އަންނަ އަހަރު ވެސް ގިނަ ދަރަނިތަކެއް، ވަޒީރު ވިދާޅުވަނީ ހާސްނުވާން!

އަންނަ އަހަރު ދައުލަތުން ލަފާކުރާ ބަޖެޓްގައި ވެސް ގިނަ ދަރަނިތަކެއް ހިމެނިފައިވީ ނަމަވެސް ދަރަނި ދެއްކޭނެ ކަމުގެ ޔަގީންކަން އެބަ އޮތް ކަމަށް ފިނޭންސް މިނިސްޓަރު ވިދާޅުވެއްޖެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހެޅުއްވުމަށް ފަހު ފިނޭންސް މިނިސްޓަރު އިބްރާހީމް އަމީރް ވިދާޅުވީ ކޮވިޑް-19ގެ ސަބަބުން ރާއްޖޭގެ އިގްތިސާދަށް ކޮށްފައިވާ އަސަރު ބޮޑުކަމަށާއި އޭގެ ސަބަބުން ރާއްޖޭގެ އުފެއްދުންތެރިކަން ދަށްވެ އިގްތިސާދު ނެގެހެއްޓުމަށް ކުރާ މަސައްކަތުގައި ދަރަނި ވަރަށް ބޮޑުވެފައިވާ ކަމަށެވެ. ނަމަވެސް ދިވެހި ސަރުކާރުން ޑިފޯލްޓް ނުވެ ދަރަނި އަދާކުރާނެ ކަމުގެ ޔަގީންކަން ވަޒީރު ވަނީ ދެއްވާފައެވެ.

advertisement

މިނިސްޓަރު މިހެން ވިދާޅުވި ނަމަވެސް އަންނަ އަހަރު ވެސް ގިނަ ދަރަނިތަކެއް ނެގުމަށް ބަޖެޓްގައި ހިމަނާފައި ވެއެވެ. އަދި ދައުލަތުގެ ބަޖެޓް 15.5 ބިލިއަން ރުފިޔާ އިން ޑެފިސިޓްވާނެ ކަަމަށް ލަފާކޮށްފައި ވެއެވެ. އެހެންކަމުން ދަރަނި އިތުރަށް ބޮޑުވާނެއެވެ.

އަންދާޒާކޮށްފައިވާ ގޮތުން ރާއްޖޭގެ ދަރަނި އަންނަ އަހަރު 82.8 ބިލިއަން ރުފިޔާ އަށް އަރާނެއެވެ. މި އަހަރު ނިމޭ އިރު ދަރަނި ހުންނާނީ 50 ބިލިއަން ރުފިޔާގައި ކަމަށް ކުރިން އަންދާޒާކުރި ނަމަވެސް މިހާރު ލަފާކޮށްފައިވާ ގޮތުން މިއަދަދު 70 ބިލިއަނަށް ވުރެ މައްޗަށް ދާނެއެވެ.

ފިނޭންސް މިނިސްޓްރީން އަންނަ އަހަރަށް ލަފާކޮށްފައި ވަނީ 34.7 ބިލިއަން ރުފިޔާގެ ބަޖެޓެކެވެ. ނަމަވެސް އާމްދަނީގެ ގޮތުގައި ލިބޭނެ ކަމަށް ލަފާކޮށްފައި ވަނީ 17.8 ބިލިއަން ރުފިޔާއެވެ. އެހެންކަމުން ބާކީ ބައި ހަމަޖައްސަަންޖެހޭނީ ދަރަނި ނަގައިގެންނެވެ.

މިނިސްޓަރު ވިދާޅުވީ ގައުމަށް ދިމާވެފައިވާ ހާލަތުން މި ވަގުތު ދަރަނި މައްޗަށް ދާނެ ކަަމަށެވެ. ނަމަވެސް ދިގު ރާސްތާގެ ޕްލޭންގައި ދަރަނި ކުޑަކުރުމަށް ރާވާފައިވާ ކަމަށާއި ޖިޑީޕީ އިތުރުކޮށް އެކަންކުރެވޭނެ ކަމުގެ ޔަގީންކަން އެބަ އޮތް ކަމަށެވެ.

ދައުލަތުގެ ދަރަނި ބޮޑުވާން މެދުވެރިވާ މައިގަނޑު ސަބަބަކީ އިގްތިސާދު ދަށްވުމުގެ ސަބަބުން ގިނަ ބައެއްގެ ވަޒީފާތައް ގެއްލި ބައެއް އިންޑަސްޓްރީތައް ވަރަށް ބޮޑަށް އިނދަޖެހިފައިވުމުން އެހީތެރިވުމުގެ ގޮތުން ދައުލަތުން އަޅަމުން ގެންދާ ފިޔަވަޅުތަކެވެ. މީގެ އިތުރުން އިގްތިސާދު ހިނގައިގަތުމަށް ބާރު އެޅުމުގެ ގޮތުން ސްޓިމިއުލަސް ޕްކޭޖްތައް ތައާރަފްކުރުން ފަދަ ކަންކަމަކީ ވެސް ދައުލަތުގެ ދަރަނި ބޮޑުވާން މެދުވެރިވާ ސަބަބުތަކެވެ.