ޑަބްލިއުޓީއެމް ވަރޗުއަލްގައި ރާއްޖެއިން ބައިވެރިވެއްޖެ

ވޯލްޑް ޓްރެވަލް މާކެޓް ލަންޑަން، ޑަބްލިޔުޓީއެމް ވާޗުއަލްގައި ރާއްޖެއިން ބައިވެރިވެއްޖެއެވެ.

ކޯވިޑް-19 އާ ގުޅިގެން ދަތުރުފަތުރުކުރުމާއި އެހެނިހެން ކަންކަމަށް ކުރިމަތިވެފައިވާ ދަތިތަކުގެ ސަބަބުން ވާޗުއަލްކޮށް ބޭއްވުމަށް ނިންމާފައިވާ މިފެއާ ކުރިއަށް ދާނީ މި މަހުގެ 11 ވަނަ ދުވަހުގެ ނިޔަލަށެވެ.

މިއަހަރުގެ ފެއަރގައި އެމްއެމްޕީއާރުސީއާއި އެކު ރާއްޖޭގެ 7 ރިސޯޓެއް ވަނީ ވަރޗުއަލްކޮށް ބައިވެރިވެފައެވެ. އެއީ ވިލާ ހޮޓެލްސް އެންޑް ރިސޯޓްސް، ކައިމޫ ރިސޯޓްސް އެންޑް ހޮޓެލްސް، ސަން ސިޔާމް ރިސޯޓްސް، ރެޑިސަން ބްލޫ ރިސޯޓްސް މޯލްޑިވްސް އަދި ރޮބިންސަން ކްލަބް މޯލްޑިވްސްއެވެ.

އެމްއެމްޕީއާރުސީން ހާމަކުރާގޮތުގައި މި ވާޗުއަލް ފެއާގެ ޒަރިއްޔާއިން ފަތުރުވެރިކަމުގެ ދާއިރާގެ އެކި ފަރާތްތަކާ ބައްދަލުކޮށް، ވިޔަފާރި ގުޅުންތައް ބަދަހިކުރުމުގެ ފުރުސަތުގެ އިތުރުން، މަގުބޫލު ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިޝްތިހާރުކުރެވިގެންދާނެ ކަމަށެވެ.

އެގޮތުން ތިން ދުވަހުގެ މުއްދަތަށް ކުރިއަށްދާ މިފެއާގައި އެމްއެމްޕީއާރުސީން ފަތުރުވެރިކަމުގެ ސިނާޢަތަށް ދިމާވެފައިވާ ދަތިތަކުން އަރައިގަތުމަށް ޒަމާނީ އާ ހިޔާލުތަކާ ގުޅޭގޮތުން ބާއްވާ ލައިވް ކޮންފަރެންސް ސެޝަންތަކުގައި ބައިވެރިވުމުގެ އިތުރުން ވަން-ޓު-ވަން މީޓިންތަކާއި ސްޕީޑިން ނެޓްވޯކިން ސެޝަންތަކުގައި ބައިވެރިވާނެއެވެ.

advertisement

އަދި ރާއްޖެ ގުދުރަތީ ގޮތުން ވަކި ރަށްތަކެއް ގޮތުގައި އުފެދިފައި އޮތުމަކީ މިފަދަ ދަނޑިވަޅެއްގައި ފަތުރުވެރިން ދަތުރުކުރަން ޒިޔާރަތްކުރަން އެންމެ ރައްކާތެރި މަންޒިލްގެ ގޮތުގައި ރާއްޖެ އިޝްތިހާރުކުރެވިގެންދާނެ ކަމަށް އެމްއެމްޕީއާރުސީން ހާމަކުރެއެވެ.
މިފެއާގައި ދުނިޔޭގެ އެކި ކަންކޮޅުތަކުގައި ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުން ވަނީ ބައިވެރިވެފައެވެ. މިފެއާގައި މިއަހަރު އެންމެ ބޮޑު އިސްކަމެއްދީފައިވަނީ ކޯވިޑް-19ގެ ބަލިމަޑުގެ ސަބަބުން ދުނިޔޭގެ ފަތުރުވެރިކަމުގެ ސިނާޢަތަށް ދިމާވެފައިވާ ދަތިތަކުން އަރައިގަތުމަށް އެހީތެރިވެދިނުމަށެވެ.

ކޯވިޑް-19 އާ ގުޅިގެން ރާއްޖެ އިޝްތިހާކުރަމުން އައި ގޮތް ބަދަލުކޮށް، އެމްއެމްޕީއާރުސީން ވަނީ އޮންލައިން އަދި ޑިޖިޓަލް ފޯމްތަކުގައި އިޝްތިހާރުކުރުން އިތުރުކޮށްފައެވެ. އެގޮތުން ޑަބްލިޔުޓީއެމް ވާޗުއަލް އަކީ މިފަދަ އެއް އިވެންޓެވެ.