ރާއްޖޭގެ ފަތުރުވެރިކަން ޕްރޮމޯޓްކުރުމަށް 154 މިލިއަން ރުފިޔާ

ރާއްޖޭގެ ފަތުރުވެރިކަން އިސްތިހާރުކުރުމަށް އަންނަ އަހަރުގެ ބަޖެޓުގައި 154 މިލިއަން ރުފިޔާ ހިމެނުމަށް ބަޖެޓުގައި ހިމަނައިފިއެވެ.

އަންނަ އަހަރުގެ ބަޖެޓް ބަޔާން މަޖިލީހަށް ހުށަހަޅުއްވައި، ވާހަކަފުޅުދައްކަވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ ރާއްޖޭގެ ބޯޑަރު އަލުން ހުޅުވާލުމާއިއެކު އެއާލައިންތަކުން ދަނީ ރާއްޖެއަށް އަލުން ދަތުރުތައް ފަށަމުންކަމަށާއި، ދުވަހަކަށްވުރެ ދުވަހެއް ފަތުރުވެރިން ޒިޔާރަތް ކުރާ އަދަދު އިތުރުވަމުންދާކަމަށެވެ. ދުނިޔޭގެ ފަތުރުވެރިކަމުގެ މާކެޓުގައި ވާދަވެރިކަން އިތުރުވެގެންދާ މިދަނޑިވަޅުގައި ރާއްޖޭގެ ފަތުރުވެރިކަން މާކެޓު ކޮށް ޕްރޮމޯޓުކުރުމަށް ހާއްސަ އިސްކަމެއް ދީފައިވާނެކަމަށެވެ. އެގޮތުން ފަތުރުވެރިކަން މާކެޓު ކުރުމަށް 154 މިލިއަން ރުފިޔާ ވާނީ އަންނަ އަހަރުގެ ބަޖެޓުގައި ކަނޑައަޅާފައިކަމަށް މިނިސްޓަރ އަމީރު ވިދާޅުވިއެވެ.

މިއަހަރުގެ ތެރޭގައި ފަތުރުވެރިކަން އިސްތިހާރުކުރުމަށް އެމްއެމްޕީއާރްސީންވަނީ ގިނަ ޙަރަކާތްތައް ކުރިއަށްގެންގޮސްފައެވެ. އެގޮތުން ދުނިޔޭގެ އެކި ކަންކޮޅުތަކުގައި ރާއްޖެ އިސްތިހާރުކުރުމަށް ވަރޗުއަލްކޮށް ބޭއްވި ގިނަ ފެއަރތަކެއްގައި ރާއްޖެވަނީ އިޝްތިހާރުކޮށްފައެވެ. އަދި ބައެއް ފެއަރތަކަށް ގޮސް ރާއްޖެ އިޝްތިހާރު ކުރުމުގެ މަސައްކަތްވެސްވަނީ ކޮށްފައެވެ.

އަންނަ އަހަރަށް 154 މިލިއަން ރުފިޔާ ކަނޑައަޅާފައިވާއިރު، މިއަހަރަށްވެސް ފަތުރުވެރިކަން އިސްތިހާރުކުރުމަށް ކަނޑައަޅާފައިވަނީ 154 މިލިއަން ރުފިޔާގެ ބަޖެޓެކެވެ.

advertisement