ޔާމީންގެ މައްސަލާގައި އިދިކޮޅުގެ ކަންބޮޑުވުން އިންޑިއާއާ ހިއްސާކޮށްފި!

މަނީ ލޯންޑަރިންގެ ކުށުގައި ފަސް އަހަރު ދުވަހަށް ޖަލަށް ލާފައިވާ ކުރީގެ ރައީސް އަބްދުﷲ ޔާމީނާ ގުޅޭ ގޮތުން ހުރި ކަންބޮޑުވުންތައް އިދިކޮޅުން އިންޑިއާއާ ހިއްސާކޮށްފިއެވެ.  

އިދިކޮޅު ފަރާތްތަކުން މިއަދު ވަނީ މިހާރު ރާއްޖެ ވަޑައިގެން އުޅުއްވާ އިންޑިއާގެ ފޮރިން ސެކްރެޓަރީ ހަރްޝް ވަރްދަންއާ ބައްދަލުކޮށްފައެވެ. އިދިކޮޅު ޕީޕީއެމް އާއި ޕީއެންސީގެ ފަރާތުން އިންޑިއާގެ ފޮރިން ސެކްރެޓަރީއާ ބައްދަލުކުރެއްވި ޓީމްގެ އިސްކޮށް ހުންނެވީ ޕީޕީއެމްގެ ސްޕެޝަލް އެޑްވައިޒަރު އަދި ކުރީގެ ރައީސް ޑރ. މުހައްމަދު ވަހީދު ހަސަން މަނިކެވެ. މި ބައްދަލުކުރެއްވުމުގައި ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ވެސް ބައިވެރިވެވަޑައިގެންނެވިއެވެ.

advertisement

މި ބައްދަލުވުމުގައި އިދިކޮޅު ފަރާތްތަކުން ވަނީ ގިނަ ކަންބޮޑުވުންތަކެއް ހިއްސާކޮށްފައެވެ. އެ ގޮތުން މިހާރު ޖަލުގައި އޮންނެވި ކުރީގެ ރައީސް އަބްދުﷲ ޔާމީނާ މެދު މި ސަރުކާރުން އަަލުކުރަނީ ވަރަށް ބޭއިންސާފުން ކަމަށާއި ޝަރުއީ ދާއިރާ އަށް މި ސަރުކާރުން ނުފޫޒު ފޯރުވަމުން އަންނަ ކަމަށް ބުނެ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.

އިދިކޮޅު ފަރާތްތަކުން އިންޑިއާގެ ފޮރިން ސެކްރެޓަރީއާ ބައްދަލުކޮށްފައިވާ އިރު މި ސަރުކާރުން އިންޑިއާއާ ގާތްގުޅުމެއް ބާއްވާތީ އިދިކޮޅުން ދަނީ ވަރަށް ބޮޑަށް ފާޑުކިޔަމުންނެވެ. އަދި ރާއްޖޭގައި ތިބޭ އިންޑިއާ ސިފައިން ބޭރުކުރުމަށް ގޮވާލައި “އިންޑިއާ އައުޓް”ގެ ނަމުގައި އިދިކޮޅުން ދަނީ ކެމްޕެއިނެއް ވެސް ކުރަމުންނެވެ.

ޕީޕީއެމްގެ ސަރުކާރުގައި ވެސް އިންޑިއާ އާއި ރާއްޖެއާ ދެމެދު އޮތް ގުޅުން ވަރަށް ބޮޑަށް ހީނަރުވެގެން ދިޔައެވެ. މައިގަނޑު ސަބަބަކަށްވީ ޗައިނާއާ ގާތް ގުޅުމެއް ބޭއްވުމެވެ. ނަމަވެސް މިހާރު އޮތް ސަރުކާރުން އަންނަނީ އިންޑިއާއާ ވަރަށް ގާތް ގުޅުމެއް ބާއްވަމުންނެވެ. އަދި އިންޑިއާގެ އެހީގައި ގިނަ މަޝްރޫއުތަކެއް އަންނަނީ ހިންގަމުންނެވެ.