އެޗްޕީއޭގެ ހޯމް ކަރަންޓީން އުސޫލުގައި ނަސްލީ ތަފާތުކުރުމެއް!

ކޮވިޑް-19 އަށް ރާއްޖޭގައި ފެތުރުން ކޮންޓްރޯލްކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ސަރުކާރުގެ ކަމާ ބެހޭ ފަރާތްތަކުން ގުޅިގެން ކުރި މަސައްކަތަށް ޝުކުރު ހައްގެވެ. ނަމަވެސް ފާއިތުވި ދުވަސްތަކުގައި އެޗްޕީއޭ އިން އުސޫލްތައް ކަނޑައެޅުމުގައި ގެންގުޅޭ ހަމަ ބުއްދި ގަބޫލުނުކުރެވޭ ކަންކަމުގެ ޝަކުވާތައް ދަނީ ފެންމަތިވަމުންނެވެ. ހާއްސަކޮށް އުސޫލްތައް ހެދުމުގައި ތަފާތުކުރުންތައް ގެންގުޅޭތީއެވެ. އެ ގޮތުން ބައެއް ފަރާތްތަކުން ބުނަމުން ދަނީ ރަށްރަށަށް ގޮސް ހޯމް ކަރަންޓައިންވާންޖެހޭ ގޮތަށް އެޗްޕީއޭ އިން މިހާރު ހަދާފައިވާ އުސޫލުގައި ނަސްލީ ތަފާތުކުރުންތައް ހިމެނޭ ކަމަށެވެ.

އެޗްޕީއޭގެ އުސޫލުގައި ބުނެފައި ވަނީ ޒަރޫރީ ބޭނުންތަކުގައި ނޫނަސް މާލެއިން ރަށްރަށަށް ދަތުރުކުރުމުގެ ހުއްދަ ލިބޭނެ އެވެ. ނަމަވެސް ހުއްދަ ދެނީ އެ ރަށަކަށް ގޮސް 14 ދުވަހުގެ ހޯމް ކަރަންޓީން ވާގޮތަށެވެ. ނަމަވެސް ބޭރު ގައުމަކުން އަންނަ ފަތުރުވެރިޔާ އަށް އެއްވެސް ހުރަހެއް ނެތި ރަށްރަށަށް ދަތުކުރު ކުރެވެއެވެ. އެއްވެސް ކަރަންޓީނެއް ވާކަށް ނުޖެހެއެވެ.

advertisement

“ޑޮލަރު ދޭ ފަތުރުވެރިޔާއާ ހަމަ އެއް ލޯންޗެއްގައި ޖެހިގެން އިންނަ ސީޓުގައި އިންނަ ދިވެހި މީހާ ރަށަށް ގޮސް އެބަޖެހޭ 14 ދުވަހު ކަރަންޓީނުވާން. އެކަމަކު އޭނާއާ އެކު ދަތުރުކުރި ފަތުރުވެރިޔާ ގޮސް ގެސްޓް ހައުސްގައި ހުންނާތީ އޭނާ އަށް މުޅި ރަށުގައި އުޅެވޭ. އަހަރެމެންގެ ބިމުގައި އަހަރެމެންނަށް މިނިވަން ކަމެއް ނެތް،” އެޗްޕީއޭގެ މި ސިޔާސަތާ މެދު ހިތްހަމަނުޖެހިފައި ހުރި މީހަކު ބުންޏެވެ.

ރާއްޖެ ތަރައްގީކޮށްފައި އޮތް ގޮތުން ކުދިކުދި ބޭނުންތަކުގައި އަދިވެސް މާލެ އަންނަންޖެހެއެވެ. ހާއްސަކޮށް ބޭސް ފަރުވާގެ ކަންކަމުގައެވެ. އެ ނޫން ވެސް އެތައް ބޭނުމެއްގައި މާލެ އަންނަންޖެހެއެވެ. ނަމަވެސް މާލެ އައުމަށް ފަހު އެނބުރި ރަށަށް ގޮސް 14 ދުވަހު ވަކިން ކަރަންޓީން ވާނެ ގޮތެއް ނެތިގެން މާލެ ނާދެވި، ބޭސްފަރުވާ ނުދެވި ތިބި އެތައް ބަޔަކު އެބަ ތިއްބެވެ. ވަކި ތަނެއްގައި ކަރަންޓީނުވުމަކީ ރަށްރަށުގައި އެހާ ފަސޭހަ ކަމެއް ނޫނެވެ. އެފަދަ އިންތިޒާމުތައް ހަމަޖެހިފައި ހުންނަނީ މަދުންނެވެ. ދެންޖެހެނީ ކޮންމެވެސް ތަނެއް ކުއްޔަށް ހިފަންށެވެ. ނަމަވެސް ދުވާލަކަށް 500 ވަރަކަށް ރުފިޔާ ހޭދަކޮށްގެން ކަރަންޓީނުވުމަކީ ރަށްރަށުގައި އުޅޭ މީހުންނަށް ފަސޭހަ ކަމެއް ނޫނެވެ. 15 ވަރަކަށް ދުވަހަށް 7،500ރ. ހޭދަކުރުމަކީ މިފަދަ އިގްތިސާދީ ގޮތުން ދަތި ދުވަސް ވަރެއްގައި ފަސޭހަ ކަމެއް ނޫނެވެ. އެހެންކަމުން ސިޔާސަތުތައް ކަނޑައެޅުމުގައި ރައްޔިތުންގެ ހާލަތަށް ރިއާޔަތްކުރަންޖެހެއެވެ.

ކޮވިޑް-19 ކޮންޓްރޯލް ކުރުމަށް ފިޔަވަޅުތައް އަޅަންޖެހެއެވެ. ނަމަވެސް ނަސްލީ ތަފާތުކުރުމަކަށް ވާ ގޮތަށް ނުވަތަ ދެރަ މީހާ އަށް ދެރަ ގޮތް މޮޅު މީހާ އަށް މޮޅު ގޮތް ވާ ގޮތަށް ކަރަންޓީނެގ އުސޫލްތައް ގެންގުޅުމަކީ ހަމަޖެހޭ ކަމެއް ނޫނެވެ. އެޗްޕީއޭ އިން ތަފާތު ކުރުން ގެންގުޅެނީ ހަމައެކަނި ފަތުރުވެރިންނާއި ދިވެހިންގެ މެދަކު އެކަންޏެއް ވެސް ނޫނެވެ. ސިޔާސީ ނުވަތަ އޮފީސްތަކުގެ ވެރިން ނުވަތަ ވެރިން ކަނޑައަޅާ ބަޔަކަށް ވެސް އެއްވެސް ހުރަހެއް ނެތި ރަށްރަށަށް ގޮސްފައި އަންނަންވީއެވެ. އެކި ބޭނުންތަކުގައި ފަސް ދުވަހަށް ވުރެ ގިނަ ނުވާ ގޮތަށް ރަށްރަށަށް ދިއުމުގެ އުސޫލެއް ވެސް އެޗްޕީއޭ އިން ކަނޑައަޅާފައި ވެއެވެ. ނަމަވެސް ފަސް ދުވަހުގެ ތެރޭގައި ކޮވިޑް އެހެން މީހެއްގެ ގަޔަށް ނުފެތުރޭނެ ކަމަށް ބުނާ ދިރާސާއެއް މިހާތަނަށް ހަދާފައެއް ނުވެއެވެ. އެހެންކަމުން މިއީ ވެސް ހަމަޖެހޭ އުސޫލެއް ނޫނެވެ.

އެޗްޕީއޭގެ މި ނިންމުމަށް ފާޑުކިޔާ ބައެއް ފަރާތްތަކުން ދެކޭ ގޮތުގައި ޕީސީއާރު ނެގެޓިވް ޓެސްޓެއް ހުށަހެޅުމުން ކަރަންޓީނުކުރުމަކާ ނުލައި ރަށްރަށަށް ދަތުރުކުރެވެންޖެހޭނެއެވެ. އެ ފުރުސަތު ފަތުރުވެރިންނަށް އޮންނަ އިރު ދިވެހިންނަށް ނުދޭންވީ ސަބަބެއް ނުވިސްނޭ ކަމަށް އެ ފަރާތްތަކުން ދެކެއެވެ.

“މިއީ ސީދާ ނަސްލީ ތަފާތުކުރުމެއް. ޑޮލަރު ދޭތީ އެ މީހުން (ފަތުރުވެރިން) ރަށުގެ ހުރިހާ ތަނެއްގައި ދުވަންވީ. ދިވެހިން ވީމާ 14 ދުވަހު ބަންދުގައި. ކޮން ދިރާސާއެއްގައިތޯ އޮތީ ފަތުރުވެރިންގެ ގައިން ކޮވިޑް-19 ނުފެތުރޭ ކަން،” އާންމުންގެ މީހަކު ހިޔާލު ފާޅުކުރިއެވެ.

ކޮވިޑް-19އާ ގުޅިގެން އެޗްޕީއޭ އިން ވަނީ ގިނަ ފިޔަވަޅުތަކެއް އަޅާފައެވެ. އޭގެ ސަބަބުން ބަލި ފެތުރިގެން ދިއުން ވަރަށް ބޮޑަށް ކޮންޓްރޯލްކުރެވުނެވެ. ނަމަވެސް އެއިން ކޮންމެ ފިޔަވަޅަކީ އެންމެ ރަނގަޅު ފިޔަވަޅެކޭ ބުނެވޭކަށް ނެތެވެ. ވަކި ބަޔަކަށް ވަކި ގޮތެއް ހެދުމަކީ ބަލައިގަންނަން ފަސޭހަ ކަމެއް ނޫނެވެ.