އިތުރު ޓެލެކޮމް ކުންފުންޏަކަށް ހުއްދަ ދެނީ!

މުވާސަލާތީ ހިދުމަތް ދޭ އިތުރު ކުންފުންޏަކަށް ހުއްދަ ދިނުމަށް ސަރުކާރުން ނިންމައިފިއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓްގައި ވެސް އެކަން ވަނީ ހިމަނާފައެވެ. ޓެލެކޮމިއުނޭޝަން މިނިސްޓަރު މުހައްމަދު މަލީހް ޖަމާލް ބައެއް މީޑިއާތަކަށް ވިދާޅުވެފައިވާ ގޮތުގައި އާ ޓެލެކޮމް ކުންފުންޏަކަށް ހުއްދަ ދިނުމަށް އިކޮނޮމިކް ކައުންސިލުން ނިންމާފައިވާ ކަމަށާއި ވަރަށް އަވަހަށް އެ މަސައްކަތް ފައްޓަވާނެ ކަމަށެވެ.

advertisement

މި ވަގުތު ރާއްޖޭގައި މުވާސަލާތީ ހިދުމަތް ދޭ ތިން ކުންފުންޏެއް ހަރަކާތްތެރިވެ އެވެ. އެއީ ދިރާގާއި، އުރީދޫ އަދި ރާއްޖެ އޮންލައިން އެވެ. ކުރިން ހަމައެކަނި ދިރާގުން ހިދުމަތް ދެމުން އަންނަނިކޮށް އުރީދޫ އާއި ރާއްޖެ އޮންލައިން އަށް ހުއްދަ ދިނުމާ އެކު ފޯނާއި އިންޓެންގެ އަގު ބޮޑު ތަނުން ހެޔޮވެގެން ދިޔައެވެ. ނަމަވެސް އަދިވެސް އިންޓަނެޓްގެ އަގު ބޮޑުކަމުގެ ޝަކުވާތަކަށް ނިމުމެއް ނާދައެވެ.

ފިނޭން މިނިސްޓަރު އިބްރާހީމް އަމީރު މިއަދު މަޖިލީހަށް ބަޖެޓް ހުށަހަޅުއްވަމުން ވިދާޅުވީ ދައުލަތަށޤ އިތުރު އާމްދަނީ ހޯދުމުގެ ގޮތުން ޓެލެކޮމް ލައިސަންސަށް ބަދަލު ގެނައުމާއި ފްރެކުއެންސީ ސްޕެކްޓްރަމް ޗާޖެއް ނެގުން ހިމެނޭ ކަމަށެވެ. ޓެލެކޮމް ގާނޫނު ބުނާ ގޮތުން ޓެލެކޮމްގެ އާ ލައިސަންސަކަށް ހުއްދަ ދެއްވޭނީ ހަމައެކަނި ރައީސުލް ޖުމްހޫރިއްޔާ އަށެވެ.

ފިނޭންސް މިނިސްޓްރީން އަންދާޒާކުރާ ގޮތުގައި މި ބަދަލާ އެކު ދައުލަތަށް 300 މިލިއަން ރުފިޔާ ލިބިގެންދާނެއެވެ.