ގްރޭޓަރ މާލެ ކަނެކްޓިވިޓީ ޕްރޮޖެކްޓަށް އިންޑިއާއިންދޭ ހިލޭ އެހީގެ އެއްބަސްވުމުގައި 2 ގައުމުން ސޮއެކޮށްފި

މާލެ-ވިލިމާލެ އަދި ތިލަފުށްޓާއި ގުޅިފަޅު ގުޅުވައިލާ، “ގްރޭޓާ މާލެ ކަނެކްޓިވިޓީ ޕްރޮޖެކްޓް” އަށް އިންޑިއާ އިން 100 މިލިއަން ޑޮލަރުގެ ހިލޭ އެހީ ދިނުމުގެ އެމްއޯޔޫއެއްގައި ސޮއިކޮށްފި އެވެ.

މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފޮރިން މިނިސްޓަރު އަބްދުﷲ ޝާހިދެވެ. އިންޑިއާ އިން ސޮއިކުރެއްވީ ރާއްޖޭގައި ހުންނަވާ އެ ގައުމުގެ ސަފީރު ސަންޖޭ ސުދިރު އެވެ.

advertisement

މާލެ ސަރަހައްދު ގުޅުވައިލާ ބްރިޖުތައް އެޅުމުގެ ޕްރޮޖެކްޓަށް ހަރަދުކުރާ 500 މިލިއަން ޑޮލަރުގެ ތެރެއިން 100 މިލިއަން ޑޮލަރަކީ އިންޑިއާ އިން ދޭ ހިލޭ އެހީއެކެވެ. އަނެއް 400 މިލިއަން ޑޮލަރަކީ އެ ގައުމުން ރާއްޖެ އަށް ދޫކޮށްފައިވާ 800 މިލިއަން ޑޮލަރުގެ “ލައިން އޮފް ކްރެޑިޓް ފެސިލިޓީ” އިން ހަރަދުކުރާ ފައިސާ އެވެ. “ލައިން އޮފް ކްރެޑިޓް ފެސިލިޓީ” އިން އެ ޕްރޮޖެކްޓަށް ދޫކުރާ 400 މިލިއަން ޑޮލަރުގެ އެއްބަސްވުމުގައި އިންޑިއާގެ އެގްޒިމް ބޭންކާއި ފިނޭންސް މިނިސްޓްރީން މިދިޔަ މަހު ވަނީ ސޮއިކޮށްފަ އެވެ.

މިއީ ރާއްޖޭގައި މިހާތަނަށް ހިނގާ އުމްރާނީ ތަރައްޤީގެ އެންމެ ބޮޑު މަޝްރޫޢުކަމަށް ފޮރިން މިނިސްޓަރ ޢަބްދުﷲ ޝާހިދުވަނީ ވިދާޅުވެފައެވެ. މާލެ-ވިލިމާލެ-ތިލަފުށި އަދި ގުޅީފަޅު ގުޅާލާ މަޝްރޫޢުގައި 6.7 ކިލޯމިޓަރުގެ ބުރިޖެއް ކޯޒްވޭތަކާއިއެކު ހެދުމަށްވަނީ ހަމަޖެހިފައެވެ.