިވެގެން ދާނެކަމެކެވެ. ކުދިންނާ ބައްދަލުނުވެ ގިނަ އިރުތަކެއް ވުމަށްފަހު ދިމާވާ ވަގުތު އަބަދުވެސް ވާންޖެހޭނީ އުފާވެރި ހިތްހަމަޖެހޭ ވަގުތަކަށެވެ. ރަނގަޅު ކުރަންޖެހޭ ކަންކަމުގެ ވާހަކަ ދައްކަން ވާނީ ދެފަރާތުންވެސް ހިތްހަމަ ޖެހިގެން ތިބޭ ވަގުތެއްގައި އުފާވެރި މާޙައުލެއްގައެވެ. އޭރުން އެވާހަކަތައް އަޑުއަހަން ފަސޭހަވެ އަދި އެއާ އެއްގޮތަށް އަމަލު ކުރަންވެސް ފަސޭހަވުމާއެކު މައިންބަފައިންނާއި ކުދިން އެކުގައި ހޭދަކުރާ ވަގުތަކީ މަދުވަގުތު ކޮޅެއްކަމުގައި ވިޔަސް އުފާވެރި މަޢްނަވީ ވަގުތުތަކަކަށް ވެގެން ދާނެއެވެ.

ދަރިންނާއެކު ވަގުތު ހޭދަކުރެވޭ ގޮތަށް ދުވަހީ ތާވަލު ރާވާލުން

ޚާއްސަގޮތެއްގައި ވަޒީފާއަށްދާ ބެލެނިވެރިންގެ ދުވަހުގެ ތާވަލައަކީ ވަރަށްބޮޑަށް އެމީހުންގެ ބާރުން ބޭރުގައި ރޭވިގެންދާ އެއްޗެއްކަމުން އެތާވަލާއި އެއްގޮތަށް ކުދިންގެ ތާވަލް ރާވައި އެއާ އެއްގޮތަށް އަމަލުކުރުމަކީ ވެސް ކޮންމެހެންވެސް ކުރަންޖެހޭކަމެކެވެ. މިސާލަކަށް މަންމަ ނުވަތަ ބައްޕަ ގެއަށް ދިއުމުން ސްކޫލްގެ މަސައްކަތްތައް ނިންމައި ފިލާވަޅު ނިންމަން ކުދިންގާތު ބުނުމުގެ ބަދަލުގައި އެކަނި މަސަތްކަތް ނިންމޭވަރުގެ ކުދިންނަމަ މައިންބަފައިން ގެއަށް އަންނަންވާއިރަށް އެމަސައްކަތް ނިންމާލުމުން ދިމާވާ ގަޑިގައި އެއްކޮށް ވަގުތު ހޭދަކުރުމުގެ ފުރުސަތު އިތުރުވެގެންދެއެވެ. ހަމަ މިގޮތަށް ޓިއުޝަން ގަޑިތައްވެސް ބެލެނިވެރިން ގެއިންބޭރުގައި އުޅޭ ވަގުތު ތަކުގައި ހަމަޖެއްސޭނަމަ އެގޮތަށް ކަންކުރުމަކީ އެކުގައި ހޭދަކުރަން ލިބޭ ވަގުތު އިތުރުވެގެން ދާނެކަމެކެވެ.

އެއްކޮށް ކުރެވޭ ކަންކަން ކުދިން ބައިވެރި ކޮށްގެން ކުރުން

ކޮންމެ ކަމަކީ މުޅި ޢާއިލާގެ އެންމެން ބައިވެރިކުރެވޭ ކަމަކަށް ނުވިކަމުގައި ވިއަސް ކުދިން ބައިވެރިކޮށްގެން ކުރެވޭ ކަންކަމުގައި އެކުދިން ހިއްސާކުރުން ވަރަށް މުހިއްމެވެ. މިސާލަކަށް ކެއްކުން، ކަސްރަތް ކުރުން، ޢާއިލީ ގޭގެއަށް ޒިޔާރަތްކުރުން ފަދަ ގިނަކަންކަމަކީ ކުދިން ބައިވެރިކޮށްގެން ކޮށްފިނަމަ އެކަންކަމުގެ ސަބަބުން އެކުގައި ހޭދަކުރެވޭ ވަގުތު އިތުރުވެ ޢާއިލީ ގުޅުންވެސް އިތުރުވެގެންދާނެ ކަންކަމެވެ. އޮފީހުގައި ވެސް އާދަޔާ ޚިލާފަށް ގިނަވަގުތު ހޭދަކުރަންޖެހޭ ޙާލަތްތަކުގައި ކުދިން ގޮވައިގެން އޮފީސް ކަންކަމުގައި ބައިވެރިވުމުގެ ފުރުސަތު އޮންނަނަމަ އެކަން އެގޮތަށް ކުރުމުން ގިނަވަގުތުތަކެއް އެކުގައި ހޭދަކުރެވުމުގެ އިތުރުން ބެލެނިވެރިން ކުދިންނާއި ދުރުގައި ހޭދަކުރާ ވަގުތުތައް ބަލައިގަންނަން އެކުދިންނަށް ފަސޭހަވެގެން ދެއެވެ.

އެހެންކަމުން އަޅުގަނޑުމެން ވިސްނަންވީ ހޭދަކުރެވޭ ވަގުތުކޮޅު ކިތަންމެ ކުޑަ ކަމުގައިވިޔަސް އެވަގުތުކޮޅަކީ އުފާވެރިކަމާ ހިތްހަމަ ޖެހުމާއެކު ހޭދަކުރެވޭ މަޢްނަވީ ވަގުތުތަކަކަށް ހެދުމަށެވެ. ޝައްކެއްނެތް ގޮތުގައި ކުދިންނާއެކު ވީހާވެސް ގިނަވަގުތެއް ހޭދަކުރުމުކީ ނުހަނު ބޭނުންތެރި އަދި ކޮންމެ ބެލެނިވެރިޔަކުވެސް ނުހަނު ކުރަން ބޭނުންވާނެ ކަމެކެވެ. އެހެނަސް ހާލަތު ނިޔާކުރާގޮތުން އެންމެ ބޭނުންވާ ވަރަށް ކޮންމެ މަންމައަކާއި ބައްޕައަކަށް ވަގުތު ނުދެވުނު ކަމުގައިވިޔަސް ދެވޭ ވަގުތަކީ އޭގެ ހަޤީޤީ މާނައިގައި އެންމެ ފައިދާ ހުރިގޮތުގައި ދެވޭ ވަގުތަކަށް ހެދުމަކީ އަޅުގަނޑުމެންގެ ތެރެއިން ކޮންމެ ބެލެނިވެރިޔަކަށް ވެސް ކުރެވިދާނެ ކަމެކެވެ. އަޅުގަނޑުގެ ދުޢާއަކީ ކޮންމެ ކުއްޖަކީ އުފަލާއި ލޯބި ލިބިގެން ބޮޑުވާ، ރިވެތި އަދަބުތަކުން ޒީނަތްތެރިވެފައިވާ، މުޖުތަމަޢަށް ފައިދާ ހުރި ކުއްޖެއްކަމުގައި ލެއްވުމެވެ.