މި ސަރުކާރުން މިހާތަނަށް 372 މަޝްރޫޢެއް ފަށާފައިވޭ: ރައީސް ސޯލިހް

މި ސަރުކާރުން މިހާތަނަށް ޤައުމީ ތަރައްޤީގެ 372 މަޝްރޫޢެއް ފަށާފައިވާކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ޖުމްހޫރީދުވަހުގެ މުނާޞަތުގައި ރާއްޖޭގެ ޚަބަރުފަތުރާ ވަޞީލަތްތައް މެދުވެރިކުރައްވައި ދިވެހި ޤައުމާ މުޚާޠަބުކުރައްވައި މިއަދު ދެއްކެވި ވާހަކަފުޅުގައި ރައީސް ސޯލިހް ވިދާޅުވީ ސަރުކާރުން ރައްޔިތުންނަށް ވެފައިވާ ވަޢުދުތައް ފުއްދުމުގައި މިހާތަނަށް ގިނަ މަސައްކަތްތަކެއް ކޮށްފައިވާ ކަަމށެވެ. މއެ ގޮތުނން 372 މަޝްރޫއެއް ފަށާފައިވާ ކަމަށާއި މިއަދު ޤައުމަށް ކުރިމަތިވެފައިވާ ހާލަތާ އެކުވެސް، އޭގެ ތެރެއިން ޖުމްލަ 154 މަޝްރޫޢެއް މިހާރު ވެސް ހިނގަމުން އަންނަކަން އެ މަނިކުފާނު ފާހަގަކުރެއްވިއެވެ. މީގެ އިތުރުން 156 މަޝްރޫޢެއް ފެށުމަށް މިހާރު ވެސް ތައްޔާރީތައް ވަމުން އަންނަކަން އެ މަނިކުފާނު ހާމަކުރެއްވިއެވެ.

advertisement

ރައީސް ވިދާޅުވީ ކޯވިޑް-19އާ ދެކޮޅަށް ސަރުކާރުން މަސައްކަތްކުރަމުން ދާއިރު ވެސް، އަސާސީ ޚިދުމަތްތައް ފޯރުކޮށްދިނުމާއި ފަރުދުންނާއި ވިޔަފާރިތަކަށް ބޭނުންވާ އެހީތެރިކަން ފޯރުކޮށްދެމުން ދިޔަކަމަށާއި ހަމައެހެންމެ އެ ދަތި ހާލަތުގައި ވެސް ސަރުކާރުގެ މުވައްޒަފުން މަދުކުރުން ނުވަތަ މުސާރަ ކުޑަކުރުން ފަދަ ފިޔަވަޅެއް އަޅާފައި ނުވާ ކަމަށެވެ. އަދި ކޯވިޑް-19 މި ވަގުތު ކޮންޓްރޯލް ކުރެވިފައިވާ މަދު ޤައުމުތަކުގެ ތެރޭގައި ރާއްޖެ ހިމެނިފައި ވަނީ، ޞިއްޙީ ޚިދުމަތްތެރިންގެ މަސައްކަތާއި، ބަލި ކޮންޓްރޯލުކުރުމަށް އެޅި ފިޔަވަޅުތައް ތަންފީޒުކުރުމުގައި، ރައްޔިތުންގެ ފަރާތުން ލިބެމުންދާ އެއްބާރުލުމާ އެމަނިކުފާނު ވަނީ ފާހަގަކުރައްވާފައެވެ. އެ ހުރިހާ ފަރާތްތަކަށް ޝުކުރު އަދާކުރައްވައި ކުރިމަގުގައި މިބަލި ރާއްޖެއިން ނައްތައިލުމުގައި ހުރިހާ ފަރާތްތަކުން އެ ގޮތުގައި މަސައްކަތްކޮށްދެއްވުމަށް އެ މަނިކުފާނު އެދިވަޑައިގެންނެވިއެވެ.

އަންނަ އަހަރު ރާއްޖޭގެ ފަސް ސަރަޙައްދެއްގައި ފެންވަރު ރަނގަޅު، ވަށައިޖެހޭ ތަޢުލީމީ ނިޒާމެއް ޤާއިމުކުރުމަށް ވަސީލަތްތައް ތަރައްޤީކުރާނެ ކަން ވެސް ރައީސުލްޖުމްހޫރިއްޔާ އިއުލާންކުރެއްވިއެވެ. އަދި ރާއްޖޭގެ އެކި ސަރަޙައްދުތަކުގައި ޒަމާނީ ޓިވެޓް އިންސްޓިޓިއުޓްތައް ތަރައްޤީކުރުމާއި، ޖޫނިއަރ ކޮލެޖް ޤާއިމްކުރުމާއި، ޕޮލިޓެކްނިކްގެ ޚިދުމަތް ފުޅާކުރުމުގެ މަސައްކަތް، ފަށާނެކަމުގައި އެ މަނިކުފާނު ވިދާޅުވިއެވެ. މީގެ އިތުރުން ރައީސުލްޖުމްހޫރިއްޔާ ވަނީ މަތީ ތަޢުލީމުގެ ދާއިރާއިން ސަރުކާރުން މިހާތަނަށް ފަހިކޮށްދިން ފުރުޞަތުތަކާއެކު ޙާޞިލުކުރެވުނު ކުރިއެރުންތަކުގެ މައްޗަށް ވެސް އަލިއަޅުއްވައިލައްވާފައެވެ.

ރައީސް ސޯލިހް ވިދާޅުވީ ޞިއްޙީ ދާއިރާ ލާމަރުކަޒު ކުރުމުގެ 56 މަޝްރޫޢެއް، އަންނަ އަހަރު އަތޮޅުތަކުގައި ކުރިއަށް ގެންދިއުމާއި، ސަރުކާރުން ފަށާފައިވާ ފަސް ޓަރޝަރީ ހޮސްޕިޓަލް ތަރައްޤީކުރުމުގެ މަޝްރޫޢުގެ ފައިދާ އަންނަ އަހަރުގެ ތެރޭގައި ލިބެން ފަށާނެ ކަމަށެވެ. އަދި އިޤްތިޞާދު ސިންދަފާތު ކުރުމުގެ ގޮތުން ކުރެވޭ މަސައްކަތްތަކުގެ ތެރެއިން މަސްވެރިކަމާއި ދަނޑުވެރިކަން ފުޅާކުރުމުގެ ގޮތުން ކުރިއަށްގެންދާނެ ބައެއް މަޝްރޫޢުތަކުގެ ތަފްޞީލު ވެސް ރައީސުލްޖުމްހޫރިއްޔާ ހިއްސާކުރެއްވިއެވެ.

މީގެ އިތުރުން ސާފު ބޯފެން ލިބުމާއި ރައްކާތެރި ނަރުދަމާ ނިޒާމެއްގެ ޚިދުމަތް ދިނުމަށް ވެވަޑައިގެންނެވި ވަޢުދާ އެއްގޮތަށް، ބޯފެނާއި ނަރުދަމާ ޤާއިމުކުރުމުގެ މަސައްކަތް މިހާތަނަށް ނުފެށި ހުރި ރަށްރަށުގައި، އަންނަ އަހަރު ޢަމަލީ މަސައްކަތް ފަށައި، 2023 ގެ ނިޔަލަށް ރާއްޖޭގެ ހުރިހާ ރަށެއްގައި ފެނާއި ނަރުދަމާ ނިޒާމްގެ ޚިދުމަތް ޤާއިމްކުރާނެކަމުގައި ރައީސުލްޖުމްހޫރިއްޔާ ވިދާޅުވިއެވެ. މީގެ އިތުރުން ވެސް، އެކި ދާއިރާތަކުން އަންނަ އަހަރު ކުރިއަށްގެންދާނެ ތަފާތު މަޝްރޫޢުތަކާއި ކަންކަންކަމުގެ މަޢުލޫމާތުތައް ރައީސުލްޖުމްހޫރިއްޔާގެ ޚިޠާބުގައި ޙިއްޞާކުރެއްވިއެވެ.

ވަކިން ޚާއްޞަގޮތެއްގައި ތިމާވެށި ޙިމާޔަތް ކުރުމުގެ ގޮތުން އަންނަ އަހަރު ކުރާނެ އެންމެ މުހިންމު ކަމެއްގެ ގޮތުން، އެއް ފަހަރު ބޭނުންކޮށްފައި އުކައިލާ ޒާތުގެ ޕުލާސްޓިކު ބޭނުންކުރުން ހުއްޓައިލުމުގެ ޕްލޭން ތަންފީޒުކުރަން ފެށުން އެ މަނިކުފާނު ފާހަގަކުރެއްވިއެވެ. އެއާއެކު 2023 ވަނަ އަހަރުގެ ނިޔަލަށް، ދިވެހިރާއްޖެއަކީ، އެ ޒާތުގެ ޕުލާސްޓިކު އެއްގޮތަކަށް ވެސް ބޭނުން ނުކުރާ ޤައުމަކަށް ވެގެންދާނެކަން ފާހަގަކުރައްވައި، ސަރުކާރުން ފަށާ މި މަސައްކަތުގައި ހުރިހާ ރައްޔިތުން ޢަމަލީ ގޮތުން ބައިވެރިވެވަޑައިގެން ދެއްވުމަށް އަމަނިކުފާނު ގޮވައިލެއްވިއެވެ.

ރައީސުލްޖުމްހޫރިއްޔާގެ ޚިޠާބު ނިންމަވާލެއްވީ، އެ މަނިކުފާނުގެ ޒަޢާމަތުގައި ދިވެހިންގެ ދީނީ އެއްބައިވަންތަކަން ޙިމާޔަތްކުރުމާއި، ދިވެހިރާއްޖޭގެ މިނިވަންކަމާއި ސިޔާދަތު ކަށަވަރުކުރައްވާނެކަމުގެ ޔަޤީންކަން ދިވެހި ރައްޔިތުންނަށް އަރުވަމުންނެވެ.